សហរដ្ឋអាមេរិក ៖ កាលពីថ្ងៃទី៣០ឧសភាតាមTWITTER ប្រធានាធិបតីអាមេរិកលោកដូណាល់ត្រាំពោលជាលើកដំបូងថា រុស្ស៊ីបានជួយលោកឲ្យឈ្នះឆ្នោត ក្នុងការបោះឆ្នោតប្រធានាធិបតីខែវិច្ឆិកាឆ្នាំ២០១៦ មុនពេលលេបសម្ដីនោះវិញយ៉ាងរហ័ស។
លោកត្រាំលើកឡើងថា គេនាំគ្នានិយាយពីរុស្ស៊ី រុស្ស៊ី រុស្ស៊ី! នេះជាពាក្យដែលគេស្ដាប់ឮតាំងពីដំបូង។ ពេលនេះពាក្យរុស្ស៊ី រុស្ស៊ីនោះបានបាត់ទៅវិញហើយ ក្រោយរុស្ស៊ីជួយខ្ញុំឲ្យជាប់ឆ្នោត។ តែមិនដល់១ម៉ោងបន្ទាប់ពីនេះ នៅឯទីធ្លានៃសេតវិមាន លោកបានលេបសម្ដីនោះវិញ។ លោកថារុស្ស៊ីពុំបានជួយខ្ញុំឲ្យជាប់ឆ្នោតឡើយ។ លោកកែសម្ដីនេះមុនពេលជិះយន្តហោះទៅកាន់កូឡូរ៉ាដូ។
ពាក្យពេចន៍ផ្ទុយគ្នានេះកើតមានបន្ទាប់ពីសេចក្ដីថ្លែងការណ៍ជាសាធារណៈដំបូង របស់រដ្ឋអាជ្ញាពិសេសលោកROBERT MUELLERដែលស៊ើបអង្កេត លើការសង្ស័យពីការជ្រៀតជ្រែករបស់រុស្ស៊ី ចូលក្នុងការបោះឆ្នោតប្រធានាធិបតីអាមេរិក។ រដ្ឋអាជ្ញារូបនោះបានធ្វើការសន្និដ្ឋានថា គេមិនអាចចោទប្រកាន់លោកត្រាំបានឡើយ បើតាមបទបញ្ជាទាំងឡាយដែលមានជាធរមានរបស់ក្រសួងយុត្តិធម៌៕ (កែសម្រួលដោយ ៖ បុប្ផា)
ចែករំលែកព័តមាននេះ