ថៃ ៖ វិបត្តិប្រេងនៅថៃ នាំឱ្យប្រជាជនរងទុក្ខវេទនា និងពុះកញ្ជ្រោលទៅដោយកំហឹង ខណៈតំបន់ជាច្រើនមនុស្សនាំគ្នាតម្រង់ជួរយ៉ាងវែងអន្លាយអស់រាប់ម៉ោង តែចុងក្រោយអត់មានសាំងចាក់ ។ខណៈដែលអ្នកលេងបណ្តាញសង្គមថៃមួយចំនួន ធ្លាប់តែចំណាយពេលអង្គុយចុចទូរស័ព្ទឌឺដងឱ្យកម្ពុជា រឿងតម្លៃសាំងឡើងថ្លៃ…
ថៃ ៖ វិបត្តិប្រេងនៅថៃ នាំឱ្យប្រជាជនរងទុក្ខវេទនា និងពុះកញ្ជ្រោលទៅដោយកំហឹង ខណៈតំបន់ជាច្រើនមនុស្សនាំគ្នាតម្រង់ជួរយ៉ាងវែងអន្លាយអស់រាប់ម៉ោង តែចុងក្រោយអត់មានសាំងចាក់ ។
ខណៈដែលអ្នកលេងបណ្តាញសង្គមថៃមួយចំនួន ធ្លាប់តែចំណាយពេលអង្គុយចុចទូរស័ព្ទឌឺដងឱ្យកម្ពុជា រឿងតម្លៃសាំងឡើងថ្លៃ ពេលនេះបែរជាត្រូវមកអង្គុយហូរទឹកភ្នែក កាន់ធុងទទេរង់ចាំសាំងទាំងត្រដាបត្រដួសវិញម្តង ។
ជាក់ស្តែង វិបត្តិខ្វះខាតប្រេងឥន្ធនៈនៅភាគខាងត្បូងនៃប្រទេសថៃ កំពុងតែឆាបឆេះដូចភ្លើងរាលដាល ខណៈដែលប្រជាជនសៀមរាប់ពាន់នាក់កំពុងថ្ងួចថ្ងូររកដំណោះស្រាយពីរដ្ឋាភិបាលមិនឃើញ ។
យោងតាមសារព័ត៌មានខៅសធ នៅខេត្តក្រាប៊ី (Krabi) កាលពីថ្ងៃទី២២ ខែមីនា ឆ្នាំ២០២៦ ទិដ្ឋភាពដ៏គួរឱ្យខ្លោចចិត្តបានកើតឡើង នៅពេលដែលប្រជាពលរដ្ឋនាំគ្នាយកឡាន មកតម្រង់ជួរតាំងពីព្រលឹមស្រាងៗ ដើម្បីរង់ចាំឡានដឹកសាំងដែលគ្រោងនឹងមកដល់នៅម៉ោង២:៣០ រសៀល ។ អ្នកខ្លះសុខចិត្តបោះបង់ការងារចោល ខ្លះជិះឆ្លងស្រុក ខ្លះជិះពីកោះមកដីគោក គ្រាន់តែសង្ឃឹមបានសាំងចាក់ ដើម្បីបន្តដង្ហើមសេដ្ឋកិច្ច ។
អ្វីដែលកាន់តែហួសចិត្ត ទៅលើការគ្រប់គ្រងរបស់អាជ្ញាធរថៃនោះ គឺបរិមាណប្រេង១៥,០០០ លីត្រ ដែលទើបតែដឹកមកដល់ ត្រូវបានលក់អស់ខ្ទេចគ្មានសល់ត្រឹម តែរយៈពេល ៣ម៉ោង ប៉ុណ្ណោះ ។ ចំណែកអ្នកដែលមកមិនទាន់ ឬអ្នកដែលមកពីចម្ងាយបានត្រឹមតែឈរមើលធុងសាំងទទេ និងវិលត្រឡប់ទៅផ្ទះវិញទាំងអស់សង្ឃឹម ។
នៅលើបណ្តាញសង្គមវិញ សម្រែកកំហឹ.ងរបស់ប្រជាជនថៃ បានផ្ទុះឡើងយ៉ាងខ្លាំងដោយខ្លះបានរិះគន់ចំៗទៅលើថ្នាក់ដឹកនាំថា« យកត្រចៀកទៅស្រែ យកភ្នែកទៅចម្ការ » មិនព្រមងាកមកមើលទុក្ខវេទនារបស់រាស្ត្រដែ លកំពុងដាច់បាយដោយសារគ្មានសាំងទៅធ្វើការ ។
សារខ្លះទៀត បានឌឺដងឱ្យអ្នកដឹកនាំខ្លួនឯងថា «មនុស្សល្ងង់ធ្វើជាមេ មនុស្សអាក្រក់ធ្វើជាកូនចៅ គ្រប់គ្រងបានយ៉ាងដុនដាបបំផុត» ។ ស្ថានីយប្រេងឥន្ធនៈជាច្រើននៅតំបន់នោះបានប្រកាសបិទទ្វាររហូតដល់ដាច់ខែ ដោយសារគ្មានប្រេងផ្គត់ផ្គង់ ។
នេះជាមេរៀនមួយបង្ហាញថា ខណៈដែលសារព័ត៌មានថៃ និងអ្នកលេងបណ្តាញសង្គមថៃមួយចំនួនធ្លាប់តែមើលបំណាំខ្មែររឿងរយៈពេលថ្ងៃនៃស្តុកសាំងនៅសល់ក៏ដូចជា តម្លៃសាំងឡើងថ្លៃនោះ មកទល់ពេលនេះខ្មែរយើងនៅមានសាំងចាក់ពេញៗធុង គ្រាន់តែថ្លៃបន្តិចតាមទីផ្សារពិភពលោក ចំណែកអ្នកជិតខាងឯណេះវិញ សូម្បីតែមានលុយ ក៏រកសាំងចាក់មិនបានដែរ ៕
ចែករំលែកព័តមាននេះ