រាជធានីភ្នំពេញ ៖ បច្ចុប្បន្ននេះការវិនិយោគរបស់ចិនមកកាន់ប្រទេសកម្ពុជាប្រៀបបាននឹងទឹកបាក់ទំនប់ ក្នុងនោះជនជាតិបានបោះទុនវិនិយោគយ៉ាងច្រើនទៅលើគម្រោងនានា ក្នុងប្រទេសកម្ពុជា រួមទាំងគម្រោងវិនិយោគសំណង់ អចលទ្រព្យ និងវិស័យផ្សេងៗទៀត ដែលធ្វើអោយចិនកំពុងឈរលំដាប់ទី១ ជាអ្នកវិនិយោគធំជាងគេនៅក្នុងប្រទេសកម្ពុជា…
រាជធានីភ្នំពេញ ៖ បច្ចុប្បន្ននេះការវិនិយោគរបស់ចិនមកកាន់ប្រទេសកម្ពុជាប្រៀបបាននឹងទឹកបាក់ទំនប់ ក្នុងនោះជនជាតិបានបោះទុនវិនិយោគយ៉ាងច្រើនទៅលើគម្រោងនានា ក្នុងប្រទេសកម្ពុជា រួមទាំងគម្រោងវិនិយោគសំណង់ អចលទ្រព្យ និងវិស័យផ្សេងៗទៀត ដែលធ្វើអោយចិនកំពុងឈរលំដាប់ទី១ ជាអ្នកវិនិយោគធំជាងគេនៅក្នុងប្រទេសកម្ពុជា ។ ក៏ប៉ុន្តែរាល់ការវិនិយោគរបស់ចិនក៏បាននាំមកនូវសម្ភារៈធាតុដើម ក៏ដូចជាកំលាំងពលកម្មចិនពីប្រទេសចិនចាក់ចូលទីផ្សារពលកម្មនៅកម្ពុជាផងដែរ ។ ដូច្នេះតើការវិនិយោគរបស់ចិននៅកម្ពុជា បានផ្ដល់អត្ថប្រយោជន៍អ្វីខ្លះដល់ប្រទេសនិងប្រជាជនកម្ពុជានោះ ?
បើតាមអ្នកគ្រឿងសំណង់ជាច្រើននៅក្នុងប្រទេសកម្ពុជា បានឲ្យដឹងស្រដៀងគ្នាថា បើក្រលេកមួយភ្លេត យើងឃើញថាវិស័យសំណង់នៅកម្ពុជា ពិតជាមានសកម្មភាពកើនឡើងខ្ពស់មែន ហើយក៏រំពឹងថាអ្នករកស៊ីវិស័យនៅកម្ពុជាប្រាកដជាទទួលបានកំណើនខ្ពស់ដែរ តែបើសិនជាចូលអោយជិតនិងតាមដានឲ្យបានស៊ីជម្រៅទើបដឹងច្បាស់ថា វាកើនតែសំណង់តែអ្នកលក់សំណង់មិនសូវមានកំណើនប៉ុន្មាននោះទេ ។
លោកង៉ែត ជូ ទីប្រឹក្សាសេដ្ឋកិច្ចនៃក្រុមហ៊ុន Emerging Markets Consulting (EMC) និងជាអ្នកជំនាញផ្នែកសេដ្ឋកិច្ចមួយរូបនៅកម្ពុជា បាននិយាយថា ដោយសារតែកម្ពុជាជាប្រទេសទីផ្សារសេរី ដូច្នេះហើយកម្ពុជាមិនអាចហាមឃាត់រាល់ការវិនិយោគឬនាំចូលសម្ភារៈពីប្រទេសចិនផ្គត់ផ្គង់ក្នុងស្រុកដែរ។
លោកបានបន្តថា «បើទោះបីជាយើងមិនយកសម្ភារៈពីចិន ក៏យើងនៅតែយកសម្ភារៈពីថៃ ឬវៀតណាមមកដដែល ដោយសារតែយើងមិនទាន់មានលទ្ធភាពផលិតសម្ភារៈសំណង់ទាំងនោះ ផ្គត់ផ្គង់បានគ្រប់គ្រាន់នៅឡើយ ។ សម្រាប់គម្រោងរបស់ចិន ដែលកំពុងអភិវឌ្ឍន៍នៅក្នុងប្រទេសកម្ពុជា ថ្វីត្បិតតែមិនបានយកសម្ភារៈក្នុងស្រុក ឬមិនបានទិញសម្ភារៈពីអាជីវករខ្មែរពិតមែន ហើយទៅនាំចូលពីប្រទេសចិន យើងជឿថាពួកគេនឹងត្រូវបង់ពន្ធនាំចូលរដ្ឋ ដូច្នេះមួយចំណែកក៏ទទួលបានប្រយោជន៍ពីនេះដែរ ។
