ខេត្តបាត់ដំបង ៖ ជាមួយនឹងការពោលពាក្យលំបាកនេះ អ្នកស្រី ឈឿន ឈុនលី ក៏បានលើកសរសើរកូនស្រីពិការនេះដែរថា «ពិតមែនតែនាងពិការ និងបង្កការលំបាកច្រើនដល់ខ្ញុំ តែស្រីហង្ស រៀនពូកែខ្លាំងណាស់ ។ កាលពីនៅរៀនថ្នាក់បឋម ឬថ្នាក់មធ្យមសិក្សា នាងរៀនជាប់លេខ១ស្ទើររាល់ខែឬរាល់ឆ្នាំ តែពេលទៅរៀននៅវិទ្យាល័យ ចំណាត់ថ្នាក់នាងបានថយចុះបន្តិច មកត្រឹមចន្លោះពីលេខ២ ដល់លេខ
៤» ។
អ្នកស្រី ឈុន លី ក៏បានលើកឡើងដែរថា កាលពីសប្ដាហ៍មុននេះ កូនស្រីគាត់ត្រូវបានឯកឧត្តម លោក
ជំទាវ នៅក្នុងក្រសួង និងតាមស្ថាប័នរដ្ឋមួយចំនួន ជួយឧបត្ថម្ភជាថវិកា និងសម្ភារសិក្សាមួយចំនួន ថែមទាំងទទូលបានអំណោយម៉ូតូ១គ្រឿងពីលោកឯកឧត្តម ខៀវ កាញារិទ្ធ រដ្ឋមន្ត្រីក្រសួងព័ត៌មានទៀតផង ដែលជាការលើកទឹកចិត្តដល់កូនស្រីគាត់ក្នុងការប្រឹងប្រែងរៀនសូត្រ ។
អ្នកស្រីបាននិយាយទៀតថា កូនស្រីពិការនេះ មានក្ដីស្រម៉ៃខ្ពស់ជាងការគិតរបស់គាត់ទៅទៀត អំពីការងារនិងការរៀនសូត្រទៅថ្ងៃអនាគត ហើយពេលនៅផ្ទះនាងមិនបានធ្វើអ្វីក្រៅតែពីមើលសៀវភៅនោះទេ ។ គួររំលឹកថា៖ លោករដ្ឋមន្ត្រី ខៀវ កាញារីទ្ធ ផ្តល់ម៉ូតូឱ្យគេឌុបនាងមករៀន
នៅក្នុងថ្នាក់រៀនដ៏ស្ងាត់ជ្រងំ នាវេលាថ្ងៃត្រង់ទៅហើយ គេឃើញមានតែយុវសិស្ស២នាក់ប៉ុណ្ណោះ ដែលសម្ងំនៅក្នុងថ្នាក់ គឺកញ្ញា ស៊ិន ស្រីហង្ស និងមិត្តសម្លាញ់របស់នាង វិន ស្រីជីម ។ ស្រីហង្សអង្គុយលើរទេះ រុញតូចមួយ ខណៈស្រីជីម មិត្តសម្លាញ់អង្គុយអមយ៉ាងកៀកនៅខាងឆ្វេងដៃ ដែលមានតែប៊ិក និងសៀវភៅប៉ុណ្ណោះ នៅចំពោះមុខពួកនាង ។
ស្រីហង្ស បានរៀបរាប់ជាច្រើន នៅក្នុងគ្រានោះ អំពីដំណើរជីវិត និងការសិក្សារបស់នាង ចាប់តាំងពីថ្នាក់ដំបូង រហូតនាងបានមករៀនថ្នាក់ទី១១ នៅវិទ្យាល័យសំឡូត នាបច្ចុប្បន្ន។ ប៉ុន្តែការបរិយាយរបស់នាង ហាក់មិនបាននិយាយអំពីគោលដៅច្បាស់លាស់ នៃការសិក្សាទេ បើទោះជានាងបានទទូលស្គាល់ខ្លួនឯងថា ជាសិស្សពូកែគ្រាន់បើក្ដី។ ផ្ទុយទៅវិញ នាងបែរជាបង្ហើបឲ្យដឹងពីជំនាញដែលកំពុងស្ថិតក្នុងក្ដីស្រម៉ៃរបស់នាង ខុសពីមុខការសិក្សាសព្វថ្ងៃទៅវិញ ។
ក្តីស្រម៉ៃចង់ក្លាយជាតារាចម្រៀងនិងពិធីករ នៅពេលសួរថា ប្រសិននាងបានរៀនដល់ថ្នាក់មហាវិទ្យាល័យ តើនាងនឹងចាប់យកជំនាញអ្វី ? ស្រីហង្ស គ្រវីក្បាល ហាក់រារែកបន្តិចក្នុងការផ្ដល់ចម្លើយ តែយ៉ាងណានាងឆ្លើយថា «ខ្ញុំនឹងខំរៀនចប់ថ្នាក់មហាវិទ្យាល័យ…តែខ្ញុំមិនទាន់បានគិតចាប់យកជំនាញអ្វីឲ្យជាក់លាក់នៅឡើយទេ… តែបើខ្ញុំចង់ចាប់យកជំនាញអ្វីមួយ ខ្ញុំត្រូវសួរខ្លួនឯងថា តើអាចធ្វើបានឬអត់ បើខ្លួនឯងពិការអញ្ចឹង ? ដូច្នេះខ្ញុំមិនទាន់គិតពីរឿនហ្នឹងទេ» ។
