យោងតាមការសិក្សាថ្មីមួយចុះផ្សាយក្នុង ព្រឹត្តិប័ត្រ The Journal of Sexual Medicine បានរកឃើញថា ការចុះទម្ងន់អាចជួយឱ្យសុខភាពផ្លូវភេទបុរសធាត់ដុះពោះកំប៉ោង កើតជំងឺទឹកនោមផ្អែមប្រភេទ២បានល្អប្រសើរ ។
អំឡុងការពិសោធ ក្រុមអ្នកស្រាវជ្រាវអូស្ត្រាលីបានឱ្យបុរសធាត់ដុះពោះកើតជំងឺទឹកនោមផ្អែម៣១នាក់ ទទួលអាហារដែលមានកាឡូរីទាប(មានខ្លាញ់តិច) និងអាហារមានប្រូតេអុីនខ្ពស់ ។ នេះមានន័យថា ពួកគេត្រូវបានកាត់បន្ថយការទទួលទានកាឡូរីដល់៦០០ក្នុង១ថ្ងៃ។ អ្នកដែលចុះទម្ងន់៥ភាគរយគឺមានភាពងាយស្រួលដល់អវយវៈភេទឆាប់ឡើងរឹងព្រមទាំងបានជួយសម្រួលចំណង់ផ្លូវភេទក្នុងរយៈពេល៨សប្តាហ៍ ហើយភាពប្រសើរឡើងវិញនេះអាចនឹងបន្តដល់១២ខែ ។
លោកហ្គារី វីតធ័រមកពីសាកលវិទ្យាល័យUniversity of Adelaideបានថ្លែងថា៖«ការរកឃើញរបស់យើងគឺប្រកបដោយភាពជាក់លាក់ដ្បិតមានភស្តុតាងដែលបានបញ្ជាក់ថា វាមិនត្រឹមតែធ្វើឱ្យលិង្គឆាប់ងើបនោះទេ ប៉ុន្តែថែមទាំងបានជួយធ្វើឱ្យល្អប្រសើរដល់មុខងារបំពង់បង្ហូរនោមទៀតផង»។
សូមរំលឹកថា ការរកឃើញលើកមុនបានបង្ហាញថា ការផ្លាស់ប្តូរបែបបទរស់នៅក៏អាចជួយបង្កើនសមត្ថភាពផ្លូវភេទបានដែរ ៕
ចែករំលែកព័តមាននេះ