យ៉ាងណាមិញយើងក៏ចង់ឱ្យអ្នកវិនិយោគទាំងនោះ យកសម្ភារៈសំណង់ទៅប្រើប្រាស់ពីអាជីវករខ្មែរដែរ ក៏ប៉ុន្តែដូចដែលបានដឹងហើយថា ទីផ្សារសេរីគេចង់យកពីណាក៏បានទិញពីអ្នកណាក៏បាន គឺមិនអាចបង្ខិតបង្ខំអោយពួកគេត្រូវតែយកទំនិញពីអាជីវករខ្មែរនោះទេ » ។
ដោយឡែកសម្រាប់កម្មករដែលបាននាំយកពីប្រទេសចិន មកធ្វើការនៅក្នុងការដ្ឋានសំណង់នានា ក្នុងប្រទេសកម្ពុជា ជាពិសេសនៅរាជធានីភ្នំពេញ នៅខេត្តមាត់សមុទ្រព្រះសីហនុជាដើម លោកង៉ែត ជូ ក៏បានបង្ហាញនូវមតិផ្ទាល់ថា ពួកគេគួរតែយកកម្មករក្នុងស្រុកដើម្បីបំពេញការងាររបស់ពួកគេ ដោយមិនគួរយកកម្មករពីប្រទេសចិនទាំងអស់ឡើយ តែសម្រាប់កម្មករជំនាញ គេអាចយកពីចិនមកបាន តែយ៉ាងណាក៏គួរតែបណ្ដុះបណ្ដាលកម្មករជំនាញទាំងនោះ ដល់ធនធានមនុស្សកម្ពុជាដែរ ហើយនៅពេលពួកគេទៅវិញ កម្មករជំនាញកម្ពុជានឹងមានកាន់តែច្រើន និងលែងត្រូវការកម្មករជំនាញពីបរទេសទៀតផងដែរ ។ បើធ្វើបែបនេះបានទើបការវិនិយោគរបស់ពួកគេហុចផលប្រយោជន៍ដល់កម្ពុជាពិតមែន ។
បើតាមប្រសាសន៍ប្រធានផ្នែកលក់គ្រឿងសំណងដ៏ធំមួយនៅកម្ពុជា តែសូមមិនបញ្ចេញឈ្មោះបានឲ្យដឹងថា វិស័យសំណង់នៅកម្ពុជា នាពេលនេះគឺបានកើនឡើងខ្ពស់ណាស់ ជាក់ស្ដែងនៅភ្នំពេញ និងខេត្តព្រះសីហនុ គេមើលឃើញថាមានសំណង់អគារខ្ពស់ៗជាច្រើនកំពុងសាងសង់និងចាប់ផ្ដើមសាងសង់ ក៏ប៉ុន្តែការលក់គ្រឿងសំណង់បើនិយាយថាកើនឡើង ក៏មិនប្រាកដថាឡើងខ្ពស់ប៉ុន្មានដែរ ពីព្រោះគម្រោងវិនិយោគសំណង់ទាំងនោះភាគច្រើនជាគម្រោងរបស់ចិន ។
លោកបានបន្តថា គម្រោងវិនិយោគរបស់ចិន មិនបានយកសម្ភារៈគ្រឿងសំណង់ដែលលក់ដោយអាជីវករខ្មែរទាំងអស់នោះទេ ពោលគឺគេមានក្រុមហ៊ុនចិនរបស់ពួកគេដើម្បីនាំចូលពីចិនមកផ្គត់ផ្គង់លើការសាងសង់សំណង់នៅកម្ពុជា និងមានក្រុមហ៊ុនចិនខ្លះក៏បើកក្រុមហ៊ុនផលិតគ្រឿងសំណង់នៅកម្ពុជាដោយផ្ទាល់ ហើយយកថវិកាទាំងនោះត្រលប់ទៅស្រុកចិនវិញ ទាំងនេះហើយដែលជាការខាតមួយសម្រាប់អ្នករកស៊ីលក់គ្រឿងសំណង់នៅក្នុងស្រុកខ្មេរ ។
ប្រភពដដែលបានបន្ថែមថា «បើសិនជាអ្នកអភិវឌ្ឍន៍សំណង់នៅកម្ពុជា ដែលជាជនចិនទាំងនោះមិនយកគ្រឿងសំណង់ពីចិនផ្ទាល់ ហើយងាកមកទិញសម្ភារៈសំណង់ពីក្រុមហ៊ុនវិនិយោគិនខ្មែរវិញ នឹងធ្វើអោយក្រុមហ៊ុនខ្មែរកាន់តែរីកចម្រើន ក្នុងពេលវិស័យសំណង់ស្ទុះងើបដូចបច្ចុប្បន្ននេះ » ។
គួរបញ្ជាក់ថា រយៈពេល៥ ខែ ដំបូននៃឆ្នាំ ២០១៩ ទុនវិនិយោគសំណង់មានចំនួនទឹកប្រាក់ប្រមាណជា ២,៨៩ ពាន់លានដុល្លារអាមេរិក ច្រើនជាងទុនវិនិយោគក្នុង៥ខែដំបូងនៃឆ្នាំ២០១៨ ដែលមានត្រឹម ជាង១,៧៧ពាន់លាន ដុល្លារអាមេរិក ៕ (កែសម្រួលដោយ ៖ បុប្ផា)
ចែករំលែកព័តមាននេះ