អន្តរជាតិ ៖ តម្លៃប្រេងបានធ្លាក់ចុះជាង ៦% នៅថ្ងៃទី២៧ ខែកក្កដា ឆ្នាំ២០២៦ បន្ទាប់ពីសហរដ្ឋអាមេរិក និងប្រទេសអ៊ីរ៉ង់បានផ្អាកការវាយប្រហារគ្នា កាលពីចុងសប្តាហ៍ ក្រោយការវាយប្រហារគ្នារយៈពេលពីរសប្តាហ៍។ ការផ្អាកនេះ បានបង្កើនក្តីសង្ឃឹមលើដំណោះស្រាយការទូត ដែលនឹងជួយកាត់បន្ថយភាពតានតឹងនៃជម្លោះ និងអនុញ្ញាតឱ្យការដឹកជញ្ជូនតាមកប៉ាល់អាចចាប់ផ្តើមឡើងវិញ នៅក្នុងច្រកសមុទ្រហ័រមូស (Hormuz)។ នេះបើតាមប្រភពពី Reuters បានចេញផ្សាយ។
តម្លៃប្រេងឆៅប្រភេទ Brent ស្តង់ដាពិភពលោក បានធ្លាក់ចុះ ៦,២០ ដុល្លារអាមេរិក ឬ ៦,៤% មកនៅត្រឹម ៩០,៥៨ ដុល្លារក្នុង១បារ៉ែល ត្រឹមម៉ោង ១:២០ នាទីរសៀល (ម៉ោងនៅកម្ពុជា) បន្ទាប់ពីបានធ្លាក់ចុះក្រោមតម្លៃ ៩០ ដុល្លារក្នុង១បារ៉ែលរយៈពេលខ្លី នៅក្នុងការជួញដូរនាព្រឹកនេះ។ ចំណែកប្រេងឆៅ West Texas Intermediate (WTI) របស់សហរដ្ឋអាមេរិក មានតម្លៃ ៨៣,៥១ ដុល្លារក្នុង១បារ៉ែល ពោលធ្លាក់ចុះ ៥,៨០ ដុល្លារ ឬ ៦,៥%។ កិច្ចសន្យាជួញដូរប្រេងទាំងពីរនេះ កំពុងជួញដូរក្នុងកម្រិតទាបបំផុតក្នុងរយៈពេលជិត១សប្តាហ៍ បន្ទាប់ពីបានកើនឡើងក្នុងរយៈពេល៣សប្តាហ៍កន្លងមក។
ប្រេងឆៅ Brent បានឡើងដល់ ១០០ ដុល្លារក្នុង១បារ៉ែល ដោយសារជម្លោះដែលបានរាំងស្ទះការដឹកជញ្ជូនប្រេងតាមរយៈច្រកសមុទ្រហ័រមូសបានរីករាលដាលទៅដល់សមុទ្រក្រហម ដែលរារាំងការនាំចេញពីប្រទេសអារ៉ាប៊ីសាអូឌីត ដែលជាប្រទេសនាំចេញលំដាប់កំពូលរបស់ពិភពលោក តាមរយៈច្រកសមុទ្រ Bab el-Mandeb ទៅកាន់តំបន់អាស៊ី។
បើតាមឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោក Mike Waltz បានប្រាប់កម្មវិធីទូរទស្សន៍ Fox News Sunday និងប្រព័ន្ធផ្សព្វផ្សាយអាមេរិកផ្សេងទៀតថា ប្រធានាធិបតីអាមេរិក លោក ដូណាល់ ត្រាំ (Donald Trump) បានសម្រេចចិត្តផ្អាកការវាយប្រហារលើអ៊ីរ៉ង់ ដើម្បីទុកពេលបន្ថែមទៀតសម្រាប់កិច្ចការចរចាការទូត។
ទោះបីជាផ្អាកការវាយប្រហារគ្នាក៏ដោយ ប៉ុន្តែទិន្នន័យដឹកជញ្ជូនពីក្រុមហ៊ុន Kpler បានបង្ហាញថា មានកប៉ាល់ដឹកទំនិញតិចជាង ១០ គ្រឿងប៉ុណ្ណោះ ដែលបានឆ្លងកាត់តាមច្រកសមុទ្រហ័រមូសជារៀងរាល់ថ្ងៃ អំឡុងចុងសប្តាហ៍មុន។
លើសពីនេះទៀត ចរាចរណ៍កប៉ាល់ឆ្លងកាត់ច្រកសមុទ្រ Bab el-Mandeb ក៏បានធ្លាក់ចុះកាលពីថ្ងៃអាទិត្យផងដែរ បន្ទាប់ពីក្រុមឧទ្ទាមប្រដាប់អាវុធហ៊ូធី (Houthis) គាំទ្រដោយអ៊ីរ៉ង់នៅប្រទេសយេម៉ែនបានវាយប្រហារទីតាំងប្រេងអារ៉ាប៊ីសាអូឌីត តាមបណ្តោយឆ្នេរសមុទ្រក្រហម ទោះបីជាមានកប៉ាល់ដឹកប្រេងខ្នាតយក្សទី៣របស់ចិន បានចាកចេញតាមច្រកសមុទ្រ Bab el-Mandeb នេះក៏ដោយ៕
ចែករំលែកព័តមាននេះ