រាជធានភ្នំពេញ៖ ការពុះដីឡូត៍លក់នាពេលបច្ចុប្បន្នមានការពេញនិយមទាំងអ្នកវិនិយោគិនក្នុងស្រុកនិងក្រៅស្រុកមានស្ទើនៅគ្រប់តំបន់នៅទូទាំងប្រទេស។ ទន្ទឹមនឹការកើនឡើងនូវការពុះដីឡូត៍មានច្រើននេះ គេសង្កេតឃើញពលរដ្ឋមួយចំនួនបានរងផលប៉ះពាល់ជាហេតុធ្វើពលរដ្ឋផ្សេងទៀតបានការបារម្ភដូចៗគ្នាថា ការពុះដីឡូត៍លក់កាន់តែមានច្រើនអាចនឹងធ្វើឱ្យពលរដ្ឋជួបបញ្ហាប្រឈម ហើយដើម្បីជៀសផុតពីកង្វល់នេះមន្ត្រីក្រសួងរៀបចំដែនដី នគរូបនីយកម្មនិងសំណង់បានជំរុញឱ្យក្រុមអ្នកអភិវឌ្ឍន៍ដីធ្លីទាំងអស់ត្រូវអនុវត្តតាមប្រកាសស្តីពីការ«អភិវឌ្ឍន៍ដី»ដែលក្រសួងបានរៀបចំនិងត្រូវសុំច្បាប់អនុញ្ញាតិពីស្ថាប័នពាក់ព័ន្ធ។
លោក ឡៅទិព្វ សីហា មន្ត្រីជាន់ខ្ពស់ក្រសួងរៀបចំដែនដី នគរូបនីយកម្មនិងសំណង់មានប្រសាសន៍ថា ខ្ញុំសូមបញ្ជាក់ថាចំពោះបញ្ហាការពុះដីឡូត៍លក់មានការរីកចម្រើននេះ មែនទែនវាមិនមានអ្វីគួរបារម្ភទេ ដោយសារក្រសួងរៀបចំដែនដី មានប្រកាសនិយាយអំពីការអភិវឌ្ឍដី។ ដូចនេះអ្នកអភិវឌ្ឍន៍ដី អ្នកពុះដីឡូត៍លក់ត្រូវអនុវត្តតាមលិខិតគតិយុត្តិ ពិសេសអនុវត្តលិខិតគតិយុត្តិ,អំពីការប្រកាសដី ដែលអ្នកអភិវឌ្ឍន៍ដីធ្លីទាំងអស់ចាំបាត់ត្រូវតែសុំច្បាប់អនុញ្ញាតិជាមុនពីអាជ្ញាធរមានសមត្ថកិច្ចមានក្រសួងរៀបចំដែនដី នគរូបនីយកម្មនិងសំណង់ រាជធានី-ខេត្ត ក្រុងស្រុកខណ្ឌទាំងអស់។ បើតាមមន្ត្រីជាន់ខ្ពស់រូបនេះ អ្នកអភិវឌ្ឍន៍ដីធ្លីទាំងអស់អនុវត្តតាមប្រកាសពីការអភិវឌ្ឍដីដែលក្រសួងបានរៀបចំនិងបានកំណត់រួចមកហើយ។
លោកបានសង្កត់ធ្ងន់ថា «ដើម្បីឱ្យពលរដ្ឋជៀសផុតពីហានិភ័យពីការទិញដីឡូត៍នេះ អ្នកអភិវឌ្ឍន៍ដីមេត្តាអនុវត្តឱ្យបានតាមប្រកាសស្តីពីការអភិវឌ្ឍដីរបស់ក្រសួងដែនដីមុន អភិវឌ្ឍន៍នៅតាមការដ្ឋាន។ អ្នកអភិវឌ្ឍន៍ដីចាំបាច់ត្រូវមានឯកសារសុំច្បាប់ពីអាជ្ញាធរមានសមត្ថកិច្ច ដើម្បីបញ្ជាក់ឱ្យអ្នកទិញគាត់បានឃើញ ថាការអភិវឌ្ឍដីរបស់ពួកគាត់មានច្បាប់ត្រឹមត្រូវមុនគាត់ធ្វើការប្រកាសលក់»។
បើតាមសេចក្តីប្រកាសព័ត៌មានរបស់ក្រសួងសេដ្ឋកិច្ចនិងហិរញ្ញវត្ថុ កាលពីថ្ងៃទី៣ឧសភា ដើម្បីឱ្យពលរដ្ឋធ្វើការទិញលក់ ដីឡូត៍និងលំនៅឋានប្រព្រឹត្តិទៅដោយរលូន និងអាចជៀងវាងផុតពីហានិភ័យជាយថាហេតុដែលបង្កឡើងដោយជនខិលខូច ពលរដ្ឋត្រូវយល់ដឹងនូវព័ត៌មានសំខាន់ៗមួយចំនួន។ក-)ព័ត៌មានសម្រាប់ការទិញដីឡូត៍៖១-)ឈ្មោះម្ចាស់អចលនទ្រព្យក្នុងវិញ្ញបនបត្រសម្គាល់ម្ចាស់អចលនទ្រព្យ (តើជារបស់អ្នកអភិវឌ្ឍគម្រោងពុះដីឡូត៍លក់ឬជារបស់អ្នកផ្សេង),២-) វិញ្ញាបនបត្រសម្គាល់ម្ចាស់អចលនទ្រព្យ(មានជាប់បន្ទុកឬអត់),៣-) លិខិតអនុញ្ញាតអភិវឌ្ឍដីដែលចេញដោយអាជ្ញាធរ ឬអង្គភាពមានសមត្ថកិច្ច(ដូចមានចែងក្នុងប្រកាសលេខ០៨៧ ដ.ន.សប្រក/នីក.ចុះថ្ងៃទី១១ខែឧសភា ឆ្នាំ២០១៨ស្តីពីការអភិវឌ្ឍដីរបស់ក្រសួងដែនដីនគរូបនីយកម្មនិងសំណង់),៤-) ឯកសារបង់ពន្ធអចលនវត្ថុ,៥បណ្ណបំបែកក្បាលដីនិង៦-) ខ្លឹមសារលម្អិតនៃកិច្ចសន្យាលក់ឬទិញ។
ដោយឡែក (ខ-) ព័ត៌មានសម្រាប់កាតទិញលំនៅឋាន៖១-) លិខិតអនុញ្ញាតសាងសង់ (ចេញដោយក្រសួងដែនដី នគរូបីយកម្មនិងសំណង់ឬសាលារាជធានី ខេត្ត), ២-)វិញ្ញាបនបត្រសម្គាល់ម្ចាស់អចនទ្រព្យ(មានជាប់បន្ទុកឬអត់),៣-) អាជ្ញាបណ្ណអភិវឌ្ឍលំនៅឋាន(ចេញដោយក្រសួងសេដ្ឋកិច្ចនិងហិរញ្ញវត្ថុ),៤-)ឯកសារបង់ពន្ធអចលនវត្ថុ,៥-) បណ្ណបំបែកក្បាលដីនិង៦-) ខ្លឹមសារលម្អិតនៃកិច្ចសន្យាលក់- ទិញ៕ កែសម្រួលដោយ ៖ សុឃាក់
ចែករំលែកព័តមាននេះ