អាជ្ញាធរម៉ាឡេស៊ីបានបិទទីកន្លែងមុជទឹកដ៏ល្បីឈ្មោះនៅក្នុងប្រទេសជាច្រើនកន្លែង លើកោះឌៀវម៉ាន និងកោះវ៉េដាង បន្ទាប់ពីទីកន្លែងប្រជុំផ្កាថ្មបានទទួលផលប៉ះពាល់ពីកំដៅផែនដី ។
កន្លែងប្រជុំផ្កាថ្ម ដែលទាក់ទាញភ្ញៀវទេសចរក្នុងមួយឆ្នាំជាង៥០០.០០០នាក់ ត្រូវបានបិទដោយហាមមិនឱ្យភ្ញៀវទេសចរមុជទឹក ឬបណ្ដែតខ្លួននៅលើផ្ទៃទឹករហូតដល់ចុងខែតុលាដើម្បីស្ដារប្រព័ន្ធបរិស្ថានផ្នែកសមុទ្រឡើងវិញ ។
លោកឆាហ៊ីម៉ា អាប់ឌុលហាមីត អ្នកចាត់ការទូទៅនៃឧទ្យានជាតិសមុទ្របង្ហើបឱ្យដឹងថា “កន្លែងមុជទឹក៩ក្នុងចំណោម៨៣នៅទូទាំងប្រទេសត្រូវបានបិទសេវាកម្ម” ។ ស្ថាប័នខាងលើបានបន្ដទៀតថា ការបិទកន្លែងមុជទឹកទាំង៩ នឹងជួយផ្ដល់ឱកាសឱ្យប្រជុំផ្កាថ្មមានលក្ខណៈល្អប្រសើរឃ្លាតឆ្ងាយពីការលុកលុយដែលបង្កឡើងដោយភ្ញៀវទេសចរដូចជាការមុជទឹកជាដើម ។
ការប៉ះពាល់លើផ្កាថ្មអាចធ្វើឱ្យផ្កាថ្មខូចខាតយ៉ាងងាយស្រួល ដែលអាចកើតឡើងពីកំលាំងសម្ពាធផ្សេងៗដូចជាសីតុណ្ហភាពក្នុងទឹកសមុទ្រកើនឡើងខ្ពស់ការចូលទៅរំខានដល់ការលូតលាស់របស់ផ្កាថ្ម និងសត្វ ដែលមានជីវិតផ្សេងៗទៀត ។
ដោយឡែកលោកអាប់ឌុល ចាម៉ាល ម៉ាយឌីន នាយកឧទ្យានជាតិផ្នែកសមុទ្រ បានបញ្ជាក់ប្រាប់អ្នកសារព័ត៌មានថា ប្រជុំផ្កាថ្មមួយចំនួនត្រូវបានបំផ្លាញប្រហែលពី៦០ទៅ៩០% និងកោះ៣ទៀតនៅក្បែរកោះ ឌៀវម៉ាន ក៏ត្រូវបានបិទ ។ តាមប្រភពពីទី ភ្នាក់ងារ “ ស្ដារ៍ដេលី”ដែលយោងលើការសំភាសន៍របស់លោកអាប់ឌុលចាម៉ាល ម៉ាយឌីនថា “យើងកំពុងឃ្លាំមើលផលប៉ះពាល់ទៅលើផ្កាថ្មក្នុងឧទ្យានជាតិផ្នែកសមុទ្រគ្រប់ទីកន្លែងរបស់ប្រទេស ហើយបច្ចុប្បន្នយើងកំពុងបណ្ដុះបណ្ដាលផ្សាំផ្កាថ្មរួមទាំងច្នៃផ្កាថ្មសិប្បនិម្មិតផងដែរ” ។
ចំណែកសមាគមធម្មជាតិម៉ាឡេស៊ី ផ្ដល់ការទ្រទ្រង់លើនយោបាយខាងលើ ដែលធ្វើឱ្យប្រជុំផ្កាថ្មទទួលការថែរក្សាយ៉ាងដិតដល់។ លោកយៀនឈីន អាយ ប្រធានផ្នែកអនុរក្សរបស់សមាគមបង្ហើបឱ្យដឹងថា “ទោះបីជាមិនកើតនូវផលប៉ះពាល់តាមរយៈការលុកលុយរបស់ភ្ញៀវទេសចរក៏ដោយ ប៉ុន្ដែប្រជុំផ្កាថ្មរបស់ម៉ាឡេស៊ីក៏កំពុងទទួលការគំរាមកំហែងពីសំណាក់កត្ដាជាច្រើន”។
ក្រៅពីស្ថានភាពកំដៅផែនដី ផ្កាថ្មក៏ត្រូវរំខានតាមរយៈមូលហេតុផ្សេងៗដូចជាបើកឱ្យភ្ញៀវទេសចរមុជទៅមើលដោយមិនបានស្ថិតក្រោមការគ្រប់គ្រង និងបណ្ដែតបណ្ដោយឱ្យយកវត្ថុផ្សេងៗពីលើដីទៅបង្កើត ឱ្យមានភាពកខ្វក់នៅក្នុងសមុទ្រជាដើម ៕
ចែករំលែកព័តមាននេះ