ខេត្តកំពង់ធំ ៖ អនុប្រធានទី១ រដ្ឋសភាបានប្រគល់អគារសិក្សា១ខ្នង និង៦បន្ទប់ តាមសំណើររបស់អ្នកគ្រូ លោកគ្រូ និងមាតា បិតាសិស្ស ក្នុងឃុំចំនួន៤ ស្ថិតក្នុងខេត្តកំពង់ធំ ។ លោលបណ្ឌិត ងួន ញ៉ិល អនុប្រធានទី១រដ្ឋសភានៃព្រះរាជាណាចក្រកម្ពុជា និងជាប្រធានក្រុមការងារគណៈបក្សថ្នាក់កណ្តាលចុះជួយខេត្តកំពង់ធំ កាលពីថ្ងៃទី២៥ ខែមិថុនានេះ បានអញ្ជើញប្រគល់អគារសិក្សាសម្រាប់ប្រើប្រាស់ជាបណ្តោះអាសន្ន ។
ដោយប្រកាសសាងសង់អគារសិក្សា១ខ្នង ៦បន្ទប់ បន្ថែមទៀតជូនវិទ្យាល័យ ហ៊ុន សែន ក្រវ៉ា ស្ថិតក្នុងឃុំក្រវ៉ា ស្រុកបារាយណ៍ ខេត្តកំពង់ធំ គឺជាការចូលរួមជាមួយសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ។ លោកអនុប្រធានទី១រដ្ឋសភាបានលើកឡើងក្នុងពិធីសំណេះសំណាលជាមួយលោកគ្រូ អ្នកគ្រូ មន្ត្រីរាជការ និងប្រជាពលរដ្ឋ នាឱកាសនោះ បានលើកឡើងពីអនុសាសន៍របស់សម្តេចតេជោ ហ៊ុន សែន អំពីការអភិវឌ្ឍន៍វិស័យអប់រំ និងប្រវត្តិនៃការកកើតវិទ្យាល័យហ៊ុន សែន ក្រវ៉ា ដោយមានការផ្តួចផ្តើមគំនិតរបស់លោកផ្ទាល់ និងជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។
លោកបញ្ជាក់ថា«ថ្ងៃនេះ ឆ្លើយតបតាមសំណូមពរស្នើសុំពីមាតាបិតាសិស្ស លោកគ្រូ-អ្នកគ្រូ ព្រមទាំងថ្នាក់ ថ្នាក់ដឹកនាំឃុំទាំង៤ គឺឃុំក្រវ៉ា ឃុំគគីរធំ ឃុំចើងដើង និងឃុំបាក់ស្នា ចំណុះស្រុកបារាយណ៍ខេត្តកំពង់ធំ ឯកឧត្តមបណ្ឌិត ងួន ញ៉ិល បានប្រគល់ជូនអគារសិក្សា១ខ្នង ៦បន្ទប់ ដែលទើបនឹងសាងសង់រួចរាល់កាលពីថ្ងៃទី១៦ ខែមិថុនានេះ ប្រកាសផ្តល់ជូន និងចាប់ដំណើរការសាងសង់អគារសិក្សា១ខ្នង ៦បន្ទប់បន្ថែមទៀត និងធ្វើការជួសជុលផ្នែកខ្លះនៃអគារដែលមានកន្លងមកតាមសំណូមពររបស់លោកនាយកសាលាចាប់ពីថ្ងៃនេះ ដើម្បីឆ្លើយតបទៅនឹងតម្រូវការសិស្ស នាពេលបច្ចុប្បន្នមានចំនួន៥០០នាក់ ដែលខ្វះបន្ទប់រៀនក្នុងចំនួនសិស្សានុសិស្សសរុបដែលបានកើនឡើងចំនួន១៥៣០នាក់» ។
សូមជម្រាបថា អាជ្ញាធរខេត្តកំពង់ធំ ស្រុកបារាយណ៍៤ឃុំខាងលើមាតាបិតាសិស្ស លោកគ្រូ-អ្នកគ្រូ ក្មួយៗសិស្សានុសិស្ស មានសេចក្តីត្រេកអរជាអនេក និងថ្លែងអំណរគុណយ៉ាងជ្រាលជ្រៅបំផុតជូនចំពោះលោកបណ្ឌិត ងួន ញ៉ិល ដែលបានឆ្លើយតបទាន់ពេលវេលា ៕ កែសម្រួលដោយ ៖ សុឃាក់
ចែករំលែកព័តមាននេះ