ទីក្រុងព្យុងយ៉ាង៖ ថ្មីៗនេះ ប្អូនស្រីលោកគីមជុងអ៊ុនគឺលោកស្រីគីមយូជុង (Kim Yo Jong) និយាយរិះគន់រដ្ឋាភិបាលជប៉ុនពីបទស្វះស្វែងរកការសន្ទនាគ្នាកម្រិតកំពូលជាមួយរបបក្រុងព្យុងយ៉ាង។ លោកស្រីបញ្ជាក់ជំហរជាថ្មីថាមិនត្រូវការប្រាស្រ័យទាក់ទងផ្នែកការទូតជាមួយជប៉ុនទេ។ នៅក្នុងសេចក្ដីប្រកាសដែលផ្សព្វផ្សាយតាមទូរទស្សន៍រដ្ឋកូរ៉េខាងជើង ខេស៊ីអឹនអេ (KCNA) លោកស្រីគីមយូជុងបាននិយាយរិះគន់នាយករដ្ឋមន្ត្រីជប៉ុន លោកស្រីតាកាអ៊ីឈិ (Takaichi) ដែលបានជួបលោកត្រាំកាលពីសប្ដាហ៍មុន និងបានរំលេចឱ្យឃើញអំពីបំណងចង់រៀបចំជំនួបកំពូលរវាងកូរ៉េខាងជើង និងជប៉ុន។
លោកស្រីគីមយូជុងសរសេររៀបរាប់នៅក្នុងសេចក្ដីប្រកាសនោះថាមិនមែនជប៉ុនចង់ឱ្យអ្វីមួយកើតឡើង វានឹងកើតឡើងនោះទេ។ បើសិននាយករដ្ឋមន្ត្រីជប៉ុនចង់ដោះស្រាយរបៀបវារៈផ្ទាល់ខ្លួន (ដែលមិនមែនជារឿងរបស់យើងទេ) ថ្នាក់ដឹកនាំរបស់យើងគ្មានចិត្តចង់ជួបគ្នាឡើយ ហើយយើងក៏គ្មានហេតុផលអ្វីត្រូវជួបទល់មុខគ្នាដោយផ្ទាល់នោះដែរ។ ការលើកឡើងរបស់លោកស្រីគីមយូជុងដូចខាងលើនេះចង់សំដៅទៅលើពាក្យសម្ដីរបស់លោកស្រីតាកាអ៊ីឈិនៅពេលជួបលោកត្រាំ។
លោកស្រីតាកាអ៊ីឈិអះអាងថាលោកស្រីចង់ជួបគ្នាផ្ទាល់ជាមួយលោកគីមជុងអ៊ុនយ៉ាងខ្លាំងដើម្បីដោះស្រាយបញ្ហាចាក់ស្រែះជាមួយកូរ៉េខាងជើងជាយូរមកហើយពាក់ព័ន្ធនឹងជនជាតិជប៉ុនជាច្រើននាក់ដែលត្រូវកូរ៉េខាងជើងចាប់ពង្រត់យកទៅលាក់ទុកជាយូរមកហើយ។ ក្នុងនោះ មានតាំងពីជនជាតិជប៉ុនដែលកូរ៉េខាងជើងចាប់យកទៅឱ្យដឹកនាំខ្សែភាពយន្ត និងជនជាតិជប៉ុនដែលត្រូវកូរ៉េខាងជើងចាប់យកទៅឱ្យធ្វើស៊ូស៊ី (Sushi) ឱ្យឪពុកលោកគីមជុងអ៊ុនបរិភោគជាដើម។
មេដឹកនាំកូរ៉េខាងជើង និងជប៉ុនធ្លាប់ជួបគ្នាកម្រិតកំពូលលើកចុងក្រោយកាលពីឆ្នាំ២០០៤។ ទោះបីជប៉ុនខិតខំបោះដៃយ៉ាងណា ប៉ុន្តែកូរ៉េខាងជើងតែងតែបដិសេធជានិច្ច។ កាលពីឆ្នាំ២០២៤ លោកស្រីគីមយូជុងបដិសេធយ៉ាងម៉ឺងម៉ាត់មិនឱ្យមានការរៀបចំកិច្ចពិភាក្សាគ្នាអ្វីទាំងអស់ពាក់ព័ន្ធនឹងករណីចាប់ពង្រត់ជនជាតិជប៉ុនទាំងនោះ។ លោកស្រីអះអាងថាបញ្ហានេះត្រូវបានដោះស្រាយចប់សព្វគ្រប់អស់ហើយ។ នៅថ្ងៃនេះ លោកស្រីបញ្ជាក់ជំហរដូចមុនដដែលគឺថាមិនត្រូវការសន្ទនាគ្នាជាមួយជប៉ុនជាដាច់ខាត ហើយបើចង់ចាប់ផ្ដើមការសន្ទនាគ្នាផ្នែកការទូតលុះត្រាតែធ្វើតាមលក្ខខណ្ឌរបស់កូរ៉េខាងជើង។
លោកស្រីសរសេររៀបរាប់ថាបើចង់ឱ្យមានការជួបគ្នាកម្រិតកំពូលរវាងមេដឹកនាំប្រទេសទាំង២ ជប៉ុនត្រូវតែឈប់រំលឹករឿងដែលកើតឡើងជាយូរមកហើយ។ លោកស្រីចង់សំដៅលើអ្វីដែលជប៉ុនបន្តនិយាយដដែលៗអំពីការចាប់ពង្រត់ជនជាតិរបស់ខ្លួន និងការទាមទារឱ្យកូរ៉េខាងជើងប្រគល់អ្នកទាំងនោះត្រឡប់មកវិញ។ លោកស្រីសរសេរបន្តទៀតថាជប៉ុនហាក់ដូចជាដើរផ្ទុយពីទិសដៅដែលត្រូវដើរ។ ត្រង់ចំណុចនេះហើយដែលកូរ៉េខាងជើងយល់ថាគ្មានហេតុផលអ្វីដែលខ្លួនត្រូវចូលរួមសន្ទនាគ្នាជាមួយប្រទេសដែលនៅតែប្រកាន់យកគំនិតបុរាណ និងគ្មានភាពប្រាកដនិយម៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