ខេត្តកណ្តាល ៖ នៅចំពោះមុខសមត្ថកិច្ចកងរាជអាវុធហត្ថ ជនសង្ស័យជាចោរប្លន់ទាំងបីនាក់បានសារភាពដូចៗគ្នាថា ពួកខ្លួនពិតជាបានធ្វើសកម្មភាពសម្លាប់មនុស្សប្លន់យករថយន្ត កាលពីវេលាម៉ោង១ និង៣០នាទីរំលងអធ្រាត្រថ្ងៃទី២៩ ខែមិថុនា ឆ្នាំ២០១៩ ពេលធ្វើដំណើរតាមរថយន្តលើផ្លូវជាតិលេខ6A ចំណុចស្ពានលេខ២០ ស្ថិតក្នុងភូមិឡឥដ្ឋ ឃុំព្រែកដំបង ស្រុកមុខកំពូល ខេត្តកណ្តាល ។
ពួកគេសារភាពថា បានរឹត.កសម្លាប់ម្ចាស់រថយន្តដោយខ្សែក្រវាត់ ហើយបានយកសាកសពទៅប្លុងចោលនៅចំណុចជាប់ផ្លូវជាតិលេខ៨ (ស្ពានព្រែករូង) ស្ថិតនៅភូមិអន្លង់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល និងយករថ យន្តជនរងគ្រោះទៅប្លុងចោលនៅកាស៊ីណូសៀងហៃ ស្រុកចន្ទ្រា ខេត្តស្វាយរៀង ហើយក៏នាំគ្នារត់គេចមកលាក់ខ្លួននៅក្រុងបាវិត ខេត្តស្វាយរៀង ។ សម្រាប់វត្ថុតាង ដែលបានចាប់យកមានរថយន្ត១គ្រឿង ម៉ាក Highlander ពណ៌ទឹកប្រាក់ ពាក់ផ្លាកលេខ ភ្នំពេញ 2AS-2309 ដែលផ្លាកលេខនេះ ត្រូវក្រុមចោរដោះចេញ ។
ជនសង្ស័យទាំង៣នាក់ មាន៖១-ឈ្មោះ ម៉ី តាង ភេទប្រុស អាយុ២៣ឆ្នាំ មុខរបរធ្វើស្រែ មានទីនៅបច្ចុប្បន្នភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង ។ ២-ឈ្មោះ ម៉ី សារិ ហៅអាគិ ភេទប្រុស អាយុ២០ឆ្នាំ ជាកម្មករ មានទីលំនៅភូមិត្រពាំងផ្លុង សង្កាត់បាទី ក្រុងបាវិត ខេត្តស្វាយរៀង ។ ជនទាំង២ជាបងប្អូននឹងគ្នា ។
លុះដល់ម៉ោង១៩និង២៧នាទីថ្ងៃទី៥ កក្កដា ឆ្នាំ២០១៩ នៅចំណុចបន្ទប់ផ្ទះជួល ស្ថិតនៅភូមិតាពៅ សង្កាត់បាវិត ក្រុងបាវិតខេត្តស្វាយរៀង បានឃាត់ជនសង្ស័យម្នាក់ទៀតឈ្មោះ ជា គង់ឌីណា ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅភូមិច្រកឫស្សី សង្កាត់បាទី ក្រុងបាវិត ខេត្តស្វាយរៀង ។ ចំណែកបក្សពួកម្នាក់ទៀតកំពុងរត់គេចខ្លួននិងជាមេខ្លោងនៃផែនការប្លន់សម្លាប់នេះ ។
សូមរំលឹកថា ជន៣នាក់ដែលបាតដៃប្រឡាក់ឈាមក្នុងចំណោមបក្សពួក៤នាក់ ត្រូវបានចាប់ខ្លួនប៉ុន្មានថ្ងៃក្រោយមក បន្ទាប់ពីការប្រទះឃើញសាកសពបុរសម្នាក់ ត្រូវគេចងដៃដឹកមកប្លុងចោលក្នុងប្រឡាយអែបផ្លូវក្បែរស្ពានព្រែករូងទី២ លើកំណាត់ផ្លូវជាតិលេខ៨ ចំណុចភូមិអន្លង់ ឃុំព្រែកតាមាក់ ។
បន្ទាប់ពីការស៊ើប អង្កេតស្រាវជ្រាវអស់រយ:ពេលប្រមាណបីថ្ងៃ កងរាជអាវុធហត្ថខេត្តកណ្តាល ដឹកនាំដោយលោកឧត្តម សេនីយ៍ត្រី សំ តុលា មេបញ្ជាការ សហការជាមួយកងរាជអាវុធហត្ថលើផ្ទៃប្រទេស កងរាជអាវុធហត្ថខេត្តព្រៃវែង និងកងរាជអាវុធហត្ថខេត្តស្វាយរៀង ទើបបំបែកសំណុំរឿងករណីឃាតកម្មគិតទុកជាមុនដោយការរឹតកសម្លាប់ប្លន់យករថយន្តយកទៅលាក់ទុកនៅកាស៊ីណូមួយក្នុងស្រុកចន្ទ្រា ខេត្ត ស្វាយរៀង ។
