ខេត្តព្រៃវែង ៖ យោងតាមប្រភពព័ត៌មានច្បាស់ពីខាងក្នុងមន្ទីរអប់រំយុវជន និងកីឡាខេត្តព្រៃវែងឱ្យដឹងថា រយៈពេលជិតកន្លះខែមកនេះ នៅក្នុងមន្ទីរអប់រំយុវជននិងកីឡាខេត្ត កំពុងមានភាពច្របូកច្របល់យ៉ាងខ្លាំង ដោយសារតែគ្មានអ្នកដឹកនាំច្បាស់លាស់ ក្រោយលោក ឈុន សុផល ជាប្រធានមន្ទីរបានចូលនិវត្តន៍ទៅ ។ ប៉ុន្តែលើសពីនោះទៅទៀត បែកធ្លាយរឿងមួយ ដែលធ្វើឱ្យផ្ទៃក្នុងមន្ទីរនេះ រំជើបរំជួលជាខ្លាំងនោះ គឺកំពុងមានអ្នករត់ការដណ្តើមតំណែងធ្វើប្រធានមន្ទីរមួយនេះ ដោយគេមិនដឹងថា អ្នករត់ការនោះប្រើខ្សែទុយោធំប៉ុណ្ណាទេ ទើបអាចចូលទៅដល់ក្នុងក្រសួងអប់រំយុវជន និងកីឡា បានយ៉ាងស្រួលធ្វើឱ្យអ្នកដែលអត់ខ្សែ កំពុងភ័យបុកពោះជាខ្លាំង ។
គួរបញ្ជាក់ថា ការដណ្តើមតំណែងប្រធានមន្ទីរអប់រំយុវជន និងកីឡាខេត្តព្រៃវែងនេះ មិនមែនទើបតែកើតមាននៅក្នុងអាណត្តិនេះទេ គឺកើតមានតាំងពីសម័យលោក ហ៊ឹម សុផល ប្រធានមន្ទីរចាស់ចូលនិវត្តន៍ម្ល៉េះ កាលចុងឆ្នាំ២០១៦ ។ កាលនោះ មានអនុប្រធានមន្ទីរ២រូប បានឈរឈ្មោះជាបេក្ខភាព ដណ្តើមតំណែងមួយនោះ គឺលោកវ៉ែន ប្រណី និងលោក ឈុន សុផល ហើយក្នុងចំណោមអ្នកទាំង២ រដ្ឋបាលខេត្តព្រៃវែងបានធ្វើលិខិតស្នើទៅក្រសួងអប់រំយុវជន និងកីឡា សុំឱ្យតែងតាំងលោក វ៉ែន ប្រណី ធ្វើជាប្រធានមន្ទីរ។
ប៉ុន្តែការស្នើសុំរបស់រដ្ឋបាលខេត្ត ត្រូវបានខាងក្រសួងបដិសេធ និងបានសម្រេចតែងតាំងលោក ឈុន សុផល ធ្វើជាប្រធានមន្ទីរស្តីទីក្តាប់រួម រហូតដល់ដំណាច់ឆ្នាំ២០១៧ ទើបក្រសួងនិងពិនិត្យផ្តល់តួនាទីសមស្របណាមួយ ។ បន្ទាប់ពីលោកត្រូវចូលនិវត្តន៍ នៅចុងខែឧសភា ឆ្នាំ២០១៩ និងឱ្យលោក វ៉ែន ប្រណី ជាបេក្ខភាពប្រធានមន្ទីរបន្តបំពេញភារកិច្ច តាមការចាត់តាំងរបស់អង្គភាព ដើម្បីបង្ហាញពីសមត្ថភាពដឹកនាំ សាមគ្គីភាព និងដោះស្រាយបញ្ហាក្រោមដែនសមត្ថកិច្ចរបស់ខ្លួន រហូតដល់ដំណាច់ឆ្នាំ២០១៧ ទើបក្រសួងធ្វើការវាយតម្លៃអំពីសមត្ថភាព និងប្រសិទ្ធិភាពការងារ ដើម្បីតែងតាំងជាប្រធានមន្ទីរអប់រំយុវជន និងកីឡាខេត្តព្រៃវែង ។ ប៉ុន្តែរហូតដល់ដំណាច់ឆ្នាំ២០១៧ ក្រសួងមិនបានបង្ហាញពីចំណាត់ការអ្វីនោះទេ ទើបលោក ឈុន សុផល នៅតែបន្តធ្វើជាប្រធានមន្ទីរ រហូតដល់ពេលលោកចូលនិវត្តន៌ កាលពីថ្ងៃទី២៧ឩសភា២០១៩តែម្តង។
ប្រភពច្បាស់ការពីក្នុងមន្ទីរអប់រំយុវជន និងកីឡាខេត្តព្រៃវែង បានបញ្ជាក់ថា ចាប់តាំងពីថ្ងៃ ដែលលោក ឈុន សុផល ចូលនិវត្តន៍រហូតមកដល់ពេលនេះ មន្ទីរពុំមានអ្នកដឹកនាំទេ ធ្វើអោយការងារជាច្រើនត្រូវជាប់គាំងស្ទះ ព្រោះគ្មានអ្នកស៊ីញ៉េចាត់តាំង ។
លើសពីនេះ ពេលនេះនៅក្នុងមន្ទីរកំពុងតែមានភាពរំជើបរំជួលជាខ្លាំង ដោយសារតែដំណែងប្រធានមន្ទីរ ដែលគេគិតថានិងបានទៅលើលោក វ៉ែន ប្រណី ដែលជាបេក្ខភាពស្រាប់នោះ កំពុងតែមានភាពរង្គោះរង្គើហើយ ដោយសារតែមានអ្នកកំពុងរត់ការដណ្តើម ហើយអ្នកកំពុងរត់ការដណ្តើនោះ គេក៏បានដឹងពីសមាសភាពដែរ នោះគឺលោក ប៉ាវ សុធី អនុប្រធានមន្ទីរអប់រំនោះតែម្តង។
ពេលនេះ មន្ត្រីទាំងអស់នៅក្នុងមន្ទីរអប់រំ យុវជន និងកីឡាខេត្តព្រៃវែង កំពុងនាំគ្នារងចាំអ៊ុតមើលថា តើលទ្ធផលទៅជាយ៉ាងណា រវាងអ្នកដែលជាបេក្ខភាពប្រធានមន្ទីរស្រាប់ និងអ្នកកំពុងប្រើខ្សែទុយោរត់ការ តើអ្នកណានិងមានភ័ព្វវាសនា ត្រូវបានក្រសួងអប់រំ តែងតាំងជាប្រធានមន្ទីរអប់រំ យុវជននិងកីឡាខេត្តព្រៃ វែងថ្មី….? (សម្រួលដោយ៖ ស្រីណា)
ចែករំលែកព័តមាននេះ