រាជធានីភ្នំពេញ ៖ បន្ទាប់ពីក្រសួងសាធារណៈការនិងដឹកជញ្ជូន បានអនុវត្តន៍រឹតបន្តឹងច្បាប់ចរាចរណ៍ផ្លូវគោកចាប់ពីថ្ងៃទី ១៥ ដល់ថ្ងៃទី៣០ បានជះផលប៉ះពាល់មួយចំនួន ដល់វិស័យដឹកជញ្ជូនទំនិញកម្ពុជាក៏ដូចជាអ្នកផលិតផងដែរ ។ ក្នុងនោះសមាគមរោងចក្រកាត់ដេរសម្លៀកបំពាក់…
រាជធានីភ្នំពេញ ៖ បន្ទាប់ពីក្រសួងសាធារណៈការនិងដឹកជញ្ជូន បានអនុវត្តន៍រឹតបន្តឹងច្បាប់ចរាចរណ៍ផ្លូវគោកចាប់ពីថ្ងៃទី ១៥ ដល់ថ្ងៃទី៣០ បានជះផលប៉ះពាល់មួយចំនួន ដល់វិស័យដឹកជញ្ជូនទំនិញកម្ពុជាក៏ដូចជាអ្នកផលិតផងដែរ ។ ក្នុងនោះសមាគមរោងចក្រកាត់ដេរសម្លៀកបំពាក់ និងស្បែកជើងកម្ពុជាហៅកាត់ថា GMAC និងសមាគម ភ្នាក់ងារបញ្ជូនទំនិញកម្ពុជាហៅកាត់ថា Caffa ( កាំហ្វា ) បានស្នើដល់ក្រសួងសាធារណៈការដោះស្រាយបញ្ហាកើតឡើងជាបណ្ដោះអាសន្នដើម្បីអោយការបញ្ជូនទំនិញទៅកាន់នាវាបានទាន់ពេលវេលា ។
បើតាមលោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បានអោយដឹងថាចាប់តាំងពីក្រសួងប្រកាសអនុវត្តន៍នូវវិធានការរឹតបន្តឹងច្បាប់ចរាចរណ៍ផ្លូវគោកមក អ្នកដឹកជញ្ជូនភាគច្រើនមិនហ៊ានបញ្ចេញយានយន្តសម្រាប់ដឹកទំនិញបញ្ជូនទៅកាន់កំពង់ផែទេ ពីព្រោះខ្លាចសមត្ថកិច្ចត្រួតពិនិត្យរកឃើញមានកំហុស បច្ចេកទេសណាមួយ រួចហើយក្រសួងតម្រូវអោយបង់ពិន័យជាទឹកប្រាក់រាប់លានរៀល ដែលធ្វើអោយខាតបង់ច្រើនទៀត ។ លោកបាននិយាយបន្តទៀតថា «ជាធម្មតា យានយន្តដែលយើងបើកបរលើផ្លូវសព្វដង គឺជារថយន្តនាំចូលនិងមកកែច្នៃនៅក្នុងស្រុក ដូច្នេះបើសិនជាសមត្ថកិច្ចត្រួតពិនិត្យបច្ចេក
ទេស គឺសឹងតែគ្រប់យានយន្តហើយដែលមានកំហុស បើមិនកំហុសនេះ ក៏កំហុសនោះដែរ ដូច្នេះហើយទើបក្រុមហ៊ុនដឹកជញ្ជូនមិនហ៊ានអោយអ្នកបើកបរបញ្ជូនទំនិញទៅកាន់កំពង់ផែឡើយ » ។ លោកបន្តថា ក្នុងនាមជាអ្នកដឹកជញ្ជូន លោកចង់ក្រសួង បង្កើតយានដ្ឋានមួយ ហើយនៅពេលដែលរកឃើញបញ្ហាបច្ចេកទេសលើយានយន្តណាមួយរបស់ពួកយើង យើងស្វាគមន៍ជានិច្ចក្នុងការយកទៅជួសជុលបន្ថែម និងរីករាយក្នុងការបង់ប្រាក់ជូនទៅក្រសួង ។ តែពេលនេះ ក្រសួងចាប់ពួកយើងហើយ ត្រូវបង់ប្រាក់រាប់លានរៀល ហើយពួកយើងមិនដឹងថាយកយានយន្តយើងទៅជួសជុលនៅទីណាទៀត ដូច្នេះវាកាន់តែវែងឆ្ងាយនិងពិបាកណាស់ ដូច្នេះហើយទើបអ្នកដឹកជញ្ជូនមិនហ៊ានបញ្ចេញយានយន្តដឹកទំនិញទៅកាន់កំពង់ផែឡើយ ដែលធ្វើអោយទំនិញនៅស្ទះច្រើន និងប្រឈមនឹងការខកជើងនាវា ទៀតផង ។
