ខេត្តកំពង់ធំ ៖ អ្នកកាសែតមិនធ្លាប់ឮឈ្មោះម្នាក់ បានត្រូវសមត្ថកិច្ចចាប់ខ្លួនជាលើកទី៣ហើយ ក្នុងចំណោមមនុស្ស២នាក់ដែលត្រូវបានចាប់ខ្លួន ហើយក៏ត្រូវគេលាក់ការណ៍យ៉ាងជិត មិនឲ្យអ្នកណាផ្តល់ព័ត៌មានមកខាងក្រៅឡើយ តែដូចពាក្យចាស់លោកពោលថា ក្រដាសមិនអាចខ្ចប់ភ្លើងជិតទេ ។
តាមប្រភពព័ត៌មានឱ្យដឹងថា កាលពីវេលាម៉ោងប្រមាណ១០និង៤០នាទីព្រឹកថ្ងៃទី៩ ខែមិថុនា កម្លាំងនគរបាលការិយាល័យជំនាញខេត្ត សហការជាមួយនឹងនគរបាលក្រុងស្ទឹងសែន ក្រោមបញ្ជារបស់លោកស្នងការ និងមានការសម្របសម្រួលពីលោកព្រះរាជអាជ្ញាអមសាលាដំបូងខេត្ត បានចាប់ឃាត់ខ្លួនអ្នកកាសែតមិនធ្លាប់ឮឈ្មោះចំនួន២នាក់ នៅក្នុងអាហារដ្ឋានមួយកន្លែងស្ថិតនៅចំពីមុខផ្សារកំពង់ធំ ក្នុងភូមិទី១ សង្កាត់កំពង់ធំ ក្រុងស្ទឹងសែន ។
ជនជាប់ចោទទាំង២នាក់ដែលត្រូវបានចាប់ខ្លួននេះ ម្នាក់ឈ្មោះ ហ៊ាង លីហាក់ ភេទប្រុស អាយុ៥០ឆ្នាំ បានប្រាប់ថា ខ្លួនជាអ្នកសារព័ត៌មានសំឡេងសន្តិភាព និងម្នាក់ទៀតឈ្មោះ អាំង ប៊ុនហូវ ភេទប្រុស អាយុ៤១ឆ្នាំ បានប្រាប់ថាជាអ្នកសារព័ត៌មានវិថីសន្តិភាព ។ អ្នកទាំង២នាក់ ជាប់ចោទពីបទជំរិតទារប្រាក់ចំនួន១.២០០ដុល្លារ ពីលោក លី ស្រេង នាយកដែនជម្រកសត្វព្រៃអភិរក្សព្រៃឡង់ ។
ពាក់ព័ន្ធនឹងករណីខាងលើនេះ លោក លី ស្រេង បានប្រាប់កោះសន្តិភាពតាមទូរស័ព្ទនៅព្រឹកថ្ងៃទី១០ ខែ មិថុនាថា ក្រោយពីមានសារព័ត៌មានមួយចំនួនចុះផ្សាយកាលពីថ្ងៃទី៦ ខែមិថុនា ស្តីអំពីបទល្មើលព្រៃឈើ ហើយប៉ះពាល់ដល់មន្ទីរបរិស្ថាននិងមន្ទីរកសិកម្មរួចមក ស្រាប់តែនៅថ្ងៃទី៨ ខែមិថុនា លោក ហ៊ាង លីហាក់ ដែលប្រាប់ថាជាអ្នកកាសែតសំឡេងសន្តិភាព បានទូរស័ព្ទទៅលោកសួរថា«យ៉ាងម៉េចទៅហើយអាម៉ាក ឃើញគេចុះផ្សាយព្រោងព្រាត បើចង់បិទព័ត៌មានមកជួបនិយាយគ្នាមក» ។
ពួកគេបានណាត់ជួបគ្នាចរចាររឿងលុយនៅក្នុងអាហារដ្ឋានខាងលើ ដែលមានរូបលោកជាមួយលោក ហ៊ាង លីហាក់ និងលោក អាំង ប៊ុនហូវ ។ នៅក្នុងជំនួបនោះ លោក ហ៊ាង លីហាក់ និយាយថា បិទព័ត៌មានទៅពួកម៉ាក ។
លោកក៏យល់ព្រមតាម ដើម្បីកុំឱ្យមានបញ្ហា ហើយខណៈនោះលោក ហ៊ាង លីហាក់ ប្រាប់ថា គេមានគ្នា៤នាក់ ក្នុងម្នាក់សុំ៣០០ដុល្លារ ៤នាក់ស្មើនឹង១.២០០ដុល្លារ ។ លោក លី ស្រេង និយាយថា លោកយល់ព្រមឲ្យ១.២០០ដុល្លារ តែឥឡូវលោកមានតែ៥០០ដុល្លារទេក្នុងហោប៉ៅឲ្យប៉ុណ្ណឹងសិន សុំជំពាក់៧០០ដុល្លារចាំឲ្យពេលក្រោយ ពួកគេក៏យល់ព្រម ។ នៅពេលលោកហុចលុយឲ្យ ក៏ត្រូវកម្លាំនគរបាលចាប់ខ្លួនអ្នកទាំង២នាក់តែម្តង ។
