មនុស្សយើងគ្រប់រូបមិនអាចរស់នៅដោយម្នាក់ឯង និងជៀសវាងការប្រាស្រ័យទាក់ទងជាមួយអ្នកដទៃទាំងស្រុងទេ ។ មិនថា អ្នកមិនចូលចិត្តនិយាយ និងរួសរាយប៉ុណ្ណាក៏តែងតែមានទំនាក់ទំនងជាមួយនឹងមនុស្សសំខាន់ៗក្នុងជីវិតដែរ ។ ប៉ុន្តែមនុស្សជាច្រើនភ្លេចថា ទំនាក់ទំនងដែលពួកគេមានជាមួយអ្នកដទៃអាចនឹងប៉ះពាល់ដល់ប្រាក់ចំណូល និងអាជីវកម្មរបស់ខ្លួនបាន ។ យ៉ាងណាក្តីទំនាក់ទំនងដែលអ្នកមានជាមួយអ្នកដទៃប្រៀបបានជា ការវិនិយោគមួយដែរ ។
ប្រសិនបើអ្នកមិនយកចិត្តទុកដាក់នឹងវាទេនោះអ្នកមិនអាចរក្សាវាបានឡើយ ហើយវាអាចបង្កផលប៉ះពាល់ដល់ផ្នែកផ្សេងៗនៃជីវិតអ្នកផងដែរ ។ ឧទាហរណ៍ដូចជា បាត់បង់ដៃគូអាជីវកម្មដែលបង្កឲ្យអាជីវកម្មរបស់អ្នកមិនអាចដំណើរការទៅមុខបានដោយរលូនជាដើម ។
តើទំនាក់ទំនងដែលអ្នកមានជាមួយអ្នកដទៃ គឺជាអ្វីដែលមានន័យ និងធ្វើឲ្យអ្នកសប្បាយរីករាយជាងគេមែនទេ ? តើអ្នកចំណាយពេលវេលាគ្រប់គ្រាន់ ដើម្បីថែរក្សាទំនាក់ទំនងដែលអ្នកឲ្យតម្លៃលើដែរឬទេ ? តើអ្នកនៅព្យាយាមរក្សាទំនាក់ទំនងដែលមិនល្អសម្រាប់អ្នកឬអត់ ? តើអ្នកស្មោះត្រង់ក្នុងទំនាក់ទំនងជាមួយអ្នកដទៃទេ ?
កត្តាសំខាន់មួយដែលជួយឲ្យអ្នកបន្តជោគជ័យក្នុងការរកប្រាក់ចំណូល ឬដំណើរការអាជីវកម្មឬរក្សាទំនាក់ទំនងដែលអ្នកមានជាមួយអ្នកដែលជាប់ពាក់ព័ន្ធ និងមនុស្សសំខាន់ៗទាំងឡាយក្នុងជីវិតអ្នក ។ ដើម្បីជៀសវាងបាត់បង់ទំនាក់ទំនងជាមួយមនុស្សសំខាន់ៗទាំងនេះមិនថា ជាដៃគូជីវិត ឬដៃគូអាជីវកម្មទេ អ្នកត្រូវតែចេះរៀបចំ និងតាមដានវា ។ អ្នកគួរតែដឹងថា ពួកគេនៅឯណា ហើយពួកគេកំពុងតែទៅណា ។ អ្នកត្រូវតែដឹងពីវិធីដែលអ្នកនឹងធ្វើ ដើម្បីធ្វើឲ្យទំនាក់ទំនងកាន់តែប្រសើរឡើងក្នុងសប្តាហ៍នេះ ។
ដើម្បីឲ្យងាយស្រួល អ្នកគួរតែសរសេរពីទំនាក់ទំនងសំខាន់ជាងគេ ដែលអ្នកមានជាមួយនឹងមនុស្ស១០រូបក្នុងជីវិតអ្នក និងផ្តល់ពីមូលហេតុដែលបង្កឲ្យអ្នកគិតថា ទំនាក់ទំនងនេះពិតជាសំខាន់សម្រាប់អ្នក ។ រួចឆ្លើយសំណួរថា តើទំនាក់ទំនងនេះ ស្ថិតក្នុងដំណាក់កាលណា ? តើអ្នកកំពុងតែទទួលខុសត្រូវទាំងស្រុងក្នុងការបង្កើតគុណភាព កិច្ចសហប្រតិបត្តិការ និងអនាគតនៃទំនាក់ទំនងនេះទេ ? តើអ្នកបានវិនិយោគពេលវេលា និងកម្លាំងរបស់អ្នកលើទំនាក់ទំនងនេះក្នុងរយៈពេលពី៧ទៅ៣០ថ្ងៃកន្លងមកនេះទេ ?
បន្ទាប់មកអ្នកគួរតែកំណត់គោលដៅច្បាស់លាស់ទាក់ទិននឹងវិធីធ្វើឲ្យទំនាក់ទំនងនេះប្រសើរឡើង រួចស្រមៃមើលរូបរាងនៃទំនាក់ទំនងនេះជាលទ្ធផល ។ បន្ទាប់មកអ្នកត្រូវតែចេញសកម្មភាព និងសម្រេចគោលដៅដែលបានកំណត់។ អ្វីដែលសំខាន់ គឺអ្នកមិនត្រូវឈប់វិនិយោគលើទំនាក់ទំនងទាំងនេះទេ ហើយតែងតែយកចិត្តទុកដាក់លើវាដូចពេលដែលអ្នកព្យាយាមរក្សាវាដំបូង ៕ កែសម្រួលដោយ ៖ សុឃាក់
ចែករំលែកព័តមាននេះ