រាជធានីភ្នំពេញ ៖ ស្ត្រីជាអ្នកលក់គ្រឿងអលង្ការម្នាក់បានយកគ្រឿងអលង្ការទៅឱ្យជាងធ្វើ ហើយដាក់កាបូបគ្រឿងអលង្ការក្រោមកែបម៉ូតូ រួចក៏ធ្វើដំណើរត្រឡប់ទៅផ្ទះ ស្រាប់តែមានបុរស២នាក់ជិះម៉ូតូមួយគ្រឿងតាមស្ត្រីរងគ្រោះតាំងពីផ្ទះជាង ហើយត្រូវបានគេសង្ស័យថាបុរសទាំង២នាក់នោះជិះម៉ូតូមកបំបុកពីក្រោយ បណ្តាលឱ្យដួលម៉ូតូ និងធ្វើឱ្យស្ត្រីរងគ្រោះរងរបួស ហើយគេមិនដឹងថាបុរសទាំង២នាក់ខាងលើមានបំណងអ្វីនោះទេ លុះពេលឃើញអ្នករត់ម៉ូតូឌុប និងរ៉ឺម៉កម៉ូតូកង់បីមកព្រោងព្រាត ធ្វើឱ្យបុរសទាំង២នាក់នោះភ័យស្លន់ស្លោក៏លើកម៉ូតូជិះខ្លួនគេចបាត់ ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៩យប់ថ្ងៃទី១៨ ខែឧសភា ឆ្នាំ២០១៩ ជិតសណ្ឋារគារម៉ារ៉ាឌី ស្ពានអាកាសស្ទឹងមានជ័យ ផ្លូវ២១៧ សង្កាត់ស្ទឹងមានជ័យ២ ខណ្ឌមានជ័យ ។
ស្ត្រីរងគ្រោះជាអ្នកលក់គ្រឿងអលង្ការម្នាក់ខាងលើមិនស្គាល់អត្តសញ្ញាណនោះទេ គ្រាន់តែដឹងថា ជាអ្នកបើកបរម៉ូតូមួយគ្រឿងម៉ាកហុងដាស្គូពី ពណ៌កាប់ស្ទាំង ពាក់ស្លាកលេខ ភ្នំពេញ ១WC-៨២៥៣ បានរងរបួសបែកមាត់ ។ ចំណែកបុរសទាំង២នាក់ដែលគេសង្ស័យថាបើកបរម៉ូតូបំបុកស្ត្រីរងគ្រោះក៏មិនស្គាល់អត្តសញ្ញាណដែរ បានបើកម៉ូតូគេចខ្លួនបាត់ ។
តាមសម្តីស្ត្រីរងគ្រោះជាអ្នកលក់គ្រឿងអលង្ការខាងលើបានអោយដឹងថា មុនពេលកើតហេតុ គាត់បានចេញពីកន្លែងលក់គ្រឿងអលង្ការនៅផ្សារអូរឡាំពិក និងធ្វើដំណើរទៅម្តុំវត្តសាមគ្គីរង្សី ក្នុងគោលបំណងយកគ្រឿងអលង្ការ(កងឈុត)ទៅឱ្យជាងធ្វើ រួចហើយគាត់ក៏ជិះម៉ូតូត្រឡប់ទៅផ្ទះវិញនៅម្តុំផ្សារអូឡាំពិក ដោយដាក់កាបូបមានគ្រឿងអលង្ការពេញទុកក្រោមកែបម៉ូតូផងដែរ ។
តាមប្រភពដដែលបានបន្តថា លុះពេលគាត់ធ្វើដំណើរមកដល់ចំណុចកើតហេតុខាងលើ ក៍ស្រាប់តែមានបុរស២នាក់មិនស្គាល់អត្តសញ្ញាណបានជិះម៉ូតូមួយគ្រឿងតាមគាត់តាំងពីម្តុំវត្តសាមគ្គីរង្សីដែលជាកន្លែងធ្វើគ្រឿងអលង្ការ ហើយមិនដឹងថា បុរសទាំង២នាក់នោះជិះម៉ូតូមកបំបុកពីក្រោយ ឬធាក់ម៉ូតូរបស់គាត់នោះទេ ស្រាប់តែដួលម៉ូតូ បណ្តាលឱ្យគាត់បោកទៅនឹងផ្លូវរងរបួសបែកមាត់ ។ ភ្លាមៗនោះដែរ ក៏មានបងប្អូនប្រជាពលរដ្ឋជាអ្នករត់ម៉ូតូឌុប និងរ៉ឺម៉កម៉ូតូកង់បីមកពីក្រោយព្រោងព្រាត ធ្វើឲ្យបុរសទាំង២នាក់នោះភ័យស្លន់ស្លោក៏លើកម៉ូតូជិះគេចចេញពីកន្លែងកើតហេតុទៅបាត់ ដោយបន្សល់ទុកស្បែកជើងមួយចំហៀង ។ ចំណែកគ្រឿងអលង្ការត្រូវបានស្ត្រីរងគ្រោះបើកកែបម៉ូតូយកមកឱបជាប់នឹងខ្លួនទាំងអារម្មណ៍រងការភិតភ័យយ៉ាងខ្លាំង ។
បន្តិចក្រោយមក គេឃើញសមត្ថកិច្ចចរាចរណ៍ដែលប្រចាំការនៅគោលដៅក្បែរកន្លែងកើតហេតុនោះ ក៍ទៅជួយយកស្ត្រីរងគ្រោះឱ្យមកអង្គុយនៅគោលដៅក្រោមស្ពានអាកាសស្ទឹងមានជ័យ បន្ទាប់មកស្ត្រីរងគ្រោះក៍បានទាក់ទងហៅក្រុមគ្រួសារសាច់ញាតិឱ្យមកទទួលយកទៅផ្ទះវិញ ៕
ចែករំលែកព័តមាននេះ