ជុំវិញករណីចាប់ខ្លួនអ្នកកាសែតជាប់ចោទពីបទកំហែងយកនេះ នៅព្រឹកថ្ងៃទី១០ ខែមិថុនា កោះសន្តិភាពបានព្យាយាមសុំការបំភ្លឺពីលោក អ៊ុក កុសល ស្នងការនគរបាលខេត្ត និងលោកព្រះរាជអាជ្ញាអមសាលា ដំបូងខេត្ត តាមរយៈទូរស័ព្ទដែរតែគ្មានអ្នកទទួល ។
ចំណែកលោក ទិត្យ សំណាង ស្នងការរងទទួលផ្នែកព្រហ្មទណ្ឌប្រាប់ថា លោកជាប់រវល់នៅឯភ្នំពេញ មិនអាចឆ្លើយប្រាប់បានទេពីបញ្ហានេះ ។ គួរបញ្ជាក់ថា ឈ្មោះ ហ៊ាង លីហាក់ ត្រូវបានទូរទស្សន៍ជាតិកម្ពុជា(ទទក) បញ្ឈប់ពីការងារ ក្រោយពីសមត្ថកិច្ចមកពីក្រសួងមហាផ្ទៃចាប់វាយខ្នោះនៅស្រុកស្ទោងម្តងមកហើយ ពាក់ព័ន្ធទៅនឹងពាក្យបណ្តឹងឆបោកលុយ ។
ពេលនោះ ដោយសារតែខាងជននេះពូតែរត់ការ បានតែពីរបីថ្ងៃ ស្រាប់តែពលរដ្ឋឃើញលេចមុខគ្រហើៗនៅខេត្តកំពង់ធំដដែល ។ ក្រោយមក លោក ហ៊ាងលីហាក់ ត្រូវបានគេបញ្ឈប់ពី ទ.ទ.ក ហើយក៏រត់មកចូលទូរទស្សន៍ប៉ុស្តិ៍លេខ៥ ដោយដូរដាក់ឈ្មោះ ហេង ជលសា វិញ ។
លុះប៉ុន្មានឆ្នាំក្រោយមកទៀត ក៏ត្រូវនគរបាលចាប់ខ្លួនជាលើកទី២កាលពីព្រឹកថ្ងៃទី២៦ ខែមិថុនា ឆ្នាំ២០១៨ តាមដីកាបង្គាប់ឲ្យចាប់ខ្លួនរបស់សាលា ដំបូងរាជធានីភ្នំពេញ ។ បន្ទាប់ពីចាប់ខ្លួន បើយោងតាមព័ត៌មានដែលកោះសន្តិភាពទទួលបាន គឺជនឈ្មោះ ហ៊ាង លីហាក់ នេះជាប់ពន្ធនាគារអស់រយៈពេល១ឆ្នាំ ហើយក៏ទើបតែចេញពីគុកនៅថ្ងៃទី១០ ខែឧសភា ឆ្នាំ២០១៩ថ្មីៗនេះ បានតែរយៈពេល១ខែ ក៏ត្រូវជាប់ខ្នោះម្តងទៀតកាលពីថ្ងៃទី៩ ខែមិថុនា ឆ្នាំ២០១៩ ដែលជាលើកទី៣ ។
ទោះជាយ៉ាងណា ព័ត៌មាននៃការចាប់ខ្លួននេះត្រូវបានលាក់ការណ៍ដោយមិនមានការផ្តល់ព័ត៌មាននោះទេ ។
បើតាមព័ត៌មានដែលទទួលបានពីខាងអាជ្ញាធរស្រុកសណ្តាន់ បានត្អូញត្អែរពីក្រុមអ្នកកាន់កាតកាសែតថា យ៉ាប់ណាស់ក្រុមអ្នកកាសែតត្បាញអាយខាងលើនេះ សូម្បីតែបងប្អូនប្រជាពលរដ្ឋដែលរងគ្រោះដោយខ្យល់កន្ត្រាក់រលំផ្ទះ ដឹកសសរឬក៏ដឹកឈើបន្តិចបន្តួចមកជួសជុលផ្ទះសោះ ក៏ពួកអស់លោកទាំងនោះកាក់ជំរិតយកលុយពីពួកគាត់ដែរ ។
ចំណែកសមត្ថកិច្ចស្រុកស្ទោងវិញបង្ហើបថា ចាប់តាំងពីឆ្នាំ២០១៨មកខាងលោកទទួលបានពាក្យបណ្តឹងពីពលរដ្ឋចំនួន៥ករណី ដែលបានប្តឹងពីឈ្មោះ ហ៊ាង លីហាក់ ហើយពាក្យបណ្តឹងនេះក៏បានបញ្ជូនទៅលើអស់ហើយ តែក៏មិនឃើញមានចំណាត់ការណាមួយចំពោះជននេះះឡើយ ស្រាប់តែឃើញដីកាបង្គាប់ឲ្យនាំខ្លួនឈ្មោះនេះពីភ្នំពេញមកវិញ ៕
ចែករំលែកព័តមាននេះ