ខេត្តព្រៃវែង ៖ ក្រោយពីមានសារព័ត៌មានចុះផ្សាយរឿងប្រធានផ្សារក្រុងព្រៃវែង ទារយកភាស៊ីពីក្រុមអាជីវករលើសសៀវភៅបន្ទុក ថែមទាំងទារយកភាស៊ីពីក្រុមអ្នកលក់បន្លែកញ្ច្រែងល្អី បំពានទៅលើបំរាមរបស់ប្រមុខរាជរដ្ឋាភិបាលនោះ នៅថ្ងៃទី០៣ មិថុនា អាជ្ញាធរខេត្តព្រៃវែង រួមជាមួយនិងមន្ទីរសេដ្ឋកិច្ចនិងហិរញ្ញវត្ថុខេត្ត បានចុះទៅត្រួតពិនិត្យជាក់ស្ដែង និងសួរនាំដោយផ្ទាល់ជាមួយក្រុមអាជីវករ ដែលកំពុងលក់ ដូរក្នុងផ្សារក្រុងព្រៃវែង ។
ក្រោយពីជួយសួរនាំជាមួយក្រុមអាជីវករជាច្រើននាក់ និងប្រើពេលវេលាអស់មួយកំណាត់ថ្ងៃ លទ្ធផលបានរកឃើញថា ប្រធានផ្សារក្រុងព្រៃវែង ពិតជាបានយកភាស៊ីលើសសៀវភៅបន្ទុក ដែលល្មើសទៅនឹងគោលការណ៍របស់ក្រសួងសេដ្ឋកិច្ច និងហិរញ្ញវត្ថុពិតមែន ហើយថែមទាំងបានប្រើគំនាបគាបសង្កត់ក្រុមអាជីវករយ៉ាងខ្លាំងផងដែរ ។
លោក ស្រេង វ៉ន អនុប្រធានមន្ទីរសេដ្ឋកិច្ចខេត្តព្រៃវែង បានមានប្រសាសន៍ប្រាប់ក្រុមអ្នកសារព័ត៌មានថា ប្រធានផ្សារក្រុងព្រៃវែងនេះ គឺលោកឧកញ៉ា សា លាង ហើយកន្លងមក ខាងមន្ទីរសេដ្ឋកិច្ចនិងហិរញ្ញវត្ថុខេត្ត ធ្លាប់បានហៅបុគ្គលិក និងរូបលោកឧកញ៉ាផ្ទាល់ ទៅធ្វើការអប់រំណែនាំ២ ទៅ៣ដងរួចមកហើយ ។ ដោយអោយយកភាស៊ីទៅតាមសៀវភៅបន្ទុក ដែលបានកំណត់ និងមិនឱ្យយកពីក្រុមអាជីវករអ្នកលក់បន្លែត្រីសាច់ បន្តិចបន្តួច តាមកញ្ច្រែងល្អីនោះទេ ប៉ុន្តែពួកគាត់នៅតែមិនស្តាប់តាមការណែនាំដដែល ។
ដូច្នេះ ដើម្បីជាការព្រមាន ខាងមន្ទីរន ិងធ្វើកំណត់ហេតុ ព្រមទាំងផាកពិន័យទៅតាមច្បាប់ជាធរមាន ហើយបើលើកក្រោយនៅតែលួចប្រព្រឹត្តល្មើសបែបនេះទៀត មន្ទីរនិងសំរេចលុបចោលអាជ្ញាបណ្ណ័របស់លោកឩកញ៉ាតែម្តង ។
ដោយឡែក ក្រុមអាជីវករបានបញ្ជាក់ផងដែរថា ក្រុមហ៊ុនលោកឧកញ៉ា សា លាង នេះ មិនត្រឹមតែយកភាស៊ីលើសសៀវភៅបន្ទុកនោះទេ គឺថែមទាំងប្រើអំណាចរបស់ខ្លួន គាបសង្កត់ក្រុមអាជីវករយ៉ាងខ្លាំងផងដែរ ដូចជារឿងភ្លើងអគ្គិសនីជាដើម អាជីវករទាំងអស់ក្នុងផ្សារ បើចង់បានភ្លើងប្រើប្រាស់ គេមិនអោយតចេញពីបង្គោលភ្លើងនៅខាងក្រៅផ្សារទេ គឺគេអោយតចេញពីស្នាក់ការរបស់ក្រុមហ៊ុនដែលនៅក្នុងផ្សារ ក្នុងតម្លៃថ្លៃទ្វេដង គឺក្នុង១គីឡូវ៉ាត់ម៉ោងតម្លៃ១៣០០រៀល ខណៈភ្លើងខាងក្រៅត្រឹមតែ៦០០ទៅ៧០០រៀលប៉ុណ្ណោះ ។
ហើយបើមានករណីទុស្សេឆេះចេញពីតូបអ្នកណា អ្នកនោះជាអ្នកទទួលខុសត្រូវទាំងស្រុង ខាងប្រធានផ្សារមិនទទួលខុសត្រូវឡើយ ហើយទ្រព្យសម្បត្តិរបស់ក្រុមអាជីវករ ដែលទុកនៅក្នុងផ្សារ ពេលខូច ឬបាត់បង់ ក៏គេមិនទទួលខុសត្រូវដែរ និយាយរួមគ ឺគេដឹងតែយកលុយមួយមុខគត់ ។ (សម្រួលដោយ៖ ស្រីណា)
ចែករំលែកព័តមាននេះ