សិង្ហបូរី-ថ្ងៃទី១០ ខែមិថុនា ឆ្នាំ២០១៩ ៖ កីឡាការិនីគុនដាវកម្ពុជា ដណ្ដើមបានមេដាយមាស១ ប្រាក់១ សម្រាប់វិញ្ញាសាក្រុមនៅថ្ងៃបង្ហើយ នៃការប្រកួតកីឡាគុនដាវក្របខណ្ឌសាកលវិទ្យាល័យអាស៊ីឆ្នាំ២០១៩ នៅប្រទេសសិង្ហបូរី ។ ជ័យលាភីដែលទទួលបានខាងលើ បានមកពីវិញ្ញាសានារីដាវធំក្រុមសម្រាប់មេដាយមាស ដែលមានក្រុមចូលរួមសរុបទាំងអស់៦ក្រុម ។ ចំពោះមេដាយប្រាក់១គ្រឿងទៀត គឺទទួលបានពីវិញ្ញាសានារីដាវកាប់ក្រុម ដែលមានកីឡាការិនីមកពីវិទ្យាស្ថានទាំងអស់៧ស្ថាប័នអប់រំ។
ប្រធានប្រតិភូកីឡាគុនដាវ វេជ្ជបណ្ឌិត សុខា សុធានី បានប្រាប់ឱ្យដឹងថា នេះជាការរំពឹងទុក និងជាការត្រៀមទុកជាមុនតាំងពីឆ្នាំ២០១៨ ដោយផ្អែកលើផែនការមេរបស់សហព័ន្ធ ។ ផែន ការមេរបស់យើងមានរយៈពេល៥ឆ្នាំ ចាប់ពីឆ្នាំ២០១៧ ដល់ឆ្នាំ២០២១ ។ ជាលទ្ធផលនៃការអនុវត្តលើផែនការនេះ យើងទទួលបានសមិទ្ធផលល្អៗជាបន្ដបន្ទាប់ ដោយឆ្លុះបង្ហាញតាមរយៈការទទួលបានមេដាយប្រាក់១ និងមេដាយសំរឹទ្ធិ២ នៅឆ្នាំ២០១៧ ។ នៅឆ្នាំ២០១៨ យើងបានមេដាយប្រាក់១ និងបង្កើនមេដាយសំរឹទ្ធដល់ទៅ៣គ្រឿង ។ ចំណែកឆ្នាំនេះ អត្តពលិកគុនដាវយើងបន្ដសម្រេចគោលដៅដោយទទួលបានមេដាយមាស១គ្រឿង ប្រាក់១គ្រឿង និងសំរឹទ្ធ២គ្រឿង។
លោកស្រីវេជ្ជបណ្ឌិត បានឱ្យដឹងថា នេះជាលទ្ធផលដែលមិនគួរឱ្យជឿសម្រាប់អត្តពលិករបស់យើង ។ ជាពិសេសការចូលរួមប្រកួតលើកនេះ យើងជួបប្រទះបញ្ហាជាច្រើនលើសម្ភារប្រកួត ដែលស្ដែងចេញពីភាពខ្វះខាតរបស់អត្តពលិក និងសហព័ន្ធ ។ វាបានធ្វើឱ្យយើងបាត់បង់ពិន្ទុជាច្រើននាពេលប្រកួតដោយសារសម្ភារទាំងនោះខូច និងបាត់បង់លទ្ធភាពប្រើប្រាស់ប្រកួតបន្ដ ។ កីឡាគុនដាវជាប្រភេទកីឡាអូឡាំពិកសម្រាប់អភិជន ឬអ្នកមានក្នុងប្រទេសអភិវឌ្ឍន៍ និងមានប្រវត្តិដើមពីបណ្ដាប្រទេសលោកខាងលិច ។
សម្ភាររបស់វាមានតម្លៃថ្លៃ និងគ្មានលក់នៅប្រទេសកម្ពុជាទេ សូម្បីតែស្បែកជើង និងស្រោមជើងប្រកួត។ កីឡានេះត្រូវបានជ្រៀបចូលមកប្រទេសកម្ពុជាក្នុងសម័យអាណានិគមនិយមបារាំងនាចន្លោះសតវត្សរ៍ទី១៩ និងទី២០ ។ កាលនោះ អតីតកីឡាករ កីឡាការិនីភាគច្រើនគឺជាសែរាជវង្ស និងអភិជន ប៉ុន្ដែក្នុងពេលបច្ចុប្បន្ន គ្រូបង្វឹក និងអត្តពលិករបស់យើងទាំងអស់សុទ្ធសឹងជាយុវជនដែលមានជីវភាពខ្វះខាត និងទីទ័លក្រ បូករួមទាំងសហព័ន្ធក៏ពុំទាន់មានថវិកាគ្រប់គ្រាន់។
ដូច្នេះ រាល់ពេលចេញប្រកួតម្ដងៗ កង្វះខាតថវិកា និងសម្ភារតែងតែជាបញ្ហាចម្បងរបស់ពួកយើង ។ កត្តាខ្វះខាតនេះហើយ ក៏បាននាំឱ្យឪពុកម្ដាយរបស់អត្តពលិកបង្ខំចិត្តឱ្យកូនៗរបស់ពួកគាត់ឈប់ និងទៅរកការងារធ្វើដើម្បីជីវភាពវិញ។
ជាដំណោះស្រាយបញ្ហាខាងលើ ទាំងអ្នកគ្រប់គ្រងសហព័ន្ធ គ្រូបង្វឹក និងអត្តពលិក បានប្រឹងប្រែងរៀបចំផែនការក្នុងការហ្វឹកហាត់ ដោយកំណត់គោលដៅចូលរួមប្រកួតដណ្ដើមយកមេដាយជូនជាតិផង និងដើម្បីទទួលបានប្រាក់រង្វាន់សម្រាប់ផ្គត់ផ្គង់ជីវភាពខ្លះ ប្រើប្រាស់ក្នុងការទិញសម្ភារប្រកួតផ្ទាល់ខ្លួនខ្លះ និងធ្វើដំណើរទៅប្រកួតអន្ដរជាតិនានា ។ សម្រាប់សហព័ន្ធទទួលបន្ទុកពាក់កណ្ដាល ឬចេញដើមទុនជាមុនសិនសម្រាប់ការចូលរួម។
គួរបញ្ជាក់ថា ការប្រកួតកីឡាគុនដាវសាកល វិទ្យាល័យអាស៊ីឆ្នាំ២០១៩ ប្រព្រឹត្តទៅចាប់ពីថ្ងៃទី៨ ដល់ថ្ងៃទី១០ ខែមិថុនា ឆ្នាំ២០១៩ នៅប្រទេសសិង្ហបូរី ដោយមានការចូលរួមពីវិទ្យាស្ថានអប់រំចំនួន១៨វិទ្យាស្ថាន និងអត្តពលិក ចុះឈ្មោះប្រកួតសរុបទាំងអស់១៧៣នាក់ ៕ (កែសម្រួលដោយ ៖ បុប្ផា)
ចែករំលែកព័តមាននេះ