ខេត្តសៀមរាប ៖ សមត្ថកិច្ចមូលដ្ឋានស្រុកក្រឡាញ់បានប្រាប់ឱ្យដឹងនៅរសៀលថ្ងៃទី២៦ ខែមិថុនា ឆ្នាំ២០១៩ នេះថា មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តមួយគ្រឿង ពាក់ស្លាកលេខ ខ.ម បានបើកបោះពួយក្នុងល្បឿនលឿន…
ខេត្តសៀមរាប ៖ សមត្ថកិច្ចមូលដ្ឋានស្រុកក្រឡាញ់បានប្រាប់ឱ្យដឹងនៅរសៀលថ្ងៃទី២៦ ខែមិថុនា ឆ្នាំ២០១៩ នេះថា មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តមួយគ្រឿង ពាក់ស្លាកលេខ ខ.ម បានបើកបោះពួយក្នុងល្បឿនលឿន ជ្រុលទៅបុកម៉ូតូមួយគ្រឿងដែលជិះ២នាក់ប្តីប្រពន្ធ បណ្តាលឱ្យបុរសជាប្តីស្លាប់ភ្លាមៗនៅនឹងកន្លែងកើតហេតុ ចំណែកប្រពន្ធបានរងរបួសធ្ងន់។ រីឯអ្នកបើកបររថយន្តត្រូវបាននគរបាលឃាត់ខ្លួនយកទៅអធិការដ្ឋានស្រុកក្រឡាញ់ដើម្បីសួរនាំបន្តទៅតាមនីតិវិធី ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីរសៀលថ្ងៃទី២៤ ខែមិថុនា ឆ្នាំ២០១៩ ស្ថិតនៅតាមបណ្តោយផ្លូវជាតិលេខ៦ ត្រង់ចំណុចមុខផ្លូវចូលភូមិទម្លាប់ ស្ថិតនៅក្នុងភូមិគំរូ ឃុំស្រណាល ស្រុកក្រឡាញ់ ខេត្តសៀមរាប។
តាមការបញ្ជាក់ពីលោកវរសេនីយ៍ឯក ជី បេងជន អធិការនគរបាលស្រុកក្រឡាញ់ បានឱ្យដឹង ថា ភាគីខាងរថយន្តមួយគ្រឿងម៉ាកណាវ៉ារ៉ា ពណ៌ត្រេអុី ពាក់ស្លាកលេខ ខេមរភូមិន្ទ ០២.២-១០៣៧ បើកបរដោយ ឈ្មោះ លី ចិន្តា ភេទប្រុស អាយុ៣៦ឆ្នាំ ជាមន្ត្រីយោធា រស់នៅភូមិមួយ ឃុំព្រះពន្លា ស្រុកសិរីសោភ័ណ ខេត្តបន្ទាយមានជ័យ ត្រូវសមត្ថកិច្ចចាប់ឃាត់ខ្លួន ។
ចំណែកភាគីខាងម៉ូតូមួយគ្រឿងជិះគ្នា២នាក់ប្តីប្រពន្ធ ម៉ាកហុងដាឌ្រីម ពណ៌ខ្មៅ ពាក់ស្លាកលេខ សៀមរាប ១A-៦៥៨៩ បើកបរដោយបុរសជាប្តីឈ្មោះ ឆប សាវ៉ត អាយុ៤៩ឆ្នាំ បានស្លាប់ និងអ្នករួមដំណើរជាប្រពន្ធឈ្មោះ ក្លាយ ប៉យ អាយុ៤៨ឆ្នាំ បានរងរបួសធ្ងន់ ។ ជនរងគ្រោះទាំង២នាក់ប្តីប្រពន្ធ រស់នៅភូមិគោកចាស់ ឃុំស្រណាល ស្រុកក្រឡាញ់ ខេត្តសៀមរាប ។
លោកអធិការនគរបាលស្រុកក្រឡាញ់បានឱ្យដឹងថា មុនពេលកើតហេតុ គេឃើញរថយន្តមួយគ្រឿង ពាក់ស្លាកលេខ ខ.ម បើកបរដោយបុរសជាមន្ត្រីយោធាម្នាក់ ធ្វើដំណើរក្នុងទិសដៅពីកើតទៅលិច ក្នុងល្បឿនយ៉ាងលឿន លំមកដល់ចំណុចកើតហេតុ បានបុកជាមួយម៉ូតូមួយគ្រឿងជិះ២នាក់ប្តីប្រពន្ធ កំពុងបើកបរក្នុងទិសដៅពីលិចទៅកើត បណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុ ចំណែកប្រពន្ធបានរងរបួសធ្ងន់ រីឯម៉ូតូរងការខូចខាតធ្ងន់ និងរថយន្តរងការខូចខាតស្រាល។
ក្រោយកើតហេតុ សមត្ថកិច្ចបានចុះមកដល់កន្លែងកើតហេតុ ព្រមទាំងបានឃាត់ខ្លួនអ្នកបើកបររថយន្ត និងរថយន្ត នាំយកទៅធ្វើការសាកសួរនៅអធិការនគរបាលស្រុកក្រឡាញ់ ដើម្បីបញ្ជូនបន្តទៅការិយាល័យនគរបាលចរាចរណ៍ផ្លូវគោកនៃស្នងការនគរបាលខេត្តចាត់ការតាមនីតិវិធី ។ ចំណែកស្ត្រីជាប្រពន្ធដែលរងរបួសធ្ងន់ត្រូវបានគេបញ្ជូនទៅសង្គ្រោះនៅមន្ទីរពេទ្យ រីឯសពបុរសជាប្តីត្រូវបានសមត្ថកិច្ចប្រគល់ជូនក្រុមគ្រួសារសាច់ញាតិដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