រាជធានីភ្នំពេញ ៖ បុរសជនជាតិចិនម្នាក់ បើករថយន្តឡិចស៊ីសRX៣០០ រួមដំណើរដោយស្ត្រីខ្មែរ២
នាក់ បានបំពានលើផ្លូវដែក ដែលមិនមានបារ៉ាស់បិទផ្លូវ ក៏ត្រូវរថភ្លើងបុកពេញទំហឹង កាលពីវេលាម៉ោងប្រមាណ១១និង៤០នាទីយប់ថ្ងៃទី៩ ខែកក្កដា នៅក្បែរខារ៉ាអូខេយីហោ«យល់ចិត្ត» តាមផ្លូវហាណូយកែងនឹងផ្លូវរថភ្លើង ក្នុងសង្កាត់គោកឃ្លាង ខណ្ឌសែនសុខ ។
ប្រភពព័ត៌មាននៅកន្លែងកើតហេតុឲ្យដឹងថា រថភ្លើងលេខBde៤១០ ពណ៌ក្រហមឆ្នូតខៀវ បើកសណ្តោងក្បាលរថភ្លើងលេខ៦៦៣៥ដែលខូច ធ្វើដំណើរមកពីទិសខាងលិចឆ្ពោះចូលទៅស្ថានីយរថភ្លើងភ្នំពេញ ដើម្បីជួសជុល ។ លុះមកដល់ចំណុចខាងលើ រថភ្លើងបានបើកឆ្លងកាត់ផ្លូវហាណូយ ដោយពុំមានអ្នកទាញបារ៉ាស់បិទផ្លូវដើម្បីបញ្ឈប់ចរាចរណ៍ឆ្លងកាត់ផ្លូវដែកទេ គឺមានតែបុរសម្នាក់ឈរកាន់ភ្លើងពិល
ធ្វើជាសញ្ញាឱ្យយានយន្តដែលធ្វើចរាចរណ៍ឆ្លងកាត់ដឹងប៉ុណ្ណោះ ។
ខណៈនោះ ស្រាប់តែមានរថយន្តមួយគ្រឿងម៉ាកឡិចស៊ីសRX៣០០ ពណ៌ទឹកប្រាក់ ពាក់ផ្លាកលេខ ភ្នំពេញ ២T-៤៥១៩ បើកបរដោយបុរសជនជាតិចិនម្នាក់ និងមានស្ត្រីខ្មែរ២នាក់រួមដំណើរផង ធ្វើដំណើរតាមផ្លូវហាណូយក្នុងទិសដៅពីខាងជើងទៅខាងត្បូង និងក្នុងល្បឿនលឿនផងដែរ ។
ពេលមកដល់ចំណុចខាងលើ រថយន្តបានឆ្លងកាត់ផ្លូវដែកក៏ត្រូវបានរថភ្លើងបុកចំទ្វារក្រោយខាងស្តាំពេញ ទំហឹង បណ្តាលឲ្យក្រពឹតរងការខូចខាតយ៉ាងដំណំ ឯរថភ្លើងពុំមានខូចខាតអ្វីទេ ហើយការបុកនេះក៏មិនបណ្តាលឲ្យមានអ្នកណាម្នាក់រងរបួសដែរ ។ ក្រោយពីមានគ្រោះថ្នាក់ ភាគីទាំងសងខាងបានជជែកយកត្រូវរៀងៗខ្លួន ដោយភាគីខាងរថយន្តអះអាងថា នេះជាកំហុសខាងផ្លូវដែក ដែលមិនបានទាញប៉ារ៉ាស់បិទផ្លូវដើម្បីឲ្យដឹងថាកំពុងមានរថភ្លើងឆ្លងកាត់ ។
ដោយឡែក ភាគីខាងរថភ្លើងបានអះអាងថា ខណៈរថភ្លើងបើកឆ្លងកាត់ចំណុចខាងលើ គឺបានស៊ីផ្លេនិងមានអ្នកឈរសម្រួលចរាចរណ៍ត្រឹមត្រូវ ទោះបីជាមិនបានទាញប៉ារ៉ាស់បិទផ្លូវក៏ដោយ ។ ខណៈនោះ ក៏មានយានយន្តផ្សេងទៀតឈប់ឲ្យរថភ្លើងបើកឆ្លងកាត់ដែរ ប៉ុន្តែដោយឡែកតែរថយន្តឡិចស៊ីសខាងលើបើកលឿន និងព្យាយាមជែងមិនព្រមឈប់ដូចគេឯងទេ ។
ក្រោយកើតហេតុ សមត្ថកិច្ចមូលដ្ឋានបានមកធ្វើអន្តរាគមន៍ ហើយភាគីខាងរថយន្តដោយមិនចង់មានរឿងរ៉ាវវែងឆ្ងាយ ក៏សូមយករថយន្ត ទៅជួសជុលដោយខ្លួនឯង និងមិនទាមទារសំណងអ្វីពីខាងភាគីរថភ្លើងនោះទេ ។ ប៉ុន្ដែភាគីខាងរថភ្លើងមិនយល់ព្រមឡើយ ដោយទាមទារឲ្យសមត្ថកិច្ចជំនាញយករថយន្តទៅរក្សាទុក។
បន្ទាប់មក សមត្ថកិច្ចមូលដ្ឋានក៏បានរាយការណ៍ជូនសមត្ថកិច្ចជំនាញឲ្យមកធ្វើការវាស់ វែង ស្ទូចយករថយន្តខាងលើទៅរក្សានៅការិ យាល័យនគរបាលចរាចរណ៍ផ្លូវគោករាជធានីភ្នំពេញ ដើម្បីរង់ចាំធ្វើការដោះ ស្រាយទៅតាមផ្លូវច្បាប់បន្តទៀតនៅពេលក្រោយ ។
តាមមើលទៅ ភាគីអ្នកបើកបររថយន្តជនជាតិ ចិននោះប្រហែលគ្មានប័ណ្ណបើកបរខ្មែរទេ ហើយការបើកបរប្រើល្បឿនហួសច្បាប់កំណត់ ក៏សុទ្ធតែខុសទាំងអស់ ។ នេះចាត់ទុកជាគ្រោះល្អហើយ ដែលគ្រប់គ្នាមិនមានរងរបួស ៕ (សម្រួលដោយ៖ ស្រីណា)
ចែករំលែកព័តមាននេះ