អគ្គិភ័យលេបត្របាក់ផ្ទះអាជីវករ៣ខ្នង អស់ប្រមាណ៣ម៉ឺនដុល្លារ

ថ្ងៃទី ០៤ ខែ មិថុនា ឆ្នាំ ២០១៩

ម៉ោង ១៥:៣៨

ខេត្តត្បូងឃ្មុំ ៖ ផ្ទះលក់គ្រឿងទេសចំនួន៣ល្វែងសង់ពីថ្មប្រក់ស័ង្កសីមានទំហំ៩ម៉ែត្រគុណ១០ម៉ែត្រ ត្រូវអគ្គីភ័យឆាបឆេះយ៉ាងសន្ធោរសន្ធៅកាលពីវេលាម៉ោង៩យប់ថ្ងៃទី៣ មិថុនា ២០១៩ ស្ថិតនៅភូមិតាប៉ាវ ឃុំទួលស្នួល ស្រុកក្រូចឆ្មារ ។

តាមប្រភពពីនគរបាលស្រុកក្រូចឆ្មារបានប្រាប់ឲ្យដឹងថា ផ្ទះលក់គ្រឿងទេសខាងលើមានឈ្មោះសេង
ស្រីភាព ភេទស្រី អាយុ២៥ឆ្នាំ ក្នុងពេលដែលភ្លើងបានឆាបឆេះឡើងនោះ មិនមានសមាជិកគ្រួសារណាម្នាក់ដេកនៅក្នុងផ្ទះទេ គឺបានបិទទ្វារ ។ ពេលដែលភ្លើងបានចាប់ផ្តើមឆេះដំបូង មិនមាននរណាបានដឹងឡើយ ហើយបន្ទាប់មកក៏ឆេះរាលដាលខ្លាំងឡើងៗ ដោយមានអណ្តាតភ្លើង និងផ្សែងហុយ ខ្មួលខ្មាញ់ ទើបបង្កឱ្យមានការភ្ញាក់ផ្អើលឡើងតែម្តង ។

នគរបាលស្រុកក្រូចឆ្មារប្រាប់បន្តថា ពេលដែលមានអគ្គីភ័យកើតឡើង នគរបាលមូលដ្ឋានបានរាយការណ៏មកលោកអធិការនគរបាលស្រុកក្រូចឆ្មារ និងបានរាយការណ៏បន្តមកលោកស្នងការនគរបាលខេត្តក៏បានបញ្ជារឲ្យរថយន្តរបស់អធិការនគរបាល ស្រុកក្រូចឆ្មារ, ក្រុងសួង, ត្បូងឃ្មុំ, អូររាំងឪ និងក្រុមហ៊ុនចំការកៅស៊ូតាប៉ាវ សរុបចំនួន៥គ្រឿង បានចុះមកអន្តរាគមន៏បាញ់ទឹកជាបន្តបន្ទាប់ ដោយបានប្រើប្រាស់ទឹកអស់ចំនួន៧រថយន្តទើបរលត់ជាស្ថាពរ ចំពោះទ្រព្យសម្បត្តិដែលរងការខូចខាតសរុបប្រមាណ៣ម៉ឺនដុល្លារ ហើយមូលហេតុបណ្តាលមកពីទុស្សេខ្សែភ្លើង។

ក្នុងពេលមានអគ្គិភ័យខាងលើកើតឡើង ត្រូវបានលោកឧត្តមសេនីយ៍ទោ បែន រ័ត្ន ស្នងការនគរបាលខេត្តបានបញ្ជាដល់កងកម្លាំងសមត្ថកិច្ចគ្រប់លំដាប់ថ្នាក់ឲ្យចុះជួយអន្តរាគមន៍និងបានបាញ់ទឹកទប់ស្កាត់ដោយមិនឲ្យភ្លើងឆេះរាលដាលដល់ផ្ទះរបស់អាជីវករផ្សេងទៀតដែលនៅក្បែរនោះ ។ ជាមួយនោះ បងប្អូនអាជីវករនិងពលរដ្ឋនៅ ជុំវិញកន្លែងកើតហេតុក៏បានសំដែងនូវទឹកចិត្តសប្បាយរីករាយ ដែលសមត្ថកិច្ចបានចុះមកជួយបាញ់ទឹកទប់ស្កាត់ ដោយភ្លើងមិនបានឆេះរាលដាលដល់ផ្ទះរបស់ពួកគាត់៕ (កែសម្រួលដោយ ៖ ធីតា)