ខេត្តកំពត ៖ ព័ត៌មានបឋមពីការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកំពតបានឲ្យដឹងថា កម្លាំងអធិការដ្ឋាននគរបាលស្រុកកំពង់ត្រាចបានបញ្ជូនសំណុំរឿង និងជនសង្ស័យពីរនាក់មកកាន់ស្នងការនគរបាលខេត្ត ដើម្បីធ្វើការសាកសួរ និងបន្តនីតិវិធីតាមផ្លូវច្បាប់ពីបទប្រើប្រាស់ក្លែងក្លាយនូវផ្លាកលេខរថយន្តម៉ាកសឺដេសមួយគ្រឿង និងម៉ូតូមាកអ៊ែប្ល៊ែតមួយគ្រឿង ដោយពាក់ផ្លាក (លេខរដ្ឋក្លែងក្លាយ) ។
ប្រភពបានបន្តថា ជុំវិញករណីឃាត់ខ្លួនជនសង្ស័យទាំងពីរនាក់ខាងលើរបស់កម្លាំងផែនព្រហ្ម ទណ្ឌស្នងការខេត្ត និងកម្លាំងអធិការនគរបាលស្រុកកំពង់ត្រាច កាលពីវេលាម៉ោង៨និង៤០នាទី ថ្ងៃទី១៤ ខែមិថុនា ឆ្នាំ២០១៩ នៅចំណុចភូមិដាស់ស្គរ ឃុំបឹងសាលាខាងជើង ស្រុកកំពង់ត្រាច គឺបន្ទាប់ពីបានទទួលដំណឹងពីមហាជន និងបណ្តាញសង្គម (Facebook) បានធ្វើការបង្ហោះព័ត៌មាននិយាយរិះគន់ពីទង្វើរដែលជនសង្ស័យប្រើប្រាស់ក្លែងក្លាយនូវផ្លាកលេខរដ្ឋបំពាក់នៅរថយន្តរបស់ខ្លួន និងម៉ូតូមួយគ្រឿង ដើម្បីធ្វើសកម្មភាពជាមន្ត្រីរាជការនៅក្នុងមូលដ្ឋានភូមិឃុំ និងស្រុកខាងលើទើបសមត្ថកិច្ចធ្វើការស្រាវជ្រាវរកប្រភពការពិត ដើម្បីអនុវត្តតាមច្បាប់ ។
ប្រភពបានបន្តថា ជនសង្ស័យដែលសមត្ថកិច្ចនាំខ្លួនមកសាកសួរទាំងពីរនាក់មានឈ្មោះទី១- ឈ្មោះ ហ៊ិន យុត្ថាណាហៅ (បារាំង) ភេទប្រុស អាយុ៥៥ឆ្នាំ ទី២- ឈ្មោះ ចាន់ សុផល ភេទប្រុស អាយុ៥៥ឆ្នាំ នាកទាំង២ស្នាក់នៅភូមិដាស់ស្គរ ឃុំបឹងសាលាខាងជើង ស្រុកកំពង់ត្រាច ខេត្តកំពត ព្រមទាំងដកហូតវត្ថុតាងមាន រថយន្តមួយគ្រឿងម៉ាកសឺដេស S320 ផលិតឆ្នាំ១៩៩៤ ពាក់ផ្លាកលេខរដ្ឋ07 ក្លែងក្លាយ 2-6688 និងម៉ូតូម៉ាកអ៊ែប្ល៊ែត ពណ៌ស ពាក់ផ្លាកលេខរដ្ឋ07 ក្លែងក្លាយ 1-7777 ។ នៅពេលឃាត់ខ្លួនជន សង្ស័យឈ្មោះ ហ៊ិន យុត្ថាណា (បារាំង) បានឆ្លើយសារភាពប្រាប់សមត្ថកិច្ចថា ខ្លួនមិនបានចាំថ្ងៃខែ តែនៅក្នុងឆ្នាំ២០១៧ ខ្លួនបានចូលបម្រើការងារនៅក្នុងសហគមន៍អភិវឌ្ឍន៍ខ្មែរ (O.K.C.D) នៅខេត្តបន្ទាយមានជ័យ អស់រយៈពេល២ឆ្នាំ ហើយក៏នៅបន្តរហូតដល់សព្វថ្ងៃនេះ និងទទួលបានមុខងារជាប្រធានត្រួតពិនិត្យទូទៅ ។
