រាជធានីភ្នំពេញ ៖ បុរសចុះពីលើរថយន្តឈរនិយាយទូរស័ព្ទក៏ស្រាប់តែមានជនសង្ស័យម្នាក់ជិះម៉ូតូមួយគ្រឿងមកធ្វើការសកម្មភាពឆក់យកទូរសព្ទ័បានសំរេច ភ្លាមនោះដែរក៏ត្រូវបុរសជនរងគ្រោះបើករថយន្តដេញតាមធ្វើអោយជនសង្ស័យភ័យស្លន់ស្លោបានផ្តួលម៉ូតូហើយរត់គេចខ្លួនបាត់ ដោយបន្សល់ម៉ូតូមួយគ្រឿងនៅកន្លែងកើតហេតុ ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ ថ្ងៃទី១៥ ខែកក្កដា ឆ្នាំ២០១៩ ស្ថិតនៅតាមបណ្តោយផ្លូវ៣៧១សូឡា ភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ ។
ជនរងគ្រោះសុំមិនបញ្ចេញឈ្មោះគ្រាន់តែដឹងថា ទូរស័ព្ទរបស់គាត់ដែលជនសង្ស័យឆក់យកទៅម៉ាក iPhone X Max តំលៃជាង1ពាន់ដុល្លារ ។ សមត្ថកិច្ចបានដកហូតម៉ូតូម៉ាកហុងដាស្កូបពី ពណ៌ស ពាក់ផ្លាកលេខ ភ្នំពេញ 1HL-8182 ជារបស់ជនសង្ស័យដែលបានជិះធ្វើសកម្មភាព ។
បើតាមសម្តីបុរសរងគ្រោះបានអោយដឹងថា មុនពេលកើតហេតុរូបគាត់បានបើករថយន្តម៉ាកRANG ROVER ពណ៌ស ចេញពីម្តុំផ្លូវសូឡាដើម្បីទៅរកញាំអាហារ រូបគាត់បានចុះពីរថយន្តក៏យកទូរស័ព្ទឈរនិយាយជាមួយមិត្តភ័ក្តដើម្បីណាត់ជួបគ្នាញាំអាហារ តែពេលកំពុងនិយាយក៏ស្រាប់តែបុរសជាជនសង្ស័យម្នាក់បានជិះម៉ូតូខាងលើមកធ្វើសកម្មភាពឆក់យកទូរស័ព្ទរបស់គាត់បានសម្រេច ហើយក៏បានជិះម៉ូតូរត់គេចខ្លួន ។
ភ្លាមៗនោះដែររូបគាត់ជាជនរងគ្រោះក៏បានបើករថយន្តដេញរហូតដល់ផ្លូវបេតុងក្រោយផ្សារស្ទឹងមានជ័យចាស់ ស្រាប់តែជនសង្ស័យភ័យស្លន់ស្លោររួចក៏បានផ្តួលម៉ូតូចោលហើយរត់គេចខ្លួនដោយយកទូរស័ព្ទរបស់គាត់ទៅជាមួយបាត់តែម្តង ។
ក្រោយកើតហេតុរូបគាត់ត្រូវបានសមត្ថកិច្ចនាំយកទៅប៉ុស្តិ៍ស្ទឹងមានជ័យ៣ រួមជាមួយនឹងម៉ូតូរបស់ជនសង្ស័យដើម្បីដាក់ពាក្យបណ្តឹងអោយសមត្ថកិច្ចជួយស្វែងរកជនសង្ស័យ និងទូរស័ព្ទរបស់គាត់មកវិញ ៕
កែសម្រួលដោយ ៖ សំណាង
ចែករំលែកព័តមាននេះ