ខេត្តព្រៃវែង ៖ កាលពីថ្ងៃទី៨ មិថុនាកន្លងទៅនេះ មានករណីបុរស២នាក់បានសម្រេចចិត្តចងកសម្លាប់ខ្លួន ដែលកើតឡើងក្នុងថ្ងៃតែមួយ និងនៅកន្លែង២ផ្សេងពីគ្នា ហើយមូលហេតុក៏ផ្សេងគ្នាផងដែរ។
ករណីទី១-មានបុរសជនជាតិវៀតណាមម្នាក់ឈ្មោះ ផាម វាំងដាក អាយុ៣៣ឆ្នាំ មានទីលំនៅក្នុងភូមិភូជុង ឃុំភូតឹងបេ ស្រុកហុកងឺ ខេត្តដុងថាប់ ប្រទេសវៀតណាម បានចងកសម្លាប់ខ្លួនក្នុងបន្ទប់ដេកនៅកាស៊ីណូមួយកន្លែងដែលស្ថិតនៅបន្ទាត់ព្រំដែនកោះស្កូ ក្នុងភូមិពោធ៌ថ្មី ឃុំកោះសំពៅ ស្រុកពាមជរ ខេត្តព្រៃវែង និងត្រូវបានគេប្រទះឃើញនៅវេលាម៉ោង៧និង៣០នាទីព្រឹកថ្ងៃទី៨ មិថុនានេះ។
ចំពោះមូលហេតុនៃការចង.កសម្លាប់ខ្លួននេះត្រូវបានគេប្រាប់អោយដឹងថា ដោយសារតែជនរងគ្រោះលេងល្បែង ក្នុងកាស៊ីណូនោះ ហើយចាញ់លុយអស់មិនហ៊ានទៅផ្ទះវិញ លុះពេលសំងំនៅក្នុងបន្ទប់តែម្នាក់ឯង នំនងជារកផ្លូវដោះស្រាយជាមួយអ្នកផ្ទះមិនចេញ ក៏សម្រេចបញ្ចប់ជីវិតដោយចងកសម្លាប់ខ្លួនតែម្តងទៅ។
ចំណែកករណីទី២-មានបុរសជនជាតិវៀតណាមម្នាក់ទៀតឈ្មោះ បួយ យ៉ាំងហាំង អាយុ៥៨ឆ្នាំ មានទីលំនៅក្នុងភូមិពន្លៃ ឃុំបាបោង ស្រុកពាមរក៌ បានចងកសម្លាប់ខ្លួនដោយយកខ្សែពណ៌ខ្មៅចងភ្ជាប់ទៅនឹងរនងផ្ទះដែលមានកំពស់២ម៉ែត្រកន្លះ បណ្តាលអោយស្លាប់បាត់បង់ជីវិត កាលពីវេលាម៉ោង៧និង៣០នាទីយប់ ថ្ងៃទី៨មិថុនា និងបង្កឱ្យមានការភ្ញាក់ផ្អើលដល់អ្នកស្រុកជិតខាង រួមទាំងសមត្ថកិច្ចនាំគ្នាចុះទៅពិនិត្យកន្លែងកើតហេតុទាំងយប់។
ចំពោះមូលហេតុនៃការសម្លាប់ខ្លួននេះ ត្រូវបានក្រុមគ្រួសារអះអាងថា ដោយសារតែជនរងគ្រោះខឹងប្រពន្ធជេរស្ត្រី ហើយមូលហេតុដែលប្រពន្ធជេរស្តីនោះ គឺដោយសារតែជនរងគ្រោះ១ថ្ងៃៗគិតតែពីដើរផឹកស៊ីស្រវឹងរាល់ថ្ងៃ មិនដែលជួយធ្វើការរកស៊ីប្រពន្ធកូននោះទេ៕ (កែសម្រួលដោយ ៖ ធីតា)
ចែករំលែកព័តមាននេះ