ការចិញ្ចឹមត្រីក្នុងស្រែពិតជាពិសេស ព្រោះអាចធ្វើឱ្យអ្នកទទួលបានផលពីរក្នុងពេលតែមួយ គឺមិនត្រឹម តែទទួលបានផលអង្ករនោះទេ ថែមទាំងបានត្រីយកមកធ្វើម្ហូបសម្រាប់គ្រួសារ និងអាចយកទៅលក់ បានទៀតផង ។ ប្រមាណ៦០ភាគរយនៃអាហារ សាច់ដែលប្រជាជនបរិភោគប្រចាំថ្ងៃនោះ…
ការចិញ្ចឹមត្រីក្នុងស្រែពិតជាពិសេស ព្រោះអាចធ្វើឱ្យអ្នកទទួលបានផលពីរក្នុងពេលតែមួយ គឺមិនត្រឹម តែទទួលបានផលអង្ករនោះទេ ថែមទាំងបានត្រីយកមកធ្វើម្ហូបសម្រាប់គ្រួសារ និងអាចយកទៅលក់ បានទៀតផង ។
ប្រមាណ៦០ភាគរយនៃអាហារ សាច់ដែលប្រជាជនបរិភោគប្រចាំថ្ងៃនោះ គឺសាច់ត្រីតែម្តង។ នេះបើយោងតាមគេហទំព័រក្រសួងកសិកម្ម រុក្ខាប្រមាញ់ និងនេសាទ ។
តើអ្នកដឹងទេថា ត្រីប្រភេទណាខ្លះដែលអាចចិញ្ចឹមក្នុងស្រែបាន? ត្រីដែលអាចចិញ្ចឹមក្នុងស្រែបាន គឺមានដូចជា ត្រីកាបសាមញ្ញ ត្រីទីឡាព្យា ត្រីកាបឥណ្ឌា ត្រីកន្ធរ និងត្រីអណ្តែងជាដើម។
យើងត្រូវចិញ្ចឹមត្រីក្នុងស្រែបែបណា? ខាងក្រោមនេះ នឹងប្រាប់អ្នកអំពីរបៀបចិញ្ចឹមត្រីក្នុងស្រែ ៖
១-ការរៀបចំស្រែកចិញ្ចឹមត្រី ៖ ដំបូងត្រូវជីកជម្រក ហើយជម្រកគឺជាជង្ហុក ឬទីដែលជ្រៅនៅក្នុងស្រែដែលអាចឱ្យត្រីរត់មកជ្រកពេលទឹកស្រែរាក់ ឬក្តៅពេក ហើយគេអាចប្រើជម្រកនេះសម្រាប់បង្ខាំងត្រីបណ្តោះអាសន្ននៅពេលប្រើថ្នាំសម្លាប់សត្វល្អិតក្នុងដំណាំស្រូវផងដែរ ។ ជម្រកអាចមានរាងច្រើនសណ្ឋានទៅតាមភូមិសាស្ត្រនៃដីស្រែរបស់អ្នក ឬតាមចំណង់ចំណូលចិត្តអ្នកចិញ្ចឹមក៏បាន ។
២-ការជ្រើសរើសពូជត្រី ៖ ប្រភេទត្រីដែលអាចចិញ្ចឹមក្នុងស្រែបាន គឺដូចការរៀបរាប់ខាងលើនេះ។ អាស្រ័យដោយការចិញ្ចឹមត្រីអណ្តែងមានរយៈពេលលើសពី៣ខែ ដូច្នេះគួរជ្រើសរើសពូជស្រូវធ្ងន់ មកធ្វើការដាំដុះ។ ដោយឡែកត្រីកាបសាមញ្ញ ទីឡាព្យា និងត្រីកាបឥណ្ឌាវិញ អាចធ្វើដាំដុះជាមួយពូជស្រូវកណ្តាលបាន ។
៣-ការលែងកូនត្រី ៖ យើងត្រូវដឹកជញ្ជូនកូនត្រីមកពេលព្រឹក និងលែងកូនត្រីចូលស្រែចិញ្ចឹមក្នុងចន្លោះពីម៉ោង៩ដល់១០ព្រឹក ។ កូនត្រីត្រូវដឹកដោយប្រើថង់ប្លាស្ទិច ពេលដឹកមកដល់ស្រែត្រូវយកថង់នោះត្រាំទឹកស្រែប្រមាណ១០ទៅ១៥នាទីសិន រួចស្រាយមាត់ថង់ឱ្យត្រីហែលចេញដោយសន្សឹមៗចូលស្រែតែម្តង ។
៤-ផ្តល់ចំណី ៖ ថ្វីដ្បិតតែត្រីអណ្តែងជាប្រភេទត្រីស៊ីសាច់ជាអាហារ តែយើងអាចយកកន្ទក់មកលាយនឹងសាច់បានដោយកន្ទក់២០% លាយត្រីហាល៤០% ឬលាយត្រីហាល៦០%ក៏បាន។ ពេលផ្តល់ចំណីត្រូវដាក់ក្នុងកញ្ច្រែងក្រាលស្បៃរួចជ្រមុជក្នុងទឹក ដើម្បីងាយតាមដានមើលការស៊ីចំណីរបស់វា។ ការផ្តល់ចំណិចនេះ គឺពេលព្រឹកចាប់ពីម៉ោង៩ដល់ម៉ោង១០ និងល្ងាចពីម៉ោង៣ទៅម៉ោង៥ ដោយផ្តល់១ថ្ងៃ១ដង ឬ២ដងក៏បាន តាមកំរិតប្រមាណ១០%នៃទម្ងន់ត្រីសរុប គឺទម្ងន់កូនត្រីប្រមាណ១០គីឡូនោះចំណីត្រូវផ្តល់១គីឡូក្នុង១ថ្ងៃ ព្រឹកកន្លះគីឡូ និងល្ងាចកន្លះគីឡូ ។
៥-ការប្រមូលផល ៖ បើប្រមូលផលគឺធ្វើឡើងនៅពេលស្រូវទុំល្អ ពេលនោះត្រីនៅប្រមូលផ្តុំគ្នាក្នុងជម្រក ហើយការប្រមូលផលនេះ ធ្វើដំណាលគ្នាជាមួយការច្រូកកាត់ផលស្រូវតែម្តង ។ ប្រសិនបើទំហំត្រីធំល្មមអាចយកមកហូបក៏បាន លក់ក៏បាន ប៉ុន្តែបើទំហំវាពុំទាន់សមស្របទេ គេអាចបន្តការបង្ខាំងចិញ្ចឹមក្នុងជម្រកជាបណ្តោះអាសន្នសិន។ ក្រោយពីស្ទូងបាន១០ទៅ១៥ថ្ងៃគេអាចបើកលែងត្រីឱ្យចេញពីជម្រកចូលក្នុងស្រែបាន ហើយចិញ្ចឹម និងការផ្តល់ចំណី ដូចការចិញ្ចឹមខាងលើអ៊ីចឹង៕ (កែសម្រួលដោយ ៖ បុប្ផា)
ចែករំលែកព័តមាននេះ