លោកបន្ថែមថា បើក្រសួងមិនលើកលែង ឬអនុគ្រោះ នៅតែរយៈពេលពីរបីថ្ងៃ ឬមួយសប្ដាហ៍ទៀត កប៉ាល់នឹងចេញហួស ហើយអ្នកដឹកជញ្ជូនទំនិញនឹងត្រូវងាកមកបញ្ជូនទំនិញតាមជើងយន្តហោះវិញដែលមានតម្លៃថ្លៃជាងតាមជើងសមុទ្ររហូតដល់បីបួនដង ។ មួយវិញទៀត បើសិនជាការបញ្ជូនទំនិញទៅកាន់អ្នកបញ្ជាទិញមិនទាន់ពេលវេលា គេអាចនឹងមិនយកហើយបញ្ជូនមកវិញ ធ្វើអោយកម្ពុជាកាន់តែខាតបង់ទៅទៀត ព្រោះតែការសងគេនូវទំហំទឹកប្រាក់យ៉ាងច្រើន ។
សូមរំលឹកថាកាលពីថ្ងៃទី២៨ ខែមិថុនា កំពង់ផែស្វយ័តក្រុងភ្នំពេញបានស្នើរដ្ឋមន្ត្រីក្រសួងសាធារណៈការនិងដឹកជញ្ជូន មានវិធានការដោះស្រាយបណ្ដោះអាសន្ន ចំពោះការរឹតបន្តឹង ការអនុវត្តច្បាប់ស្តីពីចរាចរណ៍ផ្លូវគោក ។ នៅថ្ងៃទី០២ ខែកក្កដា ឆ្នា ២០១៩នេះដែរ សមាគមរោងចក្រកាត់ដេរសម្លៀកបំពាក់និងស្បែកជើងកម្ពុជា ក៏បានស្នើសុំរាជរដ្ឋាភិបាលកម្ពុជាឱ្យមានដំណោះស្រាយបណ្ដោះអាសន្នមួយជាមួយសមាគមដឹកជញ្ជូនកម្ពុជា ពាក់ព័ន្ធនឹងការពង្រឹងការងនុវត្តច្បាប់ចរាចរណ៍របស់គណៈកម្មការជាតិសុវត្ថិភាពចរាចរណ៍ផ្លូវគោក ពីព្រោះសមាជិករបស់សមាគមបាននិងកំពុងក្លាយជាជនរងគ្រោះ នៅក្នុងបញ្ហានេះដោយមិនដឹងខ្លួន ។
ថ្លែងនៅក្នុងសន្និសីទសារព័ត៌មានមួយកាលពីព្រឹកថ្ងៃទី ០២ កក្កដា ២០១៩នេះដែរ លោក សេង ឈួន រដ្ឋលេខាធិការក្រសួងសាធារណៈការនិងដឹកជញ្ជូនបានមានប្រសាសន៍ថា ចាប់តាំងពីអនុវត្តន៍មកក្រុមការងារបានត្រួតពិនិត្យលើរថយន្តសរុប១, ៩៥៤គ្រឿង ក្នុងនោះ រកឃើញថារថយន្តមិនត្រឹមត្រូវតាមបច្ចេកទេស១១ភាគរយ ដែលមានចំនួន ២២៤គ្រឿង ដូច្នេះរថយន្តដែលត្រឹមត្រូវតាមបច្ចេកទេសគឺមានចំនួនច្រើន និងសូមអោយម្ចាស់ក្រុមហ៊ុនដឹកជញ្ជូនដែលមានរថយន្តមិនត្រឹមត្រូវតាមបច្ចេកទេសគួរគោរពច្បាប់និងអនុវត្តន៍តាមច្បាប់ចរាចរណ៍ផ្លូវគោគអោយបានត្រឹមត្រូវផង ។
បើតាមលោក ហឹម យ៉ាន អគ្គស្នងការរងនៃអគ្គស្នងការនគរបាលជាតិ បានអោយដឹងថា ការយឺតយ៉ាវនៃការបញ្ជូនទំនិញ របស់ក្រុមហ៊ុនដឹកជញ្ជូន មិនមែនមកពីការរឹតបន្តឹងច្បាប់ចរាចរណ៍នោះទេ ព្រោះការត្រួតពិនិត្យរថយន្តនីមួយៗ តែប៉ុន្មាននាទីប៉ុណ្ណោះ ផ្ទុយទៅវិញ គឺក្រុមហ៊ុនដឹកជញ្ជូនទេដែលមិនគោរពច្បាប់ចរាចរណ៍ ដែលធ្វើអោយសមត្ថកិច្ចត្រូវឃាត់ទុក ៕ កែសម្រួលដោយ ៖ សុឃាក់
ចែករំលែកព័តមាននេះ