រាជធានីភ្នំពេញ ៖ ទោះជាយ៉ាងណា សាលក្រមនឹងសម្រេចទោសលើជនជាប់ចោទក្លែងឯកសារ និងហត្ថ លេខាក្លែងរបស់នាយករដ្ឋមន្ត្រី ឆបោអតីតរដ្ឋមន្ត្រីក្រសួងវប្បធម៌នេះ នៅថ្ងៃទី៤ ខែកក្កដា ខាងមុខ ។ គួរ បញ្ជាក់ថា សាលាដំបូងរាជធានីភ្នំពេញ កាលពីព្រឹកថ្ងៃទី២៦ មិថុនា បានលើកយកសំណុំរឿងក្លែងហត្ថ លេខាសម្ដេចតេជោនាយករដ្ឋមន្ត្រី ឆបោកអតីតរដ្ឋមន្ត្រីក្រសួងវប្បធម៌ ក្នុងទឹកប្រាក់ចំនួន២៥មុឺនដុល្លារ
អាមេរិក មកបើកសវនាការជំនុំជម្រះទោស ។
ជនជាប់ចោទឈ្មោះ ឯម អេង ភេទប្រុស អាយុ៥២ឆ្នាំ ត្រូវចោទពីបទក្លែងលិខិតសាធារណៈ និងប្រើ ប្រាស់លិខិតសាធារណៈក្លែង តាមមាត្រា៦២៦នៃក្រម ព្រហ្មទណ្ប្រព្រឹត្ត កាលពីថ្ងៃទី២៧ ខែធ្នូ ឆ្នាំ២០១៧ នៅរាជធានីភ្នំពេញ ។
គួរបញ្ជាក់ទៀតថា អង្គហេតុនៃរឿងក្ដីនេះបានកើតឡើងនៅថ្ងៃទីឹ២៧ ខែធ្នូ ឆ្នាំ២០១៧ ។ ដើមចមផ្ដើមចេញពីព្រះអង្គម្ចាស់ សុីសុវត្ថិ ប៉ាណារ៉ាសេរីវុឌ្ឍ អតីតរដ្ឋមន្ត្រីក្រសួងវប្បធម៌ ដែលបានចូលនិវត្តន៍ទៅហើយនោះ លោកចង់បានដី និងផ្ទះមួយកន្លែងនៅក្បែរព្រះបរមរាជវាំង សម្រាប់រស់នៅផ្ទាល់ខ្លួន តែមិនដឹងធ្វើដូចម្ដេចដើម្បីសុំការយល់ព្រមពីសម្ដេចតេជោ ហ៊ុន សែន នាយករដ្ឋមន្ត្រី ។
លុះក្រោយមក ព្រះអង្គម្ចាស់ សុីសុវត្ថិ ប៉ាណារ៉ាសេរីវុឌ្ឍ បានជួបទាក់ទងជាមួយឈ្មោះ ឯម អេង (ជនជាប់ចោទ) ពេលនោះជនជាប់ចោទក៏បានធានាស្វែងរកលិខិត និងហត្ថលេខាបញ្ជាក់ពីសម្ដេចតេជោ ដើម្បីរកដីសមរម្យមួយកន្លែងនោះ ប៉ុន្តែត្រូវចំណាយលុយកាក់អស់ប្រមាណ២៥មុឺនដុល្លារអាមេរិក ។ រីឯព្រះអង្គម្ចាស់ សុីសុវត្ថិ ប៉ាណារ៉ាសេរីវុឌ្ឍ ក៏បានយល់ព្រមប្រគល់ប្រាក់ចំនួន២៥មុឺនដុល្លារ ឲ្យទៅជនជាប់ចោទ ដើម្បីធ្វើកិច្ចការនោះ ។
ក្រោយមក ជនជាប់ចោទក៏បានយកលិខិតស្នើសុំ ដែលមានហត្ថលេខាបញ្ជាក់របស់សម្ដេចតេជោ ហ៊ុន សែន ទៅប្រគល់ឲ្យព្រះអង្គម្ចាស់ សុីសុវត្ថិ ប៉ាណារ៉ាសេរីវុឌ្ឍ ប៉ុន្តែលិខិតនោះអាជ្ញាធរមិនទទួលស្គាល់ទេ ព្រោះជាលិខិត និងហត្ថលេខាក្លែងក្លាយ ។ ដោយពិនិត្យឃើញថា ឯកសារដែលជនជាប់ចោទប្រគល់ឲ្យនោះជាឯកសារក្លែងព្រះអង្គម្ចាស់ សុីសុវត្ថិ ប៉ាណារ៉ាសេរីវុឌ្ឍ ក៏បានដាក់ពាក្យបណ្ដឹងទៅក្រសួងមហាផ្ទៃ ដើម្បីឲ្យនគរបាលព្រហ្មទណ្ឌ បើកការស៊ើបអង្កេតនិងស្រាវជ្រាវរកឃើញការពិត ។
ជាចុងក្រោយ លិខិតនោះគឺជាលិខិតដែលចុះហត្ថលេខាក្លែងក្លាយមែន ហើយសមត្ថកិច្ចក៏បានចាប់ខ្លួនជនជាប់ចោទឈ្មោះ ឯម អេងបញ្ជូនទៅសាលាដំបូងរាជធានីភ្នំពេញ ទើបមានការឃុំខ្លួនជនជាប់ចោទចាប់ពីពេលនោះមក ។
ចែករំលែកព័តមាននេះ