ប្រទេសស៊ីរី ៖ របបស៊ីរីគាំទ្រដោយសម្ព័ន្ធមិត្តរុស្ស៊ីនាថ្ងៃទី២៩ឧសភា បន្តទម្លាក់គ្រាប់បែកខ្លាំងក្លា លើខេត្តអុីដលីបភាគខាងជើងប្រទេស។ តំបន់នោះរងការវាយប្រហារតាមអាកាសខ្លាំងចាប់តាំងពី១ខែមកហើយនាំឲ្យគេគិតថា របបនោះអាចធ្វើការវាយលុកដ៏ចម្បងមួយ ដណ្ដើមយកទីតាំងធំចុងក្រោយនេះរបស់ពួកជីហាដ។
គឺពួកជីហាដក្រុមHAYAT TAHRIR AL CHAMអតីតសាខាអាល់កៃដានៅស៊ីរី ដែលជាអ្នកគ្រប់គ្រងខ្លាំងជាងគេ ក្នុងខេត្តអុីដលីប និងតំបន់មួយចំនួនក្នុងខេត្តហាម៉ា អាឡែបនិងឡាតាគីយ៉េជិតខាង។ តំបន់នៅជាប់ព្រំដែនតួកគីនោះជាតំបន់ការពារ ដោយកិច្ចព្រមព្រៀងមួយស្ដីពីតំបន់ហាមមិនឲ្យមានយោធា ដែលចុះហត្ថលេខាកាលពីខែកញ្ញាឆ្មាំ២០១៨ រវាងក្រុងមូស្គូសម្ព័ន្ធមិត្តរបបសីុរីនិងក្រុងអង់ការ៉ា ដែលជាអ្នកជួយទ្រទ្រង់ក្រុមឧទ្ទាមមួយចំនួន។
គោលដៅគឹបង្កើតតំបន់ទ្រនាប់មួយ ដែលបែងចែកបណ្ដាដែនដីរបស់ពួកបះបោរនិងពួកជីហាដ ឲ្យដាច់ពីបណ្ដាតំបន់កាន់កាប់របស់រដ្ឋាភិបាល។ គោរពមួយផ្នែក ការផ្ដួចផ្ដើមគំនិតនោះអាចចៀសវាង ការវាយលុកទ្រង់ទ្រាយធំរបស់កងទ័ពស៊ីរី។ ប៉ុន្ទែទោះជាយ៉ាងនោះក្ដី ការវាយប្រហារតាមអាកាសរបស់កងទ័ពស៊ីរីនៅបន្តមានជាហូរហែ មុនពេលមានការបង្កើនខ្លាំងចាប់ពីដំណាច់ខែមេសាមក ហើយគួបផ្សំនឹងការវាយប្រហារនៅលើដី។
អង្គការសិទ្ធិមនុស្សស៊ីរីOSDHមានប្រភពព័ត៌មានច្រើនក្នុងប្រទេសនិយាយថា ការបង្កើនការវាយប្រហារតាមអាកាស បានសម្លាប់ជនស៊ីវិលជាង២៧០នាក់ហើយ រយៈពេល១ខែ ហើយមនុស្សប្រមាណជា២៧០.០០០នាក់រត់ភៀសខ្លួន។ នៅមុខក្រុមប្រឹក្សាសន្តិសុខអ.ស.ប តំណាងរបស់ស៊ីរី អះអាងកាលពីថ្ងៃទី២៨ឧសភា ពីការប្ដេជ្ញាចិត្តរបស់រដ្ឋាភិបាលវាយដណ្ដើមយកអុីដលីប៕ (កែសម្រួលដោយ ៖ បុប្ផា)
ចែករំលែកព័តមាននេះ