ខេត្តព្រៃវែង ៖ សំឡេងគ្រាប់កាំភ្លើងផ្ទុះឡើងបន្តបន្ទាប់គ្នារហូតដល់ទៅ27គ្រាប់ ខណៈពេលកម្លាំងសមត្ថកិច្ចចេញប្រតិបត្តិការបង្ក្រាបជនជាតិវៀតណាម1ក្រុមកំពុងធ្វើសកម្មភាពអូសទូកកាវភ្ជាប់ដុំឆក់ត្រជាក់នៅក្នុងទន្លេមេគង្គក្រោម ស្ថិតក្នុងភូមិសាស្ត្រស្រុកពាមជរ ខេត្តព្រៃវែង កាលពីម៉ោង11យប់ ថ្ងៃទី28 ខែមិថុនា ឆ្នាំ២០១៩។
ប្រតិបត្តិការបង្ក្រាបបទល្មើសនេសាទក្នុងដងទន្លេមេគង្គនេះធ្វើឡើងដោយកម្លាំងប៉ូលិសប្រឆាំងបទល្មើសសេដ្ឋកិច្ចខេត្ត សហការជាមួយកម្លាំងអគ្គនាយកដ្ឋានក្រសួងមហាផ្ទៃ និងកម្លាំងនគរបាលប៉ុស្តិ៍រដ្ឋបាលឃុំស្វាយភ្លោះ បន្ទាប់ពីមានពាក្យបណ្តឹងរបស់ពលរដ្ឋជាបន្តបន្ទាប់ប្តឹងថា មានទូកកាវជាច្រើនគ្រឿងរបស់ជនជាតិវៀតណាមចេញធ្វើអូសកាវភ្ជាប់ដុំឆក់ត្រជាក់នៅក្នុងទន្លេស្ទើររៀងរាល់យប់ បណ្តាលឱ្យទាក់ដាច់សន្ទូច មងរបស់ពួកគាត់អស់ជាច្រើនដៃ និងធ្វើឱ្យប៉ះពាល់ដល់មុខរបរនេសាទជាលក្ខណៈគ្រួសាររបស់ពួកគាត់ផងដែរ។
លោក គឹម សារួត ប្រធានការិយាល័យប្រឆាំងបទល្មើសសេដ្ឋកិច្ចខេត្តឱ្យដឹងថា បន្ទាប់ពីទទួលពាក្យបណ្តឹងពីប្រជាពលរដ្ឋ ទើបលោកស្នងការខេត្តបញ្ជាឱ្យកម្លាំងប៉ូលិសសេដ្ឋកិច្ចខេត្តចេញប្រតិបត្តិការ ដាក់កម្លាំងតាមឃ្លាំមើលរហូតឈានដល់ការចុះបង្ក្រាបបទល្មើសជាក់ស្តែងតែម្តង ដោយប្រើកម្លាំងជាង10នាក់ និងទូកអូរប៊័រ2គ្រឿង។
លោកបន្តថា ខណៈពេលចុះបង្ក្រាបនោះ កម្លាំងសមត្ថកិច្ចប្រទះឃើញទូកនេសាទខុសច្បាប់ជាច្រើនគ្រឿង ប៉ុន្តែពេលឃើញសមត្ថកិច្ច ក្រុមជនល្មើសទាំងនោះព្យាយាមតដៃជាមួយសមត្ថកិច្ច ដោយបើកទូកបំបុកអូរប៊័រសមត្ថកិច្ច និងប្រើកាំបិត ពូថៅបំរ៉ុងកាប់សមត្ថកិច្ចទៀត ទើបសមត្ថកិច្ចប្រើសិទ្ធិការពារខ្លួនដោយបាញ់គំរាមចំនួន27គ្រាប់ បណ្តាលឱ្យត្រូវជនល្មើសម្នាក់ឈ្មោះង្វៀង យ៉ាំងអ៊ុក ត្រូវត្រង់ជើងស្តាំបៀមគ្រាប់ជាប់ហ្នឹងជើង ហើយត្រូវសមត្ថកិច្ចបញ្ជូទៅសង្គ្រោះភ្លាមៗនៅមន្ទីរពេទ្យខេត្តព្រៃវែង និងចាប់ជនល្មើសជាជនជាតិវៀតណាម5នាក់ទៀត រួមនឹងទូកប្រព្រឹត្តបទល្មើសចំនួន3គ្រឿង។
សមត្ថកិច្បញ្ជាក់ប្រាប់ថា ក្រុមជនជាតិវៀតណាមទាំងនោះ មានចរិកកាចសាហាវណាស់ មិនខ្លាចញញើតសមត្ថកិច្ចឡើយ បើត្រឹមសមត្ថកិច្ចនៅថ្នាក់ឃុំ ឬស្រុកនោះ ហើយកាលពីជាងកន្លះឆ្នាំមុនក្រុមជនល្មើសទាំងនេះធ្លាប់បើកទូកបំបុកទូកសមត្ថកិច្ច បណ្តាលឱ្យមន្ត្រីជលផលម្នាក់ស្លាប់បាត់បង់ជីវិត ហើយមកដល់ពេលនេះនៅចាប់ជនល្មើសមិនទាន់បាននៅឡើយទេ។
បច្ចុប្បន្ននេះ ទូកប្រព្រឹត្តិបទល្មើសទាំង3គ្រឿងខាងលើត្រូវបានរក្សាទុកនៅប៉ុស្តិ៍រដ្ឋបាលឃុំស្វាយភ្លោះ ហើយជនល្មើសដែលរងរបួសកំពុងសម្រាកព្យាបាលនៅមន្ទីរពេទ្យខេត្ត ចំណែកជនល្មើស5នាក់ផ្សេងទៀត សមត្ថកិច្ចបានប្រគល់ទៅឱ្យមន្ត្រីជំនាញជលផល ដើម្បីចាត់ការបន្តទៅតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