ទីក្រុងវាស៊ីនតោន ៖ មួយថ្ងៃបន្ទាប់ពីលោកប្រធានាធិបតីសហរដ្ឋអាមេរិក Donald Trump បានបង្កើតនូវភាពភ្ញាក់ផ្អើលមួយដោយសន្យាថានឹងបន្ធូរបន្ថយការរឹតបណ្តឹងលើក្រុមហ៊ុនបចេ្ចកវិទ្យាយក្ស Huawei នឹងអះអាងថាឲ្យក្រុមហ៊ុនអាមេរិកអាចលក់ផលិតផលទៅឲ្យក្រុមហ៊ុនបច្ចេកវិទ្យាមួយនេះ ស្រាប់តែមន្ត្រីជាន់ខ្ពស់អាមេរិកមួយរូបបានប្រាប់មន្ត្រីអនុវត្តច្បាប់របស់ក្រសួងពាណិជ្ជកម្មនៅសប្តាហ៍នេះថា ក្រុមហ៊ុនបចេ្ចកវិទ្យាយក្ស Huawei របស់ចិនគួរតែត្រូវបានកត់ទុកក្នុងបញ្ជីខ្មៅដដែល ។ នេះបើយោងតាមការចុះផ្សាយរបស់ភ្នាក់ងារ Reuters កាលពីម្សិលមិញ ។
លោក Trump កាលពីថ្ងៃទី២៩ មិថុនា កន្លងទៅបានធ្វើឲ្យទីផ្សារពិភពលោកមានការភ្ញាក់ផ្អើល ដោយសន្យាចំពោះមុខលោកប្រធានាធិបតីចិន Xi Jinping នៅខាងក្រៅកិច្ចប្រជុំកំពូល G20 នៅក្នុងប្រទេសជប៉ុនថាលោកនឹងអនុញ្ញាតឱ្យក្រុមហ៊ុនអាមេរិកលក់ផលិតផលទៅឱ្យ Huawei Technologies Co Ltd ។
កាលពីខែឧសភាក្រុមហ៊ុននេះត្រូវបានកត់បញ្ជូលបន្ថែមទៅក្នុងបញ្ជីមួយដែលគេហៅថា Entity List ដែលបានហាមឃាត់ក្រុមហ៊ុនអាមេរិក មិនឱ្យលក់ទៅឱ្យក្រុមហ៊ុនចិនខាងលើ ដោយគ្មានការអនុញ្ញាតពិសេសនោះទេ ដែលនោះជាការដាក់ទណ្ឌកម្មចំពោះសកម្មភាពប្រឆាំងផលប្រយោជន៍សន្តិសុខជាតិរបស់សហរដ្ឋអាមេរិក។
យ៉ាងណាមិញ ការប្រកាសរបស់ Trump នៅថ្ងៃសៅរ៍កន្លងទៅថានឹងស្តារឡើងវិញនូវកិច្ចពិភាក្សាពាណិជ្ជកម្មជាមួយក្រុងប៉េកាំង របស់ចិន ក៏ត្រូវបានអបអរសាទរដោយក្រុមហ៊ុន
ផលិតបន្ទះឈីប (Chip) អាមេរិក ដែលចង់រក្សាការលក់ទៅឱ្យក្រុមហ៊ុន Huawei ដែលជាក្រុមហ៊ុនផលិតឧបករណ៍ទូរគមនាគមន៍ធំជាងគេបំផុតនិងអតិថិជនសំខាន់របស់សហរដ្ឋអាមេរិក។
ប៉ុន្តែការធ្វើអត្ថាធិប្បាយរបស់លោក Trump ក៏បង្កឱ្យមានការភ័ន្តច្រឡំក្នុងចំណោមអ្នកប្រឡូកក្នុងឧស្សាហកម្មនិងមន្ត្រីរដ្ឋាភិបាលដែលកំពុងព្យាយាមយល់ពីគោលនយោបាយរបស់ក្រុមហ៊ុន Huawei ដែលគាត់បានដាក់បង្ហាញ ។
