ប្រទេសហុងគ្រី ៖ នាវាមួយគ្រឿងដែលដឹកអ្នកទេសចរកូរ៉េខាងត្បូង បានលិចកាលពីថ្ងៃទី២៩ ឧសភា ក្នុងទន្លេ DANUBE ក្រុងប៊ុយដាបែ៉ស បណ្ដាលឲ្យមនុស្សស្លាប់៧នាក់ ហើយ១៩នាក់បាត់ខ្លួន។
បណ្ដាសារព័ត៌មានហុងគ្រី និងក្រុងសេអ៊ូលលើកពីលទ្ធភាពនៃការបុកគ្នា។ អាជ្ញាធរហុងគ្រីនិងកូរ៉េខាងត្បូង ប្រកាសពីអ្នកដំណើរស្លាប់៧នាក់ ពេលនាវានោះលិចខណៈកំពុងបើកកម្សាន្តក្នុងទន្លេDANUBE ជាទន្លេមួយដែលហូរកាត់រដ្ឋធានីហុងគ្រី និងជាកន្លែងទាក់ទាញអ្នកទេសចរទូទាំងពិភពលោក។ យោងតាមក្រសួងការបរទេសកូរ៉េខាងត្បូងថា ជនជាតិប្រទេសនោះ៣៣នាក់ជិះក្នុងនាវានេះ ហើយ១៩នាក់បាត់ខ្លួន ចំណែកមនុស្ស៧នាក់អាចជួយសង្គ្រោះ។
ក្នុងសន្និសីទសារព័ត៌មានមួយនាកន្លែងធ្វើអន្តរាគមន៍ លោកPAL GYORFIអ្នកនាំពាក្យភ្នាក់ងារសង្គ្រោះបញ្ជាក់ថា មនុស្ស៧នាក់បញ្ជូនទៅមន្ទីរពេទ្យ។ នាវានោះក៏ដឹកសមាជិកក្រុមនាវិកជនជាតិហុងគ្រី២នាក់ផងដែរ។ យោងតាមបណ្ដាសារព័ត៌មានហុងគ្រីថា នាវាប្រវែង២៦ម៉ែត្រនោះបានលិច ក្រោយពីបុកគ្នាជាមួយនាវាមួយគ្រឿង នៅក្បែរសភាក្រុងប៊ុយដាប៉ែស។ ក្រុងសេអ៊ូលក៏និយាយដែរពីការបុកគ្នាជាមួយនាវាចម្បាំង១គ្រឿង។ មូលហេតុនៃគ្រោះថ្នាក់នោះនៅពុំទាន់មានការធ្វើអត្ថាធិប្បាយនៅឡើយ របស់ប្រភពផ្លូវការហុងគ្រី។
ដោយសារមានភ្លៀងធ្លាក់ខ្លាំងនាថ្ងៃទី២៩ឧសភា និងចាប់ពីដើមខែឧសភាមក នាំឲ្យទន្លេDANUBEមានទឹកហូរកួចខ្លាំង បង្កការលំបាកក្នុងការជួយសង្គ្រោះ ហើយនាំឲ្យគេគិតថាចំនួនជនរងគ្រោះនឹងមានខ្ពស់ថែមទៀត៕ (កែសម្រួលដោយ ៖ បុប្ផា)
ចែករំលែកព័តមាននេះ