ខេត្តបាត់ដំបង ៖ អគារសិក្សាដែលមានកំពស់៦ជាន់ និងមានបំពាក់ជណ្ដើរយន្ត ដែលមានតំលៃជាង១លានដុល្លារ បស់សមាគមខ្មែរ-ចិន នៅខេត្តបាត់ដំបងនឹងចាប់ផ្ដើមសាងសង់ជាផ្លូវការ ក្នុងពេលដ៏ឆាប់ៗខាងមុខនេះ។ នេះបើតាមលោកលឹម ទាឡេង ប្រធានកិត្តិយសជាន់ខ្ពស់នៃសមាគមខ្មែរ-ចិនប្រចាំខេត្តបាត់ដំបង ដែលបានថ្លែងនៅក្នុងពិធីបញ្ចុះបឋមសិលាសាលារៀនខ្មែរ-ចិនថ្មី នៅព្រឹកថ្ងៃទី១១ មិថុនា មានទីតាំងនៅខាងជើងផ្សារទំនើបភូពុយ ស្ថិតក្នុងភូមិអញ្ជាញ សង្កាត់អូរចា ក្រុងបាត់ដំបង ដែលមានមន្ត្រីរាជ ការ ប្រជាពលរដ្ឋ និងសិស្សានុសិស្សចូលរួមសរុបប្រហែល២០០នាក់ ។
នៅក្នុងពិធីនោះ លោកលឹម ទាឡេង បានថ្លែងថា នេះជាអគារសិក្សាថ្មី ដែលនឹងត្រូវរៀបចំសាងសង់នាពេលខាងមុខ ដែលមានទំហំធំជាងអគារចាស់ដែលមានស្រាប់នៅក្នុងក្រុងបាត់ដំបង ។ អគារថ្មីនេះសាងសង់លើផ្ទៃដីទំហំជិត១ម៉ឺនមែត្រការ៉េ។ លោកបានថ្លៃងទៀតថា អគារសិក្សាថ្មីរបស់សមាគមខ្មែរ-ចិននេះ បើតាមគម្រោងនឹងត្រូវសាងសង់កំពស់៦ជាន់ មានចំនួន៤៨បន្ទប់ និងបំពាក់ដោយជណ្ដើរយន្ត។ ក្រៅពីនេះក៏មានការរៀបចំសួនច្បារ មានទីតាំងកំសាន្ត មានការិយាល័យ និងបន្ទប់សម្រាប់គ្រួស្នាក់នៅផងដែរ។
បើតាមលោកលឹម ទាឡេង ប្រធានកិត្តិយសជាន់ខ្ពស់ នៃសមាគមនេះបានបញ្ជាក់ដែរថា គម្រោងនេះនឹងត្រូវចំណាយលុយជាង១លានដុល្លារ ដែលលុយទាំងនេះបានមកពីការចូលរួមរបស់សមាគមខ្មែរ-ចិន ទាំងនៅក្នុងខេត្ត និងនៅក្រៅខេត្ត ដែលបានជួយឧបត្ថម្ភជាបន្តបន្ទាប់នាពេលកន្លងមក។ លោកលឹម ទាឡេង បានបញ្ជាក់បន្ថែមថា ពេលនេះយើងមានថវិកា សម្រាប់សាងសង់បានចំនួន៣៨បន្ទប់ហើយ តែនៅសល់ចំនួន៩បន្ទប់ទៀត យើងកំពុងស្វែងរកថវិកាបន្ថែម។
ប៉ុន្តែលោកថា ដោយសារពេលនេះ យើងមិនទាន់មានថវិកាគ្រប់គ្រាន់សម្រាប់សាងសង់ យើងនឹងចាប់ផ្ដើមសាងសង់កម្ពស់៣ជាន់សិន តែយើងនឹងបុកគ្រឹះសម្រាប់សាងសង់កំពស់៦ជាន់ ហើយនៅពេលណាដែលសមាគមមានថវិកាគ្រប់គ្រាន់ យើងនឹងបន្តការសាងសង់នេះ ទៅតាមគម្រោង ។ (សម្រួលដោយ៖ ស្រីណា)
ចែករំលែកព័តមាននេះ