ប្រទេសកូរ៉េ៖ បើសិនជាបានទៅលេងកោះជេជូ ភាគខាងត្បូងនៃប្រទេសកូរ៉េប្រហែលជាមិនអាចមើលរំលងបានឡើយឆ្នេរសមុទ្រមួយដ៏ល្បីលំដាប់ពិភពលោកមានឈ្មោះថា«យុង ដាម»(Yongduam) ។ ឆ្នេរនេះបានឆក់ចិត្តអ្នកទេសចរបរទេសគ្រប់ជាតិសាសន៍ទៅលេងកម្សាន្ត ។ អ្នកទេសចរគាប់ភ្នែកទស្សនាភ្នំ និងគយគន់ទឹកសមុទ្រល្វឹងល្វើយ ។…
ប្រទេសកូរ៉េ៖ បើសិនជាបានទៅលេងកោះជេជូ ភាគខាងត្បូងនៃប្រទេសកូរ៉េប្រហែលជាមិនអាចមើលរំលងបានឡើយឆ្នេរសមុទ្រមួយដ៏ល្បីលំដាប់ពិភពលោកមានឈ្មោះថា«យុង ដាម»(Yongduam) ។ ឆ្នេរនេះបានឆក់ចិត្តអ្នកទេសចរបរទេសគ្រប់ជាតិសាសន៍ទៅលេងកម្សាន្ត ។ អ្នកទេសចរគាប់ភ្នែកទស្សនាភ្នំ និងគយគន់ទឹកសមុទ្រល្វឹងល្វើយ ។
យុង ដាម (Yongduam) មានអត្ថន័យថា«ភ្នំក្បាលនាគ» គឺជាគោលដៅ ទេសចរណ៍ធម្មជាតិមួយដែលកំពុងតែទាក់ទាញជនជាតិកូរ៉េ និងអ្នកទេសចរបរទេសនានា ដែលបានទៅដល់កោះជេជូ ។ ទីនោះមានរឿងនិទានច្រើនទាក់ទងនឹងដើមកំណើតរបស់វា ។ រឿងនិទាននោះ គឺទាក់ទងនឹងជំនឿ និងរូបរាងរបស់វាដែលស្រដៀងគ្នានឹងរឿងព្រេងទាក់ទងទីតាំងរមណីយដ្ឋានធម្មជាតិមួយចំនួន នៅក្នុងប្រទេសកម្ពុជាដែរ ដូចជា ភ្នំសំពៅ ភ្នំក្រពើ ភ្នំនាងកង្រី ។
នៅពេលទៅដល់ទីនោះភ្ញៀវទេសចរអាចនឹងធ្វើដំណើរ ដោយមានវត្ថុអនុស្សាវរីយ៍ ផ្សេងៗ ដែលច្នៃប្រឌិតឡើងតាមវប្បធម៌របស់ ជនជាតិ កូរ៉េ រួមទាំងរសជាតិ ក្រូចឃ្វិចស្រស់ ដែលគេដឹងថា គឺជាផលិតផលកសិកម្ម ដ៏ចំបង និងល្បីល្បាញនៅលើកោះ ។
ក្រៅពីនេះអ្នកទេសចរ ក៏នឹងអាចឃើញសំពៅបុរាណ ដ៏ធំមួយដែលគេអះអាងថា គឺជាអតីតសំពៅ ជនបរទេសទីមួយ ដែលបានរសាត់អណ្តែត ក្រោយ ពេលដែលជួបព្យុះភ្លៀងនៅ សមុទ្រ ។ បន្ទាប់មកអ្នកទេសចរអាចនឹងបន្តដំណើរតាមផ្លូវ ដែលមានទីតាំងនៅចង្កេះភ្នំ ក្រឡឹងជុំវិញទីនោះមួយជុំ ។
បើទោះបីជាអាកាសធាតុនៅ ដើមខែមិថុនា នេះមានសភាពត្រជាក់បន្តិច ប៉ុន្តែអាចនឹង បែកញើស អាចចាត់ទុកថា ដំណើរទេសចរណ៍ នេះជាសកម្មភាពនៃការហាត់ប្រាណក៏បាន ។ ផ្លូវនៅរមណីយដ្ឋាននេះ គឺមានសភាពជាធម្មជាតិ ដែលកើតឡើងពីសំណឹកទឹករលក និង ទឹកភ្លៀង ព្រមទាំងខ្យល់ ។ ក្រៅពីនោះនៅក្នុងដំណើរ អ្នកទេសចរអាចនឹងទទួលទាន គ្រឿងសមុទ្រ មឹក ត្រី ខ្យង… ដែលអ្នកនេសាទ ជនជាតិកូរ៉េនេសាទ ឬចាប់បានពីសមុទ្រ ថ្មីៗ។
អាហារនៅទីនោះ គឺស្រស់ ហើយគេអាច ទទួលទានឆៅ តាមរបៀបជនជាតិកូរ៉េ លាយ ជាមួយនឹងស្រាបន្តិចបន្តួច ដើម្បីកម្តៅខ្លួនពីអាកាសធាតុត្រជាក់ ។ បើសិនជាមានពេលវេលា អ្នកទេសចរ ក៏អាចនឹងនេសាទ លេងកម្សាន្តផងដែរ ហើយក៏អាចគយគន់មើលសកម្មភាព របស់ស្ត្រីកូរ៉េ ដែលដើររកខ្យង រកគ្រឿង សមុទ្រ ផ្សេងៗ ។ នៅទីនោះក៏មានភោជនីយដ្ឋានគ្រឿង សមុទ្រ ជាច្រើន ។
និយាយរួមទីនោះ គឺជាកន្លែងដ៏ប្រពៃមួយដែលគេអាចនឹងធ្វើដំណើរទេសចរណ៍យ៉ាងរីករាយ ។ ពិសេសដំណើរក្រេបទឹកឃ្មុំ របស់គូស្វាមីភរិយាថ្មោងថ្មី ទើបនឹងរៀបការ ។ នៅតាមដងផ្លូវអ្នកទេសចរ ក៏អាចនឹងគយគន់ ឬក៏ចុះថតរូបផ្កាព្រៃដ៏ស្រស់ត្រកាល នៅតាមសងខាងផ្លូវទៅ និងត្រឡប់មករមណីយដ្ឋានមួយនេះ ។
កាលពីចុងខែឧសភា ឆ្នាំ ២០១៩ ក្រុមអ្នកសារព័ត៌មានអាស៊ាន ក្នុងនោះមានទាំងលោកខាត់ សាមឿន ភ្នាក់ងារកោះសន្តិភាពផង ក្រោមការដឹកនាំដោយមូលនិធិកូរ៉េបានទៅលេងកម្សាន្ត និងឈ្វេងយល់ពីសក្តានុពលនៃរមណីយដ្ឋានទេសចរណ៍យុង ដាម ផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