នៅក្នុងក្ដីស្រម៉ៃរបស់នាងនៅពេលនេះ ក្រៅពីការសិក្សា តើនាងចង់ធ្វើអ្វីនៅថ្ងៃអនាគត ? ស្រីហង្ស ហាក់បានបង្ហាញនៅភាពរីករាយ រួចផ្ដល់ចម្លើយទាំងញញឹមថា «ខ្ញុំចង់ក្លាយជាតារាចម្រៀង ឬធ្វើជាពិធីករក្នុងកម្មវិធីផ្សាយព័ត៌មានតាមកញ្ចក់ទូរទស្ស ឬ តាមវិទ្យុផ្សាយសំឡេងណាមួយ ។ ព្រោះខ្ញុំមើលទៅការងារបែបហ្នឹង ប្រហែលខ្ញុំអាចធ្វើបាន ហើយខ្ញុំក៏ចេះច្រៀងខ្លះៗដែរ» ។
អ្នកស្រី ឈឿន ឈុនលី បានសើច…ដែលបង្ហាញពីភាពរីករាយផងដែរ ហើយថែមទាំងងក់ក្បាល ស្វាគមន៍ទៀតផង នៅពេលឮថា កូនស្រីមានចំណង់ចំណូលចិត្តផ្នែកសិល្បៈបែបនេះ ។ អ្នកស្រីបានចាក់ខ្សែបណ្ដោយតាមកូនស្រីថា តាមពិតកូនស្រីគាត់ចេះច្រៀង និងធ្លាប់ប្រឡងចម្រៀងតាមខុនសឺត ដែលសម្ដែងតាមភូមិជាប់លេខ១ទៀតផង ។
អ្នកស្រីហាក់មានសុទិដ្ឋិនិយមថា «ខ្ញុំមានជំនឿថា ស្រីហង្ស នឹងធ្វើការងារនេះបាន ។ ព្រោះនាងចូលចិត្តបែបនេះ ហើយពេលដែលនាងបានជួបជាមួយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ស្រីហង្ស ក៏បាននិយាយពីចំណង់ចំណូលចិត្តរបស់នាង ប្រាប់គាត់ដែរ នៅពេលគាត់សួរនាំអំពីរឿងអនាគត» ។
អ្នកស្រី ឈឿន ឈុនលី បាននិយាយអំពីរឿងនេះថា លោករដ្ឋមន្ត្រីក្រសួងព័ត៌មាន និងលោកជំទាវ បានជួយឧបត្ថម្ភម៉ូតូ១គ្រឿងដល់កូនស្រីគាត់ ដើម្បីលើកទឹកចិត្តឲ្យប្រឹងប្រែងរៀនសូត្រ ហើយលោករដ្ឋមន្ត្រី ក៏បានលើកឡើងដែរអំពីចំណង់ចំណូលចិត្ត នាងស្រីហង្ស ដែលមានបំណងចង់ក្លាយជាពិធីករផ្សាយព័ត៌មាន ។
អ្នកស្រី បានស្រង់សម្តីលោក ខៀវ កាញារីទ្ធ យ៉ាងដូច្នេះថា លោករដ្ឋមន្ត្រីបានមានប្រសាសន៍តបវិញថា លោកនឹងជួយជ្រោមជ្រែង នាងស្រីហង្ស តែទុកឲ្យនាងរៀនចប់សិន ។ ព្រោះនៅខេត្តបាត់ដំបង វិទ្យុក៏មានទូរទស្សក៏មាន ដូច្នេះទុកឪកាសឲ្យនាងរៀនចប់សិនទើបជាការល្អ ។
ទោះយ៉ាងណា ពាក់ព័ន្ធនឹងកញ្ញា ស៊ិន ស្រីហង្ស នេះដែរ លោក ហួត សុខុម នាយកវិទ្យាល័យសំឡូត បានមានប្រសាសន៍ថា ស៊ិន ស្រីហង្ស ពិតមែនតែនាងពិការ តែនាងជាសិស្សពូកែម្នាក់ ឧស្សាហ៍ព្យាយាមក្នុងការរៀនសូត្រ។
លោកបានបន្តថា ថ្ងៃខ្លះនាងត្រូវរៀនដល់ទៅ២ពេល ធ្វើឲ្យនាងមិនបានទៅផ្ទះទេ ដោយសារពិបាកធ្វើដំណើរទៅមកសាលា ។ ប៉ុន្តែនាងមានមិត្តភក្ដិជួយមើលការខុសត្រូវ ពេលណាមិនបានទៅផ្ទះ ហើយបើពិនិត្យលើទិដ្ឋភាពជាក់ស្ដែង នាងពិតជាជួបការលំបាកមែន តែយ៉ាងណាមើលទៅនាងមានការតស៊ូខ្លាំងណាស់ក្នុងការរៀនសូត្រ ។ គួររំលឹកទៀតថា៖ ដ្បិតខ្វះកាយសម្បទា…តែប្រាជ្ញា សមត្ថភាព តស៊ូ ឆន្ទះ និងក្តីប្រាថ្នាមិនខ្វះឡើយ
យើងសូមជូនពរចំពោះស្រីហង្ស ដែលមានក្តីប្រាថ្នាយ៉ាងណានោះសូមឱ្យទទួលជោគជ័យក្នុងជីវិតកុំបីឃ្លៀងឃ្លាតឡើយ ៕ (សម្រួលដោយ៖ ស្រីណា)
ចែករំលែកព័តមាននេះ