រាជធានីភ្នំពេញ៖ ថ្នាក់ដឹកនាំក្រសួងដែនដី នគរូបនីយកម្ម និងសំណង់បានលើកឡើងថាសន្ទុះនៃការរីកចម្រើនដ៏ខ្លាំងក្លានៃវិស័យសំណង់ ទាមទារនូវពង្រឹងលើការងារគ្រប់គ្រង ការគោរពច្បាប់ និងបទដ្ឋានបចេ្ចកទេស ដើម្បីធានានូវសុវត្ថិភាព គុណភាព និងសោភ័ណ្ឌភាពនៃសំណង់ ។
ដូច្នេះហើយក្រោយពីមានករណីនៃការបាក់ស្រុតអគារកំពស់៧ជាន់របស់ចិន ដែលបានបណ្តាឱ្យមានកម្មករស្លាប់ចំនួន ២៨ នាក់ និងចំនួន ២៦ នាក់ផ្សេងទៀតរងរបួសនៅក្នុងខេត្តព្រះសីហនុ នោះការរឹងបណ្តឹងគុណភាពសំណង់គឺជារឿងចាំបាច់បំផុត ហេតុដូច្នេះហើយរាជរដ្ឋាភិបាលតាមរយៈមន្ត្រីជំនាញ បានដាក់ចេញនូវវិធានការណ៍ក្តៅគគុក ដើម្បីឲ្យគុណភាពសំណង់នៅកម្ពុជា មានលក្ខណៈត្រឹមត្រូវតាមបច្ចេកទេស និងគុណភាព។
លោក ជា សុផារ៉ា ឧបនាយករដ្ឋមន្ត្រីនិងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់នាឱកាសដឹកនាំកិច្ចប្រជុំស្តីពី «ការងារសិក្សាគម្រោងប្លង់ និងសាងសង់» ជាព្រឹកថ្ងៃទី ៤ ខែកក្កដា ឆ្នាំ២០១៩ នេះបានថ្លែងនៅចំពោះមុខតំណាងក្រុមហ៊ុនប្រកបអាជីវកម្មសាងសង់ចំនួន ២៨៦ ក្រុមហ៊ុន ក្រុមហ៊ុនប្រកបអាជីវកម្មសិក្សាគម្រោងប្លង់ ៣១ ក្រុមហ៊ុន ក្រុមជាងសំណង់និងក្រុមហ៊ុនអចលនទ្រព្យ ស្ថាបត្យករ និងវិស្វករ ថាការរួមចំណែកវិស័យឯកជន ពិសេសក្រុមហ៊ុនប្រកបអាជីវកម្មសាងសង់ ក្រុមហ៊ុនប្រកបអាជីវកម្មសិក្សាគម្រោងប្លង់ ក្រុមជាងសំណង់ ស្ថាបត្យករនិងវិស្វករ ដើរតួនាទីយ៉ាងសំខាន់ក្នុងការទ្រទ្រង់វិស័យសំណង់ឲ្យធានាបាននូវកំណើនប្រកបដោយចីរភាព ។
លោក ជា សុផារ៉ា បានបន្តថា ដូច្នេះក្រុមហ៊ុននិងអ្នកពាក់ព័ន្ធខាងវិស័យសំណង់ទាំងអស់ត្រូវបំពេញកាតព្វកិច្ចនិងលក្ខខណ្ឌចំបងៗមួយចំនួន ដូចជា៖ ១)- ចូលរួមគោរពច្បាប់ បទដ្ឋាន និងស្តង់ដារបច្ចេកទេសក្នុងអាជីព ដោយមិនត្រូវប្រព្រឹត្តប្រាស់ចាកក្រមសីលធម៌វិជ្ជាជីវ, ទី២)- ត្រូវមានអាជ្ញាប័ណ្ណប្រកបអាជីវកម្មសាងសង់អនុញ្ញាតដោយក្រសួងរៀបចំដែនដី ខេត្ត ឬពីស្ថាប័នដែលមានសមត្ថកិច្ច, ទី៣)- ត្រូវមានកិច្ចសន្យសាងសង់ជាមួយម្ចាស់គម្រោង និងកិច្ចសន្យាការងារជាមួយបុគ្គលិក និងកម្មករ។ ជាពិសេសគឺមិនត្រូវទទួលម៉ៅការសាងសង់សំណង់ដែលមិនមានលិខិតអនុញ្ញាតត្រឹមត្រូវចេញដោយស្ថាប័នមានសមត្ថកិច្ច ។ ជាងនេះទៅទៀត គឺត្រូវមានបុគ្គលិកជំនាញបចេ្ចកទេស ស្ថាបត្យករ ជាវិស្វករ ដែលបានចុះបញ្ជីនិងប្រធានការដ្ឋានកម្មករជំនាញ កម្មករទូទៅ ឲ្យបានគ្រប់គ្រាន់សម្រាប់ការអនុវត្តការងារក្នុងការដ្ឋានជាដើម ។ល។
ជាមួយគ្នានោះផងដែរ លោកឧបនាយករដ្ឋមន្ត្រី ជា សុផារ៉ា ក៏បានឲ្យដឹងថា សន្ទុះនៃការវិនិយោគក្នុងវិស័យសំណង់នៅកម្ពុជាពិតជាកើនឡើងខ្ពស់គួរឲ្យកត់សម្គាល់ ដោយរាប់ចាប់ពីឆ្នាំ២០០០ ដល់ត្រឹមខែឧសភាដល់ឆ្នាំ២០១៩ នេះ គឺមានគម្រោងវិនិយោគសរុប ៤៥,២៦៥គម្រោង ដែលប៉ាន់ស្មានទុនវិនិយោគគិតជាទឹកប្រាក់មានប្រមាណជាង ៤៤,៥៧៦ លានដុល្លារអាមេរិក។ លោក ជា សុផារ៉ា បានគូសបញ្ជាក់ថា ការរីកចម្រើនខាងវិស័យសំណង់ខ្លាំងក្លាបែបនេះ ដោយសារតែការដាក់ចេញនូវគោលនយោយបាយដ៏ត្រឹមត្រូវរបស់រាជរដ្ឋាភិបាលកម្ពុជា ក្នុងការថែរក្សាសុខសន្តិភាព និងកៀងគរអ្នកវិនិយោគគិនជាតិនិងអន្តរជាតិឱ្យមកបណ្តាក់ទុនវិនិយោគនៅក្នុងប្រទេសកម្ពុជាលើគ្រប់វិស័យ ជាពិសេសវិស័យសំណង់តែម្តង ។
លោករដ្ឋមន្ត្រីក្រសួងដែនដី បានបញ្ជាក់ថា «បន្ថែមពីនេះការចូលរួមពីសំណាក់ពីវិស័យឯកជននៅក្នុងការអនុវត្តវិស័យសំណង់កម្ពុជា។ ជាមួយនឹងការរីកចម្រើននេះ ការគោរពច្បាប់បទដ្ឋាននិងស្តង់ដារបច្ចេកទេស ជាប្រការចាំបាច់ដែលត្រូវអនុវត្តន៍ សម្រាប់វិស័យឯកជន និងក្រុមហ៊ុនដែលរកស៊ីក្នុងវិស័យសំណង់ដែលមិនអាចខ្វះបាន»៕ កែសម្រួលដោយ ៖ សុឃាក់
ចែករំលែកព័តមាននេះ