ខេត្តមណ្ឌលគិរី ៖ មនុស្ស៥នាក់ត្រូវបានសមត្ថកិច្ចឃាត់ខ្លួន ខណៈពួកគេកំពុងស្នាក់នៅក្នុងជំរំកណ្តាលព្រៃជ្រៅ ក្នុងដែនជម្រកការពារសត្វព្រៃស្រែពក ក្នុងភូមិសាស្ត្រស្រុកពេជ្រាដា កាលពីល្ងាចថ្ងៃទី២៦ ឧសភា ហើយត្រូវបានបញ្ជូនមកកាន់មន្ទីរបរិស្ថានខេត្តទាំងយប់ ដើម្បីស្រាវជ្រាវជុំវិញបទល្មើសរបស់ពួកគេ…
ខេត្តមណ្ឌលគិរី ៖ មនុស្ស៥នាក់ត្រូវបានសមត្ថកិច្ចឃាត់ខ្លួន ខណៈពួកគេកំពុងស្នាក់នៅក្នុងជំរំកណ្តាលព្រៃជ្រៅ ក្នុងដែនជម្រកការពារសត្វព្រៃស្រែពក ក្នុងភូមិសាស្ត្រស្រុកពេជ្រាដា កាលពីល្ងាចថ្ងៃទី២៦ ឧសភា ហើយត្រូវបានបញ្ជូនមកកាន់មន្ទីរបរិស្ថានខេត្តទាំងយប់ ដើម្បីស្រាវជ្រាវជុំវិញបទល្មើសរបស់ពួកគេ ។
ជុំវិញករណីខាងលើនេះ គិតត្រឹមវេលាម៉ោង៤ និង៣០នាទីរសៀលថ្ងៃទី២៧ ឧសភា មន្ត្រីជំនាញពាក់ព័ន្ធទាំងអស់ ក្នុងខេត្តមណ្ឌលគិរី អ្នកកាសែតមិនអាចសុំការបំភ្លឺបានទេពីករណីនេះ តែបើតាមប្រភពក្រៅផ្លូវការបានឲ្យដឹងថា មនុស្សទាំងប្រាំនាក់ដែលសមត្ថកិច្ចឃាