កូឡុំប៊ី៖ សោកនាដកម្មធ្លាក់យន្តហោះយោធាកូឡុំប៊ី ត្រូវគេរាយការណ៍ថា ទាហានខ្ទង់ ៨០ទឹកដោះម្តាយ រួចផុតពីសេចក្តីស្លា.ប់ តែជាង៣០នាក់ទៀតត្រូវពលី ។ សារព័ត៌មាន AP…
កូឡុំប៊ី៖ សោកនាដកម្មធ្លាក់យន្តហោះយោធាកូឡុំប៊ី ត្រូវគេរាយការណ៍ថា ទាហានខ្ទង់ ៨០ទឹកដោះម្តាយ រួចផុតពីសេចក្តីស្លា.ប់ តែជាង៣០នាក់ទៀតត្រូវពលី ។
សារព័ត៌មាន AP បានរាយការណ៍នៅព្រឹកថ្ងៃ២៤ ខែមីនាថា យន្តហោះដឹកជញ្ជូនយោធាប្រភេទ Hercules C-130 របស់កូឡុំប៊ីមួយគ្រឿងបានធ្លាក់ ក្រោយពេលហោះឡើងមិនបានប៉ុន្មានផងនៅក្នុងតំបន់ Amazon ភាគខាងត្បូងប្រទេសកូឡុំប៊ី ដែលបណ្តាលឱ្យមនុស្សយ៉ាងតិច៣៣ នាក់ស្លា.ប់ និង៨១នាក់ផ្សេងទៀត រងរបួសស្រាលធ្ងន់ ។
យន្តហោះដឹកជញ្ជូនយោធា Hercules C-130 ដែលផ្ទុកមនុស្សសរុប១២១នាក់ ដែលភាគច្រើនជាទាហាន បានធ្លាក់ កាលពីថ្ងៃចន្ទ ភ្លាមៗបន្ទាប់ពីហោះចេញពីទីក្រុងពូអេរតូ ឡេហ្គុយហ្សាម៉ូ (Puerto Leguizamo) ស្ថិតក្នុងខេត្តពុទូម៉ាយ៉ូ (Putumayo) នៃតំបន់ Amazon ដែលមានព្រំប្រទល់ជាប់ប្រទេសអេក្វាទ័រ និងប៉េរូ ។
លោកអភិបាលរងក្រុង Carlos Claros បានមានប្រសាសន៍ថា សាកស.ពជនរងគ្រោះត្រូវបានបញ្ជូនទៅកាន់កន្លែងតម្កល់ស.ពក្នុងទីក្រុង ខណៈដែលមូលដ្ឋានសុខាភិបាលក្នុងតំបន់ចំនួនពីរកំពុងទទួលសង្គ្រោះបឋមដល់អ្នករបួស មុននឹងបញ្ជូនពួកគេទៅកាន់មន្ទីរពេទ្យក្នុងទីក្រុងធំៗ ។
លោក Claros ក៏បានថ្លែងអំណរគុណដល់ប្រជាពលរដ្ឋក្នុងតំបន់សម្រាប់ការជួយជ្រោមជ្រែងយ៉ាងរហ័សក្នុងកិច្ចប្រតិបត្តិការសង្គ្រោះ ។ យោងតាមព័ត៌មាន ពីកងទ័ពអាកាសកូឡុំប៊ី យន្តហោះ Hercules C-130 នេះមានដឹកមនុស្សសរុប១២១នាក់ ក្នុងនោះមានទាហាន១១០នាក់ និងសមាជិកក្រុមនាវិក១១នាក់ ។
រដ្ឋមន្ត្រីក្រសួងការពារជាតិ លោក Pedro Sánchez បានឱ្យដឹងថា យន្តហោះដែលជួបគ្រោះថ្នាក់នេះកំពុងដឹកជញ្ជូនទាហានទៅកាន់ទីតាំងមួយផ្សេងទៀតនៅក្នុងខេត្ត ។ រូបភាពពីកន្លែងកើតហេតុ បង្ហាញឱ្យឃើញនូវផ្សែងខ្មៅហុយទ្រលោមចេញពីទីតាំងធ្លាក់ក្នុងវាលស្រែមួយ ខណៈដែលបុគ្គលិកយោធា និងស៊ីវិល បានសម្រុកទៅកាន់កន្លែងកើតហេតុ ដើម្បីជួយសង្គ្រោះ ។
កងទ័ពអាកាសកូឡុំប៊ី បានបញ្ជាក់ថា មនុស្សយ៉ាងតិច ៧៧នាក់ ត្រូវបានសង្គ្រោះដែលភាគច្រើនបានរងរបួស ។ ទោះជាយ៉ាងណាក៏ដោយចំនួនអ្នកស្លា.ប់ និងរបួសចុងក្រោយកំពុងត្រូវបានកំណត់នៅឡើយ ។ ដំបូងឡើយ សេចក្តីថ្លែងការណ៍ដែលចែករំលែកដោយប្រធានាធិបតី Gustavo Petro បានបង្ហាញថា មានអ្នកស្លា.ប់៣៣ នាក់ ប៉ុន្តែតួលេខនេះបានផ្លាស់ប្តូរ ខណៈដែលកិច្ចខិតខំប្រឹងប្រែងសង្គ្រោះនៅតែបន្ត ។ មេបញ្ជាការកងទ័ពអាកាសលោក Carlos Fernando Silva បាននិយាយថា យន្តហោះបានជួបបញ្ហាបច្ចេកទេស និងបានធ្លាក់ក្នុងចម្ងាយប្រហែល២គីឡូម៉ែត្រពីព្រលានយន្តហោះ ប៉ុន្តែមូលហេតុ ជាក់លាក់មិនទាន់ត្រូវបានកំណត់នៅឡើយទេ ។ យន្តហោះពេទ្យចំនួនពីរគ្រឿង ដែលមានគ្រែសរុប៧៤ ត្រូវបានបញ្ជូនទៅ ដើម្បីដឹកអ្នករបួសទៅកាន់មន្ទីរពេទ្យក្នុងរដ្ឋធានី Bogota ដើម្បីព្យាបាល ។
ទន្ទឹមនឹងនេះ រដ្ឋមន្ត្រីការពារជាតិ លោក Sánchez បានអះអាងថា គ្មានការចង្អុលបង្ហាញណាមួយដែលថា យន្តហោះនេះត្រូវបានវាយប្រហារដោយក្រុមប្រដាប់អាវុធដែលធ្វើសកម្មភាពនៅក្នុងតំបន់នោះទេ ។ លោកបានហៅព្រឹត្តិការណ៍នេះថាជា «សោកនាដកម្មដ៏ជ្រាលជ្រៅសម្រាប់ប្រទេសជាតិ» ។
គួររំលឹកផងដែរថា មុននេះបន្តិច ហេតុការណ៍ស្រដៀងគ្នានេះក៏បានកើតឡើងនៅក្នុងប្រទេសបូលីវីផងដែរ នៅពេលដែលយន្តហោះ C-130 មួយគ្រឿងបានធ្លាក់ក្នុងទីក្រុង El Alto ដោយបានធ្លាក់ឆ្ងាយពីតំបន់លំនៅដ្ឋានតែបន្តិចប៉ុណ្ណោះ ដែលបណ្តាលឱ្យមនុស្សស្លា.ប់ជាង ២០នាក់ និងរបួសប្រហែល៣០នាក់ផ្សេងទៀត៕
ចែករំលែកព័តមាននេះ