រាជធានីភ្នំពេញ ៖ អតីតប្រធានគណបក្សសង្គ្រោះជាតិលោកកឹម សុខា ដែលកំពុងស្ថិតជាប់នៅក្នុងផ្ទះមិនអាចចេញទៅណាបាននោះក៏បានអះអាងថា លោកមិនស្តាយក្រោយក្នុងការធ្វើនយោបាយឡើយ ហើយនៅតែរក្សាជំហរក្នុងការផ្សះផ្សារជាតិ ការលើកឡើងរបស់អតីតមេបក្សប្រឆាំងនេះ ស្របពេលដែលខួបកំណើតរបស់ខ្លួនចូលវ័យ៦៧ឆ្នាំ នៅថ្ងៃទី២៧…
រាជធានីភ្នំពេញ ៖ អតីតប្រធានគណបក្សសង្គ្រោះជាតិលោកកឹម សុខា ដែលកំពុងស្ថិតជាប់នៅក្នុងផ្ទះមិនអាចចេញទៅណាបាននោះក៏បានអះអាងថា លោកមិនស្តាយក្រោយក្នុងការធ្វើនយោបាយឡើយ ហើយនៅតែរក្សាជំហរក្នុងការផ្សះផ្សារជាតិ ការលើកឡើងរបស់អតីតមេបក្សប្រឆាំងនេះ ស្របពេលដែលខួបកំណើតរបស់ខ្លួនចូលវ័យ៦៧ឆ្នាំ នៅថ្ងៃទី២៧ មិថុនានេះ ។
លោកកឹម សុខា បានសរសេរលើបណ្តាញសង្គមយ៉ាងដូច្នេះថា ៖ «ទឹកចិត្ត និងសេចក្តីនឹករឮករបស់ជនរួមជាតិបានផ្តល់ដល់រូបខ្ញុំ នូវកម្លាំងចិត្តដែលជាថាមពលជម្រុញឲ្យរូបខ្ញុំបន្តនូវស្មារតីសេ្នហាជាតិ បើទោះជារូបកាយខ្ញុំត្រូវបានបាត់បង់សេរីភាពអស់ជិត២ឆ្នាំមកហើយ» ។ លោកគូសបញ្ជាក់ថា ៖«មិនមានអ្វីឡើយដែលអាចរារាំងមនោសញ្ចេតនារបស់ខ្ញុំ ដែលមានចំពោះប្រជាជាតិមួយនេះ ។ ទោះបីខ្ញុំមិនអាចជួបជុំប្រជាពលរដ្ឋដូចកាលពីមុន ទោះបីខ្ញុំមិនអាចស្តាប់ឮ ដោយផ្ទាល់នូវទុក្ខកង្វល់របស់បងប្អូន ទោះបីមានឧបសគ្គយ៉ាងណា បើដរាបណាព្រះអាទិត្យនៅតែរះ សូមប្រជាជាតិខ្មែរជឿចុះថា ខ្ញុំកឹម សុខា នៅតែភ្ញាក់ឡើងទន្ទឹងរង់ចាំថ្ងៃដែលបានជួបជុំ និងបម្រើជាតិខ្មែរតទៅទៀត» ។
ជាមួយគ្នានោះដែរលោកកឹម សុខា ក៏បានលើកឡើងថា« មិនថា រងទុក្ខ ឬការធ្វើបាបតាមរូបភាពណា វាគ្មានទេពាក្យថា ស្តាយក្រោយសម្រាប់កឹម សុខា ដែលបានបូជាជូនជាតិប្រជាព លរដ្ឋ ដើម្បីលទ្ធិប្រជាធិបតេយ្យ សិទ្ធិសេរីភាព អធិបតេយ្យភាព និងការផ្សះផ្សាជាតិ» ។ លោកក៏បានបង្ហាញអារម្មណ៍យ៉ាងដូច្នេះថា សេចក្តីប្រាថ្នាសម្រាប់ខ្ញុំព្រះករុណា ខ្ញុំក្នុងឱកាសថ្ងៃខួបកំណើតនេះ គឺសេចក្តីសុខ សន្តិភាព សិទ្ធិសេរីភាព វឌ្ឃនភាព និងយុត្តិធម៌សម្រាប់ប្រជារដ្ឋខ្មែរគ្រប់ស្រទាប់វណ្ណៈ ។
សូមជម្រាបថា លោកកឹម សុខា ត្រូវសមត្ថកិច្ចឃាត់ខ្លួនកាលពីនៅម៉ោងជាង១២រំលងអធ្រាត្រចូលថ្ងៃទី៣ កញ្ញា ឆ្នាំ២០១៧ បើគិតមកដល់ពេលជាង២ឆ្នាំហើយ លោកមិនមានសេរីភាពក្នុងការជួបជុំសកម្មជននោះទេ ៕ កែសម្រួលដោយ ៖ សុឃាក់
ចែករំលែកព័តមាននេះ