សេដ្ឋកិច្ចរបស់ប្រទេសកម្ពុជាលូតលាស់បានយ៉ាងលឿន ក្នុងរយៈពេលមួយទសវត្សកន្លងមកនេះ ។ ជាមួយគ្នានេះផងដែរ ឱកាសការងារលើទីផ្សារមានកាន់តែច្រើន ហើយក្រុមហ៊ុនកំពុងតែប្រកួតប្រជែងគ្នាដណ្តើមបុគ្គលិកដែលមានសមត្ថភាពខ្ពស់ ។ ប៉ុន្តែសម្រាប់អ្នកដែលទើបតែពេញវ័យ មិនមានបទពិសោធន៍ការងារ និងមិនទាន់ដឹងថា…
សេដ្ឋកិច្ចរបស់ប្រទេសកម្ពុជាលូតលាស់បានយ៉ាងលឿន ក្នុងរយៈពេលមួយទសវត្សកន្លងមកនេះ ។ ជាមួយគ្នានេះផងដែរ ឱកាសការងារលើទីផ្សារមានកាន់តែច្រើន ហើយក្រុមហ៊ុនកំពុងតែប្រកួតប្រជែងគ្នាដណ្តើមបុគ្គលិកដែលមានសមត្ថភាពខ្ពស់ ។
ប៉ុន្តែសម្រាប់អ្នកដែលទើបតែពេញវ័យ មិនមានបទពិសោធន៍ការងារ និងមិនទាន់ដឹងថា ចង់ចូលក្នុងវិស័យណាវិញកំពុងតែជួបប្រទះនឹងឧបសគ្គក្នុងការរកការងារដែលសាកសមនឹងពួកគេ ។ ជាមូយគ្នានេះផងដែរ ក្នុងផ្នែកមួយនៃទីផ្សារការងារមានក្រុមហ៊ុន និងស្ថាប័នផ្សេងៗដែលកំពុងជ្រើសរើសបុគ្គលិកហាត់ការ ឬស្ម័គ្រចិត្ត ដើម្បីបំពេញចន្លោះ ។ តើការធ្វើការដោយមិនយកប្រាក់ខែដូច្នេះជារឿងល្អឬទេ ? មនុស្សជាច្រើនប្រហែលជាមិនយល់ស្របនឹងគំនិតនេះ ប៉ុន្តែការធ្វើការមិនយកប្រាក់ខែក៏មានអត្ថប្រយោជន៍ដែរ ជាពិសេសសម្រាប់ក្រុមមនុស្សខាងក្រោម៖
១. អ្នកដែលមិនទាន់ស្គាល់ច្បាស់ពីខ្លួនឯង
មនុស្សម្នាក់ៗតែងតែមានក្តីសុបិនពីការងារដែលខ្លួនចង់ធ្វើពេលពេញវ័យ ប៉ុន្តែក៏តែងតែមានពេលមួយដែលយើងចាប់ផ្តើមមិនច្បាស់លាស់ពីជម្រើសរបស់យើងដែលបង្កឲ្យមានភាពស្ទាក់ស្ទើរច្រើនក្នុងការចូលក្នុងទីផ្សារការងារក្នុងវិស័យណាមួយ ។ សម្រាប់អ្នកដែលស្ថិតក្នុងក្រុមនេះ វាពិតជាសំខាន់ណាស់ក្នុងការសាកល្បងការងារផ្សេងៗដែលអនុញ្ញាតឲ្យអ្នកដឹងថា វាជាការងារដែលអ្នកស្រលាញ់ចូលចិត្តឬទេ ។ ការងារស្ម័គ្រចិត្ត និងការហាត់ការជាជម្រើសល្អព្រោះវាមិនបង្ខំឲ្យអ្នកមានសម្ពាធធ្ងន់ធ្ងរ ឬមានកុងត្រាយូរ ។
២. អ្នកមិនទាន់មានសមត្ថភាព ឬបទពិសោធន៍គ្រប់គ្រាន់
មានពេលខ្លះយើងស្វែងរកការងារដែលខ្លួនចូលចិត្តបានហើយ តែវាមិនប្រាកដថា យើងពូកែទេ ។ ប្រសិនបើអ្នកជាមនុស្សដែលគិតថា ខ្លួនមិនទាន់មានសមត្ថភាព ឬបទពិសោធន៍គ្រប់គ្រាន់ទេនោះ អ្នកអាចសាកល្បងការងារហាត់ការ ឬស្ម័គ្រចិត្តទាំងនេះបាន ដើម្បីបង្កើនសមត្ថភាពខ្លួន ។ ពេលខ្លះមេរៀន និងបទពិសោធន៍ដែលអ្នកទទួលបានវាមានតម្លៃច្រើនជាងប្រាក់ខែទៅទៀត ។
៣. សម្រាប់អ្នកចូលចិត្តធ្វើអំពើសប្បុរសធម៌
ប្រាកដណាស់ការងារ គឺការងារ ប៉ុន្តែមានការងារមួយចំនួនដែលអាចជួយដល់មនុស្សជាច្រើនបាន ឬជួយដោះស្រាយបញ្ហាអ្វីមួយក្នុងសង្គម ។ ក្រៅពីជួយដល់មនុស្ស និងដោះស្រាយបញ្ហាហើយ ការងារទាំងនេះផ្តល់អត្ថប្រយោជន៍ជាច្រើនដូចជា ផ្តល់បទពិសោធន៍ និងបើកគំនិតដល់អ្នកធ្វើ ។
ដូច្នេះប្រសិនបើអ្នកជាមនុស្សចូលចិត្តធ្វើការសប្បុរសធម៌ និងចង់សន្សំបទពិសោធន៍នោះ អ្នកអាចចែករំលែកពេលទំនេរ និងធ្វើការងារស្ម័គ្រចិត្តទាំងនេះបាន៕ កែសម្រួលដោយ ៖ សុឃាក់
ចែករំលែកព័តមាននេះ