មុននេះបន្តិច តុលាការកាត់ទោសចំប៉ីខ្មៅដែលជេរប្រមាថពូជសាសន៍ខ្មែរហើយ
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២០ ខែមិថុនា ឆ្នាំ២០១៩ បានប្រកាសសាលក្រមផ្តន្ទាទោសលើជនជាប់ឈ្មោះ យិន ហេង ហៅ…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២០ ខែមិថុនា ឆ្នាំ២០១៩ បានប្រកាសសាលក្រមផ្តន្ទាទោសលើជនជាប់ឈ្មោះ យិន ហេង ហៅ ចំប៉ីខ្មៅ ដាក់ពន្ធនាគារកំណត់រយៈពេល២ឆ្នាំ ទោសអនុវត្តទោសត្រឹម១ឆ្នាំ ទោសសល់ប៉ុន្មានត្រូវព្យួរ និងពិន័យជាប្រាក់ចំនួន៣លានរៀល ។
ជនជាប់ចោទឈ្មោះ យិន ហេង ហៅចំប៉ីខ្មៅ នៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ ត្រូវបានតុលាការចោទប្រកាន់ពីបទញុះញង់អោយមានការរើសអើង និងបទជេរប្រមាថជាសាធារណៈ តាមមាត្រា៤៩៦ នៃក្រមព្រហ្មទ័ណ្ឌ ហើយចៅក្រមចេញដីកាស៊ើបសួរបានសម្រេចចេញដីកាឃុំខ្លួន នៅយប់ថ្ងៃទី០៦ កុម្ភៈ ២០១៩ ។ នៅក្នុងសវនាការជនជាប់ចោទបានសារភាពកំហុសថា ខ្លួនគេពិតជាបានជេរត្មះតិដៀល ដូចនៅក្នុងវីដេអូរឃ្លីបយ៉ាងដូច្នេះមែន ដោយសារខឹងសម្បា និងយុវជន៣នាក់ជិះម៉ូតូមកខោកក្បាលរបស់គេដោយមិនដឹងមូលហេតុ ។ ជាមួយ និងការសារភាពកំហុសជនត្រូវចោទក៏បានសូមអភ័យទោសសំណាក់ប្រជាពលរដ្ឋទូទាំងប្រទេស ចំពោះកំហុសឆ្គងដែលកើតឡើងនោះ ។
ដោយសារជនត្រូវចោទបានសារភាពកំហុស មិនមានឧបសគ្គស្មុគ្រស្មាញដល់នីតិវិធីតុលាការ ចៅក្រមជំនុំជំរះ លោក ម៉ៅ ស៊ីណា ក៏បានសម្រេចលើកពេលទៅប្រកាសសាលក្រមរឿងក្ដីនេះនៅថ្ងៃទី២០ មិថុនានេះ ។
បញ្ជាក់ ៖ យិន ហេង ហៅចំប៊ីខ្មៅត្រូវបាននគរបាលចាប់ខ្លួន កាលពីល្ងាចថ្ងៃទី០៥ ខែកុម្ភៈ ឆ្នាំ២០១៩នៅ ហាងកាហ្វេមួយកន្លែងក្នុងទឹកដីខណ្ឌដូនពេញ ហើយបានបញ្ជូនមកកាន់តុលាការនៅថ្ងៃទី ០៦កុម្ភៈ ។ ដើមចមដែលនាំឲ្យសមត្ថកិច្ចឃាត់ខ្លួនជនសង្ស័យ រូបនេះ គឺកាលពីវេលាម៉ោង១៧និង២៥នាទីយប់ ថ្ងៃទី០៤ ខែកុម្ភៈ ឆ្នាំ២០១៩ នៅចំណុចមុខព្រះបរមរាជវាំង ជនសង្ស័យបានបង្ហោះសារជាអក្សរលើទំព័រហ្វេសប៊ុកឈ្មោះ ចំប៉ីខ្មៅ Chompey Khmoa ថា ជូនពូជអាខ្មែរតិរិច្ឆាន៣នាក់ ដែលជិះម៉ូតូមកខោកក្បាលខ្ញុំតាមផ្លូវ និងមានភ្ជាប់ឃ្លីប វីដេអូរយៈពេល ១នាទី៥៣វិនាទី ដោយជេរក្រុមជនបង្កដែលបានវាយក្បាល គាត់មួយក្រញ៉ និងបានប្រមាថដល់ពូជសាសន៍ខ្មែរយ៉ាងធ្ងន់ធ្ងរ ។
ការប្រមាថពូជសាសន៍ខ្មែរ ដោយសារកំហឹងចំពោះអ្នកវាយក្បាលគាត់បែបនេះបានធ្វើឲ្យ មហាជន ជាពិសេសក្រុមអ្នកនិយមលេងបណ្តាញសង្គមហ្វេសប៊ុក ថ្កោលទោស និងទាមទារឲ្យសមត្ថកិច្ចស្វែងរកចាប់ខ្លួនជននេះអោយខាងតែបាន ដើម្បីយកមកផ្ដន្ទាទោសតាមច្បាប់អោយស័ក្ដសមទៅ និងកំហុស ។ ជាការកត់សម្គាល់ឈ្មោះយិន ហេង ប្រើអាខោនហ្វេសបុកឈ្មោះចម្បីខ្មៅនេះ ធ្លាប់បង្កការក្ដៅក្រហាយតាមបណ្ដាញសង្គមច្រើនដងហើយ តាំងពីករណីដែលអង្គការយូនីស្កូចុះបញ្ជីទទួលស្គាល់ល្ខោនខោល របស់ខ្មែរចូលជាបិតិភ័ណ្ឌពិភពលោក និងជម្លោះកន្លែងចតយានយន្តជាដើម ដោយអាជ្ញាធរខ័ណ្ឌបានអោយជននេះធ្វើកិច្ចសន្យាបញ្ឈប់ការបង្កបញ្ហាទៀត ៕ កែសម្រួលដោយ ៖ សុឃាក់
ចែករំលែកព័តមាននេះ