អ្វីទៅជាច្បាប់ ?
ច្បាប់គឺជាបទបញ្ញត្តិសម្រាប់ឱ្យអ្នកនគរប្រតិបត្តិតាម, វិន័យ ក្រឹត្យក្រមចង្អុលផ្លូវឱ្យមនុស្សប្រព្រឹត្តល្អ ។ ច្បាប់នេះមានពីរប្រភេទគឺ ច្បាប់សម្រាប់គ្រប់គ្រងរដ្ឋ និងច្បាប់ធម្មជាតិ ។ ច្បាប់រដ្ឋគឺជាគតិច្បាប់ដែលសរសេរឡើងដោយមនុស្សដើម្បីគ្រប់គ្រងមនុស្សឱ្យធ្វើតាម ច្បាប់នេះគង់មានលើសខ្វះ ឬលម្អៀងមិនខាន តែច្បាប់ធម្មជាតិមិនដូច្នេះទេ គឺពិតជាទៀងត្រង់ ត្រឹមត្រូវប្រាកដណាស់ កាត់សេចក្តីស្មើភាពគ្នាចំពោះសត្វលោកទូទៅមិនលម្អៀងឡើយ ។
អ្នកប្រាជ្ញបានពោលថា ជីវិតសត្វលោកទាំងអស់សុទ្ធសឹងតែស្ថិតនៅក្រោមអំណាចនៃច្បាប់ធម្មជាតិ។ ច្បាប់ធម្មជាតិនោះ តាមធម្មតាមិនមានការលម្អៀង មិនថាអ្នកល្អ ឬអាក្រក់ អ្នកមានអ្នកក្រ អ្នកតូច អ្នកធំក៏ត្រូវតែស្ថិតនៅក្រោមអំណាចនៃច្បាប់ធម្មជាតិទាំងអស់គ្នា គឺមានការកើតឡើង តាំងនៅ និងរលត់ទៅ ហើយព្រាត់ប្រាសប្រែប្រួលផ្លាស់ប្ដូរទៅតាមហេតុបច្ច័យនៃច្បាប់ធម្មជាតិដែលបានកំណត់មក ស្មើភាពគ្នាទូទៅ ។
សត្វលោកណាដឹងច្បាស់នូវសភាពពិតនៃច្បាប់ធម្មជាតិ ស្គាល់សច្ចធម៌ប្រាកដបែបនេះហើយ បុគ្គលនោះគប្បីជាអ្នកមិនញាប់ញ័រ មិនរំជើបរំជួលទៅតាមអារម្មណ៍ ជាចិត្តមាំទាំទើបបានក្សាន្តរួចចាកទុក្ខទាំងពួង
ចែករំលែកព័តមាននេះ