ក្រោយមកដោយមើលឃើញនូវភាពក្រីក្រ របស់ប្រជាពលរដ្ឋខ្លួនតំណាងឲ្យប្រជាពលរដ្ឋចំនួន ១៥០០គ្រួសារ ស្ថិតនៅឃុំត្រែងត្រយ៉ឹង និងឃុំចំបក់ ស្រុកភ្នំស្រួច ខេត្តកំពង់ស្ពឺ បានស្នើសុំថ្នាក់ដឹកនាំឲ្យជួយផ្តល់ដីចំនួន១៣០១ហិកតា ដើម្បីសង់លំនៅឋានជូនប្រជាពលរដ្ឋ ។ ជនសង្ស័យរូបនេះបានសារភាពបន្តទៀតថា ថ្ងៃមិនចាំនៅក្នុងខែមេសា ឆ្នាំ២០១៩ ខ្លួនបានទិញរថយន្តមួយគ្រឿងម៉ាកសេដេស ពណ៌ស្ករផលិតឆ្នាំ១៩៩៤ ពាក់ផ្លាកលេខរដ្ឋក្លែងក្លាយរដ្ឋ 07 2-6688 ពីមិត្រភក្តិឈ្មោះ ប៊ុន ធឿន ភេទប្រុស អាយុ៣៦ឆ្នាំ រស់នៅក្រុងភ្នំពេញក្នុងតម្លៃ ១៥០០ដុល្លារ ដោយខ្លួនពុំទាន់ទូទាត់ប្រាក់ឲ្យទៅឈ្មោះ ប៊ុន ធឿន គ្រប់ចំនួននៅឡើយទេ ។
រីឯម៉ូតូម៉ាកអ៊ែប្ល៉ែត ពណ៌ស ខ្លួនបានទិញពីឃ្លាំងនៅភ្នំពេញក្នុងតម្លៃ៦៥០ដុល្លារ បានប្រើប្រាស់រយៈពេលមួយឆ្នាំហើយ ម៉ូតូនេះខ្លួនបានធ្វើផ្លាកលេខក្លែងរដ្ឋ 07 1-7777 មកបំពាក់លើម៉ូតូនេះសម្រាប់ជិះធ្វើការលុះដល់ថ្ងៃទី១៤ ខែមិថុនា ឆ្នាំ២០១៩ វេលាម៉ោងជាង៨ព្រឹក ត្រូវកម្លាំងសមត្ថកិច្ចចុះទៅឃាត់ខ្លួននាំមកកាន់ស្នងការខេត្តតែម្តង ។ ចំណែកជនសង្ស័យម្នាក់ទៀតឈ្មោះ ចាន់ សុផល បានឆ្លើយសារភាពប្រាប់សមត្ថកិច្ចថា កន្លងមកខ្លួនបានស្គាល់គ្នាជាមួយឈ្មោះហ៊ិន យុត្ថាណា អស់រយៈពេល១៨ឆ្នាំមកហើយ ព្រោះជាអ្នកភូមិ ជាមួយគ្នានៅថ្ងៃមិនចាំក្នុងដើមខែឧសភា ឆ្នាំ២០១៩ ឈ្មោះ ហ៊ិន យុត្ថាណា បានហៅខ្លួនឲ្យចូលបម្រើ ការងារនៅក្នុងអង្គការសហគមន៍អភិវឌ្ឍន៍ខ្មែរ (O.K.C.D) មានតួនាទីជាជំនួយការ ចំណែកឯផ្លាកលេខរដ្ឋក្លែងក្លាយរដ្ឋ 07 1-5151 ខ្លួនទុកក្នុងកាបូបរបស់ខ្លួន ដែលខ្លួនបានមកពីអង្គការសហគមន៍អភិវឌ្ឍន៍ខ្មែរ ហើយខ្លួនមិនទាន់បានដាក់ប្រើប្រាស់នៅម៉ូតូនោះទេ រហូតមកដល់ថ្ងៃទី១៤ ខែមិថុនា ឆ្នាំ២០១៩នេះខ្លួនត្រូវកម្លាំងសមត្ថកិច្ចចុះមកចាប់ឃាត់ខ្លួនតែម្តង ។
ប្រភពពីការិយាល័យព្រហ្មទណ្ឌកំរិតស្រាលនៃស្នងការខេត្តបានឲ្យដឹងថា ជនសង្ស័យទាំងពីរនាក់បន្ទាប់ពីធ្វើការសាកសួររួចរាល់សមត្ថកិច្ចបានកសាងសំណុំលិខិតបញ្ជូនទៅតុលាការដើម្បីបន្តតាមនីតិវិធីច្បាប់ ៕ កែសម្រួលដោយ ៖ សុឃាក់
ចែករំលែកព័តមាននេះ