ប្រទេសម៉ាលី ៖ អ.ស.បបានអំពាវនាវឲ្យមានការកាន់ទុក្ខជាតិក្រោយការវាយប្រហារដែលសម្លាប់មនុស្សជិត១០០នាក់នៅម៉ាលី កាលពីយប់ថ្ងៃទី៩មក១០មិថុនា។ តាមប្រភពព័ត៌មានម៉ាលីមួយថា ភូមិជនជាតិភាគតិចDOGONរងការកម្ទេចស្ទើរទាំងស្រុង ពីសំណាក់ជនប្រដាប់អាវុធប្រមាណជា៥០នាក់។ ការសម្លាប់រង្គាលនៅភូមិSOBAME DAតំបន់MOPTI កើតមានបន្ទាប់ពីការសម្លាប់រង្គាលនាថ្ងៃទី២៣មីនា…
ប្រទេសម៉ាលី ៖ អ.ស.បបានអំពាវនាវឲ្យមានការកាន់ទុក្ខជាតិក្រោយការវាយប្រហារដែលសម្លាប់មនុស្សជិត១០០នាក់នៅម៉ាលី កាលពីយប់ថ្ងៃទី៩មក១០មិថុនា។
តាមប្រភពព័ត៌មានម៉ាលីមួយថា ភូមិជនជាតិភាគតិចDOGONរងការកម្ទេចស្ទើរទាំងស្រុង ពីសំណាក់ជនប្រដាប់អាវុធប្រមាណជា៥០នាក់។ ការសម្លាប់រង្គាលនៅភូមិSOBAME DAតំបន់MOPTI កើតមានបន្ទាប់ពីការសម្លាប់រង្គាលនាថ្ងៃទី២៣មីនា ជនជាតិភាគតិចPEUL១៦០នាក់ ដោយពួកអ្នកបរបាញ់សត្វជនជាតិភាគតិចDOGONក្នុងតំបន់នោះ ដែលក្លាយទៅជាតំបន់មានអំពើហិង្សាខ្លាំងបំផុតក្នុងប្រទេសនេះ។
ពេលនេះគឹភូមិមួយរបស់ពួកDOGONដែលរងការវាយប្រហារ បំផ្លាញអស់ស្ទើរទាំងស្រុង។ ពួកអ្នកវាយប្រហារពេលមកដល់ភ្លាម បានបាញ់ស្រោច ប្លន់់និងដុតបំផ្លាញហើយសាកសពមនុស្សច្រើននាក់ត្រូវភ្លើងឆេះរោល។ មនុស្សមួយចំនួនត្រូវចាប់អារកឬវះពោះ ជង្រុកស្រូវនិងបណ្ដាសត្វពាហនៈត្រូវដុត។ មនុស្សទាំងឡាយត្រូវសម្លាប់មិនរើសមុខថាក្មេងចាស់ប្រុសស្រីឡើយ។
អ្នកទទួលខុសត្រូវមូលដ្ឋានម្នាក់ លោកAMADOU TOGOគូសបញ្ជាក់ថា យើងរាប់ឃើញមនុស្សស្លាប់យ៉ាងតិច៩៥នាក់និងមនុស្ស៣៨នាក់រងរបួសនៅនឹងកន្លែង ហើយមនុស្សប្រមាណជា២០នាក់បាត់ខ្លួន។ សមាគមអ្នកបរបាញ់សត្វជាពួកDOGON គឺសមាគមDANNAN AMBASSAGOUដែលរដ្ឋាភិបាលប្រកាសរំលាយ កាលពីថ្ងៃទី២៤មីនាក្រោយការសម្លាប់រង្គាលនៅOGOSSAGOU បានថ្កោលទោសថានោះជាអំពើប្រល័យពូជសាសន៍មិនអាចអត់អោនឲ្យបាន។ ក្នុងសេចក្ដីប្រកាសមួយចលនានោះចាត់ទុកការវាយប្រហារនេះថា ជាការប្រកាសសង្គ្រាមមួយ។
កិច្ចប្រជុំមួយស្ដីពីបណ្ដាប្រទេសដែលរួមចំណែកផ្ដល់កងទ័ពដល់បេសកកម្មអ.ស.បនៅម៉ាលី MINUSMA ដែលមានប្រទេសកម្ពុជាដែរ គ្រោងធ្វើនាថ្ងៃទី១២មិថុនានៅអ.ស.ប ដែលក្រុមប្រឹក្សាសន្តិសុខត្រូវចេញការប្រកាសមួយនាថ្ងៃទី២៧មិថុនា ពីអាណត្តិរបស់បេសកកម្មនោះ។
ភាគខាងជើងម៉ាលីបានធ្លាក់ក្នុងការត្រួតត្រារបស់ក្រុមរដ្ឋអ៊ិស្លាម កាលពីខែមីនាមកមេសាឆ្នាំ២០១២ តែក្រុមនោះត្រូវបានកម្ចាត់មួយផ្នែកដោយសារអន្តរាគមន៍យោធា កាលពីខែមករាឆ្នាំ២០១៣តាមការផ្ដួចផ្ដើមគំនិតរបស់បារាំង ដែលអន្តរាគមន៍នោះនៅបន្តដល់សព្វថ្ងៃ។ ប៉ុន្តែតំបន់នោះទាំងមូលមិនស្ថិតក្រោមការត្រួតត្រារបស់កងទ័ពម៉ាលី បារាំងនិងអ.ស.បឡើយ ទោះជាមានការចុះហត្ថលេខា កាលពីឆ្នាំ២០១៥ លើកិច្ចព្រមព្រៀងសន្តិភាពមួយ ដែលមានគោលដៅធ្វើឲ្យពួកជីហាដស្ថិតនៅឯកោជាស្ថាព័រក្ដី។
ចាប់តាំងពីឆ្នាំ២០១៥មក អំពើហិង្សាបានរាលដាលពីភាគខាងជើងប្រទេស មកកាន់ភាគកណ្ដាល ហើយរហូតដល់ភាគខាងត្បូង។ អំពើហិង្សាទាំងនោះជារឿយៗលាយឡំដោយជម្លោះអន្តរសហគមន៍៕ (កែសម្រួលដោយ ៖ បុប្ផា)
ចែករំលែកព័តមាននេះ