រាជធានីភ្នំពេញ ៖ មន្រ្តីកងរាជអាវុធហត្ថម្នាក់ត្រូវជនសង្ស័យមួយក្រុមមានគ្នា ៣នាក់ បាញ់ ១គ្រាប់ ត្រូវចំត្រគាកខាងឆ្វេង ប្លន់យកម៉ូតូឌ្រីមC125 ស៊េរី២០១៤ ពណ៌ខ្មៅ ១គ្រឿង ពាក់ស្លាកលេខ ភ្នំពេញ 1CB-6034 បានសម្រេច កាលពីវេលាម៉ោង ៥ និង ១៥នាទី ទៀបភ្លឺចូលថ្ងៃទី១៤ មករា ២០១៤ នៅតាមបណ្តោយផ្លូវនតប្រ៊ីត មុខបុរីពិភពថ្មី ស្ថិតក្នុងសង្កាត់ទឹកថ្លា ខណ្ឌសែនសុខ។
ជនរងគ្រោះមានឈ្មោះ អ៊ុំ រតនា ភេទប្រុស អាយុ ៤៦ឆ្នំា ជាមន្រ្តីកងរាជអាវុធហត្ថលើផ្ទៃប្រទេស ស្នាក់នៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ បានរងរបួសត្រគាកខាងឆ្វេងបៀមគ្រាប់កាំភ្លើង ១គ្រាប់ ត្រូវរថយន្តសាមុយដឹកយកទៅសង្រ្គោះនៅមន្ទីរពេទ្យព្រះកុសុមៈ។
តាមប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះបានចេញពីយាមនៅក្លិបកាសា ធ្វើដំណើរតាមផ្លូវ២០០៤ លុះមកដល់ចំណុចផ្លូវនតប្រ៊ីត ស្រាប់តែមានជនល្មើស ៣នាក់ ជិះម៉ូតូ ២គ្រឿង ម៉ាកឌ្រីម និង SZ ជិះប្រដេញតាម ព្រមទាំងស្រែកគំរាមជនរងគ្រោះឲ្យឈប់ តែពេលជនរងគ្រោះមិនព្រមឈប់ ជនល្មើសក៏ដកកាំភ្លើងបាញ់ជនរងគ្រោះ ១គ្រាប់ ចំត្រគាកឆ្វេងបណ្តាលឲ្យដួល ហើយវាយនឹងស្នាប់កាំភ្លើង រួចលើកយកម៉ូតូជិះរត់គេចខ្លួនបាត់ស្រមោល។
ក្រោយកើតហេតុ ជនរងគ្រោះបានដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទឹកថ្លា ដើម្បីឲ្យសមត្ថកិច្ចធ្វើការស្រាវជ្រាវរកជនល្មើសមកផ្តន្ទាទោសតាមច្បាប់៕
ចែករំលែកព័តមាននេះ