សេង ស្រឿន រំភើបចិត្តក្រោយឈ្នះជើងខ្លាំងកីឡាថៃជាជើងខ្លាំងម្នាក់
- ភ្នំពេញ
រាជធានីភ្នំពេញ ៖ ក្រោយដណ្ដើមបានជ័យជម្នះលើកីឡាករជើងខ្លាំងថៃ Pert Senlek កាលពីថ្ងៃ អាទិត្យ ទី២ ខែមិថុនា ឆ្នាំ២០១៩…
រាជធានីភ្នំពេញ ៖ ក្រោយដណ្ដើមបានជ័យជម្នះលើកីឡាករជើងខ្លាំងថៃ Pert Senlek កាលពីថ្ងៃ អាទិត្យ ទី២ ខែមិថុនា ឆ្នាំ២០១៩ បង្គោលក្រហមកម្ពុជា សេង ស្រឿន បានអះអាងថា ខ្លួននឹងត្រៀមខ្លួនប៉ះជាមួយកីឡាករថៃរូបនេះក្នុងជំនួបសងសឹក។ ជាមួយគ្នានោះ លោកក៏បង្ហាញពីអារម្មណ៍ខ្លះក្រោយឈ្នះពិន្ទុផងដែរ។
សេង ស្រឿន បញ្ជាក់ប្រាប់ក្រោយចុះពីសង្វៀនទូរទស្សន៍អាស៊ីអាគ្នេយ៍ថា ដ្បិតតែលោកទទួលប្រកួតតិចជាងមុន ហើយមមាញឹកខ្លាំងនឹងការរកចំណូលខាងក្រៅ ប៉ុន្តែលោកក៏មានវិធានការការពារកម្លាំងរបស់លោកមិនឱ្យបាក់ស្រុត នៅពេលឡើងប្រដាល់យូរៗម្ដងនោះដែរ។
ជាក់ស្ដែងលោកនៅតែសកម្មនឹងការហាត់រត់កុំឱ្យឆាប់ហត់ និងរមែងហ្វឹកហាត់យ៉ាងហោច១សប្ដាហ៍យ៉ាងតិច រាល់មុនពេលឡើងប្រកួតនៅលើសង្វៀនម្ដងៗ។ ក្នុងនោះការថែរក្សាសុខភាព និងវិធានការបង្វឹកផ្លូវដង្ហើមកុំឱ្យឆាប់ហត់ ក៏មិនសូវប្រហែសនោះដែរ ទើបធ្វើឱ្យការប្រកួតរបស់លោកនៅតែរក្សាបាននូវកម្លាំង និងថាមពល។
លោកថាលោកកាត់បន្ថយការប្រកួត មិនមែនមានន័យថាលោករយាលហ្វឹកហាត់ ហើយដល់ពេលឡើងរេញក៏ធ្វើឱ្យអ្នកទស្សនាខកចិត្តនោះទេ ដោយសារតែលោកក៏ត្រូវការរក្សាក្រេឌីតរបស់លោកដើម្បីកុំឱ្យស្ងប់ស្ងាត់ទីផ្សារ។ លោកថា កីឡាករថៃ គឺជាជើងខ្លាំងម្នាក់ ដែលលោកក៏បុកពោះដែរ ប៉ុន្តែបណ្ដាលមកពីលោកមិនចុះចាញ់ចំពោះការប្រកួត ទើបលោកចេះតែសម្រុកចូលដោយមិនរអារ ទើបធ្វើឱ្យលោកទទួលបានលទ្ធផលឈ្នះដោយពិន្ទុ ជាអ្វីដែលលោកចង់បាន៕ (កែសម្រួលដោយ ៖ បុប្ផា)
ចែករំលែកព័តមាននេះ