នៅក្នុងសារអេឡិចត្រូនិកមួយទៅកាន់មន្ត្រីអនុវត្តច្បាប់កាលពីថ្ងៃច័ន្ទ ទី ០១ ខែកក្កដា នេះ ដែលភ្នាក់ងារ Reuters គឺលោក John Sonderman អនុប្រធានការិយាល័យអនុវត្តការនាំចេញនៅក្នុងការិយាល័យឧស្សាហកម្មនិងសន្តិសុខ (BIS) របស់ក្រសួងពាណិជ្ជកម្ម សហរដ្ឋអាមេរិក បានព្យាយាមបញ្ជាក់ពីរបៀបដែលភ្នាក់ងារគួរតែស្នើសុំសំណើរអាជ្ញាប័ណ្ណពីក្រុមហ៊ុន កំពុងស្វែងរកការយល់ព្រមដើម្បីលក់ទៅកាន់ក្រុមហ៊ុន Huawei ។
រាល់ពាក្យស្នើសុំ បែបនេះគួរតែត្រូវបានពិចារណាលើគុណសម្បត្តិនិងប្រើប្រាស់ ជាមួយភាសាដែលកត់សម្គាល់ថា «ភាគីនេះស្ថិតនៅលើបញ្ជីអង្គភាពខ្មៅ (Entity List) ។ ចូរវាយតម្លៃគោលនយោបាយ ពិនិត្យមើលអាជ្ញាបណ្ណឡើងវិញក្រោមផ្នែកទី ៧៤៤» ។
នេះគឺជាអ្វីដែលគាត់បានសរសេរ ដោយលើកឡើងពីបទបញ្ជានានាដែលរួមបញ្ចូលទាំងបញ្ជី Entity List និងគោលនយោបាយផ្តល់អាជ្ញាប័ណ្ណ និងគោលនយោបាយអាជ្ញាបណ្ណនៃការ «សន្មត់ការបដិសេធ» ដែលត្រូវបានអនុវត្តចំពោះក្រុមហ៊ុនដែលមានឈ្មោះក្នុងបញ្ជីខ្មៅ។ លោកបានបន្ថែមថាការណែនាំបន្ថែមពី BIS គួរតែត្រូវបានគេយកទៅពិចារណាផងដែរនៅពេលវាយតម្លៃពាក្យសុំអាជ្ញាប័ណ្ណពាក់ព័ន្ធនឹងក្រុមហ៊ុន Huawei ។
ជាមួយគ្នានេះផងដែរ ក្រុមហ៊ុន Huawei បានប្រាប់ Reuters កាលពីថ្ងៃពុធ ម្សិលមិញនេះថាស្ថាបនិកនិងនាយកប្រតិបត្តិលោក Ren Zhengfei បានថ្លែងថាសេចក្តីថ្លែងការណ៍របស់លោក Trump កាលពីចុងសប្ដាហ៍នោះគឺ «ល្អសម្រាប់ក្រុមហ៊ុនអាមេរិក»។ ក្រុមហ៊ុន Huawei ក៏មានឆន្ទៈបន្តទិញផលិតផលពីក្រុមហ៊ុនអាមេរិក។ ប៉ុន្តែយើងមិនឃើញមានផលប៉ះពាល់ច្រើនទៅលើអ្វីដែលយើងកំពុងធ្វើទេ។ អ្នកនាំពាក្យរបស់ក្រុមហ៊ុន Huawei បាននិយាយនៅក្នុងអ៊ីម៉ែលថា «យើងនឹងនៅតែផ្តោតលើការងាររបស់យើងផ្ទាល់» ។
នាយកដ្ឋានពាណិជ្ជកម្មមិនបានឆ្លើយតបភ្លាមៗទៅនឹងសំណើសុំយោបល់ទេ។ ក៏ប៉ុន្តែមនុស្សម្នាក់ដែលដឹងអំពីបញ្ហានេះបាននិយាយថាលិខិតនេះគឺជាមគ្គុទេសន៍តែមួយគត់ដែលមន្ត្រីអនុវត្តច្បាប់បានទទួលបន្ទាប់ពីការប្រកាសដ៏គួរឱ្យភ្ញាក់ផ្អើលរបស់លោក Trump កាលពីថ្ងៃសៅរ៍។ ការសន្មត់នៃការបដិសេធមួយមានន័យថាការពិនិត្យឡើងវិញយ៉ាងតឹងរឹងហើយអាជ្ញាប័ណ្ណភាគច្រើនដែលត្រូវបានពិនិត្យឡើងវិញក្រោមច្បាប់នេះមិនត្រូវបានអនុម័តនោះទេ ៕
កែសម្រួលដោយ ៖ សំណាង
ចែករំលែកព័តមាននេះ