រាជធានីភ្នំពេញ ៖ បុរសម្នាក់សង្ស័យស្រវឹងស្រាបើករថយន្តមួយគ្រឿងបុករ៉ឺម៉កលក់សាច់អាំងប៉ើងក្រឡាប់មុខខារ៉ាអូខេផ្អើលបុគ្គលិកក្នុងហាងរត់ជាន់ជើងគ្នា បណ្តាលឱ្យមនុស្ស៣នាក់រងរបួសស្រាល ចំណែករថយន្តបង្កព្យាយាមបើករត់ទាំងបែកកង់ប្រមាណជាង៣០០ម៉ែត្រ ក៏ត្រូវប្រជាពលរដ្ឋឃាត់បានភ្លាមៗ ។
ហេតុការណ៍ខាងលើបង្កអោយមានការភ្ញាក់ផ្អើលកាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី១៥ ខែមិថុនា ឆ្នាំ២០១៩ នៅមុខហាងខារ៉ាអូខេសែនរីករាយ ស្ថិតនៅតាមបណ្ដោយផ្លូវ២០០៤ ហៅផ្លូវម៉ៃដា ដែលស្ថិតនៅភូមិត្រពាំងល្វា សង្កាត់កាកាបទី១ ខណ្ឌពោធិ៍សែនជ័យ ។
រថយន្តបង្កម៉ាកព្រូស ពណ៌ស ពាក់ស្លាកលេខ ភ្នំពេញ ១AF-៤៣៧៧ ។ ចំណែករ៉ឺម៉កលក់សាច់អាំងនៅជិតហាងខារ៉ាអូខេសែនរីករាយ ។
តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុ គេឃើញរ៉ឺម៉កលក់សាច់អាំងកំពុងឈប់នៅចំហៀងហាងខារ៉ាអូខេសែនរីករាយ ហើយនារីជាបុគ្គលិកចំនួន២ទៅ៣នាក់កំពុងឈរទិញសាច់អាំង ស្រាប់តែមានរថយន្តមួយគ្រឿងម៉ាកព្រូស ពណ៌សខាងលើ បើកក្នុងស្ថានភាពស្រវឹង ក្នុងទិសដៅពីជើងទៅត្បូង និងល្បឿនយ៉ាងលឿន ហើយបានបើកបុករះរ៉ឺម៉កលក់សាច់អាំងដែលលក់នៅជិតហាងខារ៉ាអូខេខាងលើ បណ្តាលអោយរ៉ឺម៉កលក់សាច់អាំងក្រឡាប់ផ្ងារជើងនៅមុខហាងខារ៉ាអូខេ និងធ្វើបុគ្គលិកប្រុសស្រីកំពុងអង្គុយទទួលភ្ញៀវ រងរបួសស្រាលចំនួន៣នាក់ ហើយរថយន្តបង្កជ្រុលទៅបុកម៉ូតូមួយគ្រឿងទៀតបណ្តាលឱ្យរងការខូចខាតយ៉ាងធ្ងន់ធ្ងរផងដែរ។
តាមប្រភពព័ត៌មានពីកន្លែងកើតហេតុបានបញ្ជាក់ប្រាប់ថា បន្ទាប់ពីរថយន្ដបង្កខាងលើបើកបុករះកន្លែងកើតហេតុខាងលើរួចមក ធ្វើឱ្យបែកកង់ផ្នែកខាងស្តាំម្ខាង ហើយរថយន្តបង្កខាងលើ បានព្យាយាមបើករត់បានប្រមាណជាង៣០០ម៉ែត្រ ទើបប្រជាពលរដ្ឋដេញឃាត់បានភ្លាមៗផងដែរ។
ក្រោយពេលកើតហេតុ ភាគីខាងរ៉ឺម៉កលក់សាច់អាំង និងជនរងគ្រោះជាបុគ្គលិកហាងខារ៉ាអូខេខាងលើ បានសំរបសំរួលភ្លាមៗជាមួយភាគីបង្កផងដែរ ដោយខាងជនរងគ្រោះជាបុគ្គលិកហាងសុំសំណងចំនួន១០០ដុល្លារ ចំណែកឯភាគីរងគ្រោះខាងរ៉ឺម៉កលក់សាច់អាំង សុំសំណងចំនួន៤០០ដុល្លារដើម្បីបញ្ចប់រឿងនៅកន្លែងកើតហេតុភ្លាមៗផងដែរ ៕
ចែករំលែកព័តមាននេះ