អ្នកនាំពាក្យក្រសួងសាធារណការសោកស្តាយចំពោះហេតុការណ៍ប៉ះទង្គិចរវាងសាឡាងដឹកអ្នកដំណើរ និងសាឡង់ដឹកខ្សាច់
- ភ្នំពេញ
រាជធានីភ្នំពេញ ៖ អ្នកនាំពាក្យក្រសួងសាធារណការ និងដឹកជញ្ជូនបានសម្តែងការសោកស្តាយចំពោះហេតុការណ៍ប៉ះទង្គិចរវាងសាឡាងដឹកអ្នកដំណើរ និងសាឡង់ដឹកខ្សាច់នៅកំពង់ចម្លងជ្រោយចង្វារ-ស្វាយជ្រំ ។
ឯកឧត្តម ផន រឹម អ្នកនាំពាក្យក្រសួងសាធារណការបានបញ្ជាក់លើបណ្តាញសង្គម នៅថ្ងៃទី២៧ ខែកក្តដា ឆ្នាំ២០២៦ យ៉ាងដូច្នេះថា «យើងខ្ញុំមានការសោកស្តាយចំពោះហេតុការណ៍ប៉ះទង្គិចរវាងសាឡាងដឹកអ្នកដំណើរ និងសាឡង់ដឹកខ្សាច់ ដោយហេតុថា សាឡាងដឹកអ្នកដំណើរមានបញ្ហាបច្ចេកទេស» ។
អ្នកនាំពាក្យលើកឡើងថា ទោះបីជាហេតុការណ៍នេះ មិនបណ្តាលឲ្យមានអ្នករងគ្រោះក៏ដោយ ម្ចាស់អាជីវកម្មដចម្លងចេញមុខទទួលខុសត្រូវ សូមទោស និងសន្យាមិនឲ្យហេតុការណ៍ដូចគ្នានេះកើតឡើងជាថ្មីឡើយ ។
លោក អាន សំអន តំណាងឱ្យកំពង់ចម្លងជ្រោយចង្វារ-ស្វាយជ្រំ បានធ្វើការជម្រាបជូនពីហេតុការណ៍ និងសុំទោសជាសាធារណៈអំពីករណីសាឡាងដឹកអ្នកដំណើរប៉ះទង្គិចគ្នាជាមួយសាឡង់ដឹកខ្សាច់ កាលពីថ្ងៃទី២៦ ខែកក្កដា ឆ្នាំ២០២៦ នៅវេលាម៉ោងប្រមាណ១ និង៣០នាទីរសៀល ថា ដោយសារតែសាឡាងមកជិតគ្នា ហើយអ្នកកាន់ចង្កូតមិនអាចបញ្ជាបានភ្លាមៗ ទើបធ្វើឱ្យមានហេតុការណ៍ប៉ះទង្គេចគ្នានេះកើតមានឡើង ។
យ៉ាងណាក្តី លោកបានសន្យាមិនឱ្យហេតុការណ៍នេះ កើតឡើងជាថ្មីទៀតនោះឡើយ ៕
ចែករំលែកព័តមាននេះ