សូមបញ្ជាក់ទៀតថា ក្រោយពីមានការប្រទះឃើញសាកសពជនរងគ្រោះ នៅវេលាម៉ោង៨ និង៣០នាទីថ្ងៃទី៣០ មិថុនា ឆ្នាំ២០១៩ នៅចំណុចជាប់ផ្លូវជាតិលេខ៨ ស្ពានព្រែករូងទី២ កម្លាំងជំនាញកងរាជអាវុធហត្ថខេត្តកណ្តាល និងស្រុកខ្សាច់កណ្តាល បានចុះធ្វើការត្រួតពិនិត្យកន្លែងកើតហេតុ ស្រាវជ្រាវរកអត្តសញ្ញាណសាកសពតាមរយៈការប្រកាសផ្សាយព័ត៌មានស្តីពី (ភិនភាគនិងសម្លៀកបំពាក់របស់សព) ។
ការស្រាវជ្រាវក៏បានរកឃើញអត្តសញ្ញាណជនរងគ្រោះឈ្មោះ មឿក សុភ័ណ្ឌ ភេទប្រុស អាយុ៣៧ឆ្នាំ មុខរបររត់តាក់ស៊ី មានទីលំនៅបច្ចុប្បន្នភូមិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ ។ រថយន្តជនរងគ្រោះដែលក្រុមចោរប្លន់សម្លាប់ម្ចាស់យកទៅបានចតប្លុងចោលនៅកាស៊ីណូ យីហោសៀងហៃ ក្នុង ស្រុកចន្ទ្រា ខេត្តស្វាយរៀង ។
ដោយឡែក នៅកន្លែងកើតហេតុ សមត្ថកិច្ចជំនាញនិងអាជ្ញាធរភូមិ-ឃុំបានធ្វើការត្រួតពិនិត្យវត្ថុតាងជុំវិញកន្លែងកើតហេតុ និងបានធ្វើកោសល្យវិច័យ លើសាកសពឃើញមានខ្សែភ្លើងពណ៌លឿង ប្រវែង២,៦៤ម៉ែត្រ ត្រូវបានចង.កដៃទាំងសងខាង ចំនួន៣ជុំ និងមានខ្សែក្រវាត់រឹត.កប្រវែង១.០៩ម៉ែត្រ ។
តាមការសន្និដ្ឋានដំបូង ដែលមិនទាន់ស្គាល់អត្តសញ្ញាណជនរងគ្រោះ ករណីនេះ គឺជាឃាតកម្ម ហើយសាកសពត្រូវសមត្ថកិច្ចជំនាញ អាជ្ញាធរមូលដ្ឋាន ប្រគល់ជូនក្រុមគ្រួសារយកធ្វើបុណ្យតាមប្រពៃណី ក្រោយលេចឮព័ត៌មានដែលបានផ្សាយ ។
ក្រោយពីកម្លាំងជំនាញកំណត់អត្តសញ្ញាណជនរងគ្រោះបានហើយ ទើបឈានកំណត់បានមុខសញ្ញាជនសង្ស័យ ដែលជាក្រុមចោរប្លន់យករថយន្ត ហើយបានធ្វើការពន្លាតដែនដីសមត្ថកិច្ចសហការជាមួយកម្លាំងជំនាញ នៃស្នងការដ្ឋានស្រាវជ្រាវ និងបង្ក្រាបបទល្មើសកងរាជអាវុធហត្ថលើផ្ទៃប្រទេស កម្លាំងកងរាជអាវុធហត្ថខេត្តព្រៃវែង និងខេត្តស្វាយរៀង ។
ក្រោមការសម្របសម្រួល ពីព្រះរាជអាជ្ញាស្តីទីអមសាលាដំបូងខេត្តកណ្តាល និងព្រះរាជអាជ្ញាអមសាលា ដំបូងខេត្តស្វាយរៀង រហូតឈានដល់ការបង្ក្រាប ដោយឃាត់ខ្លួនជនសង្ស័យចំនួន៣នាក់ជាបន្តបន្ទាប់ ក្នុងចំណោមបក្សពួក៤នាក់ នៅវេលាម៉ោង១៩និង៣០នាទីថ្ងៃទី៣ កក្កដា នៅចំណុចភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។ (សម្រួលដោយ៖ ស្រីណា)
ចែករំលែកព័តមាននេះ