រាជធានីភ្នំពេញ ៖ ប្រជាពលរដ្ឋជាច្រើនគ្រួសារ បានធ្វើការចោទប្រកាន់លោកឡូយ សុផាត សមាជិករដ្ឋសភាជាតិ និងជាអ្នកតំណាងរាស្ត្រមណ្ឌលស្ទឹងត្រែង រួមទាំងប្រពន្ធ-កូន បានបញ្ជាឱ្យកម្មករនាំគ្នាបោះបង្គោលបិទផ្លូវរួម ដែលពួកគាត់ធ្លាប់ធ្វើដំណើរតាំងពីយូរយាណាស់មកហើយនោះ។ មិនត្រឹមតែបិទផ្លូវនោះទេ លោកតំណាងរាស្ត្ររូបនោះ ក៏បានប្តឹងអាជ្ញាធរខណ្ឌជ្រោយចង្វារថា បានរំលោភយកដីរបស់គាត់ទៅវិញ ។
ផ្លូវដែលលោកតំណាងរាស្ត្របិទរំលោភយកនោះ ស្ថិតក្នុងភូមិក្តីចាស់ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ។ ផ្លូវនេះ ត្រូវបានប្រជាពលរដ្ឋអោយដឹងថា មានប្រវែងប្រមាណ១៧០០ម៉ែត្រ និងទទឹង១៤ម៉ែត្រ ដែលអាជ្ញាធរគ្រោងនឹងស្ថាបនានៅពេលឆាបនេះ ។ ទន្ទឹមនោះ លោកឃ្លាំង ហួត អភិបាលខណ្ឌជ្រោយចង្វារ ក៏បានបញ្ជាអោយអាជ្ញាធរ សង្កាត់ ចុះទៅដកបង្គោលនោះ ចេញដើម្បីបើកផ្លូវទុកជាផលប្រយោជន៍សាធារណៈ ។
ការធ្វើរបងបិទផ្លូវនេះ ត្រូវគេដឹងថា បន្ទាប់ពីអាជ្ញាធរខណ្ឌជ្រោយចង្វារ យកគ្រឿងចក្រទៅស្ថាបនាផ្លូវ ជួនប្រជាពលរដ្ឋទៅតាមការស្នើសុំតែរាំងដោយលោកតំណាងរាស្ត្រទៅវិញ ។ តាមប្រជាពលរដ្ឋបានអោយដឹងថា លោកឡូយ សុផាត អ្នកតំណាងរាស្ត្រមានដីនៅទីនោះចំនួន៤៥ហិកតា។ រយៈពេលប្រមាណ៤ទៅ៥ខែមកហើយ ត្រូវបាន លោកតំណាងរាស្ត្រនិងក្រុមគ្រួសារបានបញ្ជាអោយកម្មករ យកបង្គោលថ្មបេតុងជាច្រើនដើម មកដាំបិទផ្លូវរួមតែម្តង ។
តាមប្រជាពលរដ្ឋបានអោយដឹងទៀតថា ផ្លូវនោះ ជាផ្លូវរួម ដែលមានជាយូរមកហើយ សម្រាប់ប្រជាពលរដ្ឋចំនួន ៨គ្រួសារ ។ក្រៅពីនោះផ្លូវនេះសម្រើប្រជាពលរដ្ឋ ដែលធ្វើដំណើរឆ្លងកាត់ មកពីឃុំសំបួរមាស និងឃុំព្រែកអញ្ចាញស្រុកមុខ កំពូលផងដែរ។
តាមព័ត៌មានបានអោយដឹងទៀតថា បន្ទាប់ពីបិតផ្លូវ អាជ្ញាធរបានជូនដំណឹងដល់លោកតំណាងរាស្ត្ររូបនោះចូលមកដោះស្រាយ និងរុះរើបើកផ្លូវ តែលោកឡូយ សុផាត មិនបានចូលខ្លួន មកដោះស្រាយបង្ហាញឯកសារនោះទេ មិនតែប៉ុណ្ណោះ លោកក៏បានប្តឹងអាជ្ញាធរ សង្កាត់ ខណ្ឌ ទៅក្រសួងមហាចោទថា រំលោភយកដីរបស់គាត់ទៀត ។
នៅក្នុងកិច្ចប្រជុំគណះបញ្ជាការឯកភាពខណ្ឌជ្រោយចង្វារកាលពីព្រឹកថ្ងៃទី២៤ ខែមិថុនា លោក ឃ្លាំង ហួត អភិបាលខណ្ឌ បានលើកឡើងថា ផ្លូវនេះ ជាផ្លូវ រួម ដែលមានតាំងពី ដើមមកម្លេះ បែរជាលោកឡូយ សុផាតអ្នកតំណាងរាស្ត្រមណ្ឌលស្ទឹងត្រែងធ្វើរបងបិទផ្លូវ ទៅវិញ មិនត្រឹមតែប៉ុណ្ណោះ ក៍បានប្តឹង ទៅសាលារាជធានីភ្នំពេញចោទថា លោក ជាអ្នករំលោភយកដីរបស់គាត់ទៅវិញ។
លោកឃ្លាំង ហួត បានបញ្ជាក់យ៉ាងម៉ឺងម៉ាត់ថា គាត់គ្មានដីនៅទីនោះមួយដុំទេ គាត់ធ្វើផ្លូវនេះគឺ ដើម្បីប្រយោជន៍របស់ប្រជាពលរដ្ឋ ដែលបានស្នើរសុំ។ លោកអភិបាលបញ្ជាទៅសង្កាត់ ឱ្យមានវិធានការណ៍ ចុះទៅដកបង្គោលនោះចេញ ដើម្បីបើកផ្លូវ ជួនប្រជាពលរដ្ឋ។
ទោះបីជាយ៉ាងណា កោះសន្តិភាពពុំទទួលបានការបំភ្លឺណាមួយ ពីលោកឡូយ សុផាត ឡើយទេ ។ (សម្រួលដោយ៖ ស្រីណា)
ចែករំលែកព័តមាននេះ