ប្រទេសចិន ៖ ព្យុះទីហ្វុងឈ្មោះ NOULនាថ្ងៃទី២៦ កក្កដា បានវាយប្រហារភាគខាងត្បូងចិន ជាមួយខ្យល់បោកបក់ខ្លាំង និងភ្លៀងខ្លាំង នាំឲ្យមានប្រតិបត្តិការសង្គ្រោះបន្ទាន់ ។ នេះបើតាមសេចក្ដីរាយការណ៍របស់បណ្ដាសារព័ត៌មានរដ្ឋចិន។ នោះជាព្យុះដ៏សាហាវបំផុតវាយប្រហារចិននាឆ្នាំនេះ ។
មុនពេលព្យុះនេះ បោកបក់មកដល់ដែនដី នាព្រឹកព្រលឹមថ្ងៃទី២៦ កក្កដា អាជ្ញាធរបានជម្លៀសមនុស្សចេញជាង៣៤០.០០០នាក់ហើយផ្អាកការងារព្រមទាំងសេវាកម្មផ្លូវដែក ។ ព្យុះនោះក៏បណ្ដាលឲ្យស្ទះដល់បណ្ដាជើងហោះហើរនៃយន្តហោះ ។ វាបានវាយប្រហារដល់ដែនដីនាវេលាម៉ោង៣ និង៥០នាទីរំលងអធ្រាត ជិតទីក្រុងពីញហៃខេត្តក្វាងទុង ស្ថិតនៅចម្ងាយប្រមាណ៨០គីឡូម៉ែត្រភាគឦសានក្រុងហុងកុង ។ នេះបើតាមសេចក្ដីរាយការណ៍របស់ទូរទស្សន៍ចិនCCTV ។
ទូរទស្សន៍នោះបញ្ជាក់ថា ពេលបោកបក់មកដល់ឆ្នេរសមុទ្រចិន ព្យុះនោះមានល្បឿនដល់១៦២គីឡូម៉ែត្រក្នុង១មួយម៉ោង ។ បែបនេះនាំឲ្យNOULក្លាយជាព្យុះទីហ្វុងដែលខ្លាំងបំផុតវាយប្រហារលើចិន រហូតមកទល់ពេលនេះក្នុងឆ្នាំ២០២៦ ។ មុនពេលបោកបក់ដល់ពីលើសមុទ្រចិនខាងត្បូង ព្យុះនេះដែលបង្កើនកម្លាំង បានបំផ្លាញធ្ងន់ធ្ងររួចហើយនៅតាមបណ្ដាកោះចុងខាងជើងហ្វ៊ីលីពីន ។
ទីភ្នាក់ងារសង្គ្រោះបន្ទាន់ហ្វ៊ីលីពីនគូសបញ្ជាក់នាថ្ងៃទី២៦ កក្កដា ថា មនុស្ស៣នាក់បានត្រូវស្លាប់ និងម្នាក់ទៀតបាត់ខ្លួនដោយសារព្យុះនេះ ។ នៅប្រទេសនោះ មនុស្សជាង៩៣០០នាក់ត្រូវបានជម្លៀសចេញ និងផ្ទះ២៣៥ខ្នង រងការខូចខាត។ នាភាគខាងត្បូងចិនថ្ងៃទី២៦ កក្កដា មានខ្យល់បោកបក់ខ្លាំង និងភ្លៀងធ្លាក់ខ្លាំង។ ផ្លូវនានាគ្របដណ្ដប់ដោយបំណែក។
ជើងហោះហើរនៃយន្តហោះចេញនិងចូលក្រុងហុងកុង ដល់យ៉ាងតិច៣៥០ជើង ត្រូវលុបចោលកាលពីថ្ងៃទី២៦ កក្កដា។ អាជ្ញាធរក្រុងហុងកុងគូសបញ្ជាក់ថា មនុស្ស២១នាក់រងរបួស ដោយសារព្យុះនេះ ចំណែកដើមឈើ៣០០ដើមត្រូវរលំបាក់។ CCTVរាយការណ៍ទៀតថា ព្យុះនោះបន្តវាយប្រហារលើដែនដីជាមួយខ្យល់និងភ្លៀងខ្លាំង នៅខេត្តជាំងស៊ី ហ៊ូណាន់ និងហ៊ូប៉ី។ តាមCCTVថា ភ្លៀងបង្កឡើងដោយព្យុះនេះអាចធ្លាក់បន្ត រហូតដល់ថ្ងៃទី២៨ កក្កដា នៅខេត្តហេណាន និងសានដុង៕
ចែករំលែកព័តមាននេះ