រាជធានីភ្នំពេញ ៖ ស្ត្រីម្នាក់ត្រូវបានគេប្រទះឃើញដេកស្លាប់ក្នុងបន្ទប់ជួលមួយកន្លែងនៅជាន់ទី២ ផ្លូវលេខ២៧ ភូមិមានជ័យ សង្កាត់ស្ទឹងមានជ័យ១ ខណ្ឌមានជ័យ និងបង្កឲ្យមានការភ្ញាក់ផ្អើលកាលពីវេលាម៉ោងប្រមាណ៩ព្រឹកថ្ងៃទី១៣ ខែមិថុនា ។…
រាជធានីភ្នំពេញ ៖ ស្ត្រីម្នាក់ត្រូវបានគេប្រទះឃើញដេកស្លាប់ក្នុងបន្ទប់ជួលមួយកន្លែងនៅជាន់ទី២ ផ្លូវលេខ២៧ ភូមិមានជ័យ សង្កាត់ស្ទឹងមានជ័យ១ ខណ្ឌមានជ័យ និងបង្កឲ្យមានការភ្ញាក់ផ្អើលកាលពីវេលាម៉ោងប្រមាណ៩ព្រឹកថ្ងៃទី១៣ ខែមិថុនា ។ តាមបុរសជាឪពុកឱ្យដឹងថា កូនស្រីគាត់ដែលស្លាប់នេះឈ្មោះពន្លក ចិន្តា អាយុ៣៤ឆ្នាំ ស្នាក់នៅភូមិស្រីស្នំ សង្កាត់ព្រែកកំពឹស ខណ្ឌដង្កោ ។ កូនស្រីគាត់ម្នាក់នេះ មានប្តី២នាក់ហើយ តែរកសុភមង្គលមិនឃើញឡើយ ហើយទីបំផុតក៏បានលែងលះគ្នាទាំងពីរ និងបានបន្សល់ទុកកូនប្រុសអាយុក្រោម៥ឆ្នាំចំនួន២នាក់ ។ បន្ទាប់ពីលែងលះគ្នាជាមួយប្តីក្រោយ នាងតែងតែដើរចេញពីផ្ទះដោយទុកកូនឲ្យនៅជាមួយពួកគាត់ជាជីតានិងជីដូន ។ ដោយសារការរស់នៅ មានភាពអាម៉ាស់ ទើបនាងសម្រេចមកជួលបន្ទប់ខាងលើស្នាក់នៅ និងបានរយៈពេលជាង២ខែក៏កើតមានរឿងបែបនេះតែម្តង ។
បើតាមស្ត្រីជាម្ចាស់បន្ទប់ជួលនិយាយថា ស្ត្រីរងគ្រោះបានមកជួលបន្ទប់ស្នាក់នៅតែម្នាក់ឯងរយៈ ពេលជាង២ខែហើយ ហើយនាងតែងតែទិញស្រាទៅផឹកក្នុងបន្ទប់និងចេញទៅផឹកនៅខាងក្រៅផងដែរ ។ នៅព្រឹកថ្ងៃកើតហេតុនោះ ដោយមិនឃើញនាងចេញពីបន្ទប់ជួលជាន់ទី២មកខាងក្រៅ ធ្វើឲ្យមានការសង្ស័យគាត់ក៏ឡើងទៅមើលនិងស្រែកហៅតែមិនឃើញបើកទ្វារ ក៏ឆ្ងល់ ទើបហៅអ្នកបន្ទប់ក្បែរគ្នាមកគាស់ទ្វារ
មើលស្រាប់តែឃើញស្ត្រីរងគ្រោះដេកស្តូកស្តឹងស្លាប់បាត់ទៅហើយ ។ ភ្លាមៗនោះ គាត់បានរាយការណ៍ទៅសមត្ថកិច្ចមូលដ្ឋានឲ្យមកពិនិត្យសព ។
មន្ត្រីនគរបាលមូលដ្ឋាន បានសហការជា មួយនគរបាលជំនាញ បានមកពិនិត្យសពស្ត្រីរូបនេះនិងបង្ហាញថា ស្លាប់ដោយសារខ្យល់គរ ព្រោះខ្លួនប្រាណពុំមានស្លាកស្នាមអ្វីទេ ជាពិសេសពេលនាងដេកស្លាប់គឺទ្វារចាក់សោពីខាងក្នុង ៕
ចែករំលែកព័តមាននេះ