ផ្លែប័រអាចមានផ្ទុកជាតិកាឡូរីនិងជាតិខ្លាញ់ខ្ពស់ ប៉ុន្តែវានៅតែជាប្រភពដ៏ល្អបំផុតមួយនៃសារធាតុចិញ្ចឹមនិងសារធាតុផ្សេងៗទៀតដែលចាំបាច់ក្នុងការរក្សាសុខភាពបេះដូងរឹងមាំ។ ភាគច្រើននៃពួកយើងសុទ្ធតែស្គាល់ ហើយអាចនឹងឧស្សាហ៍ទទួលទានផ្លែប័រ ប៉ុន្តែប្រហែលជាមិនធ្លាប់បានដឹងអំពីអត្ថប្រយោជន៍ដ៏គួរអោយភ្ញាក់ផ្អើលរបស់ផ្លែឈើនេះចំពោះសុខភាពឡើយ។ ថ្ងៃនេះវេបសាយសុខភាព Health.com.kh នឹងបង្ហាញអោយដឹងពីមូលហេតុដែលអ្នកគួរទទួលទានផ្លែប័រជាប្រចាំ ៖
១. កាត់បន្ថយកម្រិតកូឡេស្តេរ៉ូល ៖ នោះក៏ព្រោះតែផ្លែប័រជាប្រភពដ៏ប្រសើរនៃអាស៊ីត oleic និងជាតិខ្លាញ់ដែលជួយកាត់បន្ថយកម្រិតនៃជាតិកូឡេស្តេរ៉ូលមិនល្អ។ ផ្លែប័រក៏ជាប្រភពនៃវីតាមីន E ដែលអាចបញ្ឈប់អុកស៊ីតកម្មនៃកូឡេស្តេរ៉ូលផងដែរ។ ដូច្នេះចូរព្យាយាមទទួលទានផ្លែប័រម្ខាងរាល់ថ្ងៃជាប្រចាំ ដើម្បីជៀសផុតពីបញ្ហាកម្រិតមិនល្អឡើងខ្ពស់។
២. ជួយអោយស្រកទម្ងន់ ៖ មានផ្ទុកសម្បូរទៅដោយជាតិខ្លាញ់សុខភាពល្អ monounsaturated ប្រូតេអុីន ជាតិសរសៃ និងសារធាតុចិញ្ចឹមដែលផ្ដល់អត្ថប្រយោជន៍ចាំបាច់ជាច្រើន ពិសេសកំឡុងពេលអ្នកកំពុងព្យាយាមសម្រកទម្ងន់។ ផ្លែប័រក៏ជាប្រភពនៃអាស៊ីតខ្លាញ់ oleic ដែលជួយធ្វើអោយអ្នកឆាប់ឆ្អែត និងឆ្អែតបានយូរផងដែរ។
៣. បន្សាបជាតិពុលពីថ្លើម ៖ ផ្លែប័រមានឥទ្ធិពលមិនគួរអោយជឿក្នុងការជម្រុញពង្រឹងប្រព័ន្ធភាពស៊ាំនៃរាងកាយ ហើយវាក៏ធ្វើអោយប្រព័ន្ធរំលាយអាហារមានភាពប្រសើរឡើងទៀតផង។ ផ្លែប័រក៏មានផ្ទុកសារធាតុ glutathione រួមទាំងសារធាតុប្រឆាំងបាក់តេរីនិងអុកស៊ីតកម្មដែលជួយសម្អាតថ្លើម ក៏ដូចជាកម្ចាត់ជាតិពុល។ ហើយផ្លែប័រក៏ជួយថ្លើមក្នុងដំណើរការបន្សាបជាតិពុល ឬបញ្ចេញជាតិពុល និងសារធាតុគីមីគ្រោះថ្នាក់ចេញពីរាងកាយតាមរយៈទឹកនោម និងលាមកផងដែរ។ ដូច្នេះដើម្បីជាការប្រសើរ ចូរព្យាយាមទទួលទានផ្លែឈើនេះជាប្រចាំ។
៤. ទប់ស្កាត់ជំងឺពុកឆ្អឹង ៖ ផ្លែប័រក៏ជាប្រភពដ៏ល្អបំផុតមួយនៃវីតាមីន K ដែលចាំបាច់សម្រាប់រក្សាសុខភាពឆ្អឹងដោយវាជួយបង្កើនការស្រូបយកជាតិកាល់ស្យូមរបស់រាងកាយនិងកាត់បន្ថយការបញ្ចេញកាល់ស្យូមច្រើនពេកតាមរយៈទឹកនោម។
៥. បង្កើនសុខភាពស្បែក ៖ ដើម្បីរក្សាបាននូវស្បែកដែលមានសុខភាពល្អ ក្មេងជាងវ័យ និងស្រស់ស្អាត អ្នកគួរទទួលទានផ្លែប័រជាប្រចាំនោះក៏ព្រោះតែផ្លែឈើនេះជាប្រភពដ៏ល្អបំផុតមួយនៃជាតិខ្លាញ់សុខភាពល្អនិងវីតាមីន E។
៦. ទប់ស្កាត់ការរលាកក្នុងរាងកាយ ៖ ផ្លែប័រមានផ្ទុកជាតិខ្លាញ់ល្អ monounsaturated ជាតិសរសៃ វីតាមីន ម៉ាញ៉េស្យូម និងប៉ូតាស្យូម ដែលជួយទប់ស្កាត់ប្រយុទ្ធប្រឆាំងការរលាកក្នុងរាងកាយបានយ៉ាងប្រសើរ។
៧. សម្រាលអាការៈមុនពេលមករដូវ ៖ គ្រាន់តែទទួលទានផ្លែប័រមួយចំហៀង អាការៈឈឺចាប់ពេលមករដូវនឹងបាត់ទៅវិញយ៉ាងឆាប់រហ័ស។ នោះក៏ព្រោះតែផ្លែឈើនេះមានផ្ទុកសម្បូរទៅដោយជាតិសរសៃ ប៉ូតាស្យូម ជាតិខ្លាញ់ល្អ និងម៉ាញ៉េស្យូមដែលជួយគ្រប់គ្រងតុល្យភាពនៃអ័រម៉ូន។
៨. បញ្ចុះសម្ពាធឈាម ៖ ផ្លែប័រមានផ្ទុកសម្បូរទៅដោយប៉ូតាស្យូមដែលជួយបញ្ចុះសម្ពាធឈាមបានយ៉ាងប្រសើរ។ ក្រៅពីនេះផ្លែប័រ ក៏ជាប្រភពនៃសារធាតុ carotenoids ដែលជួយប្រយុទ្ធប្រឆាំងនឹងជំងឺផ្សេងៗច្រើនទៀតផងដែរ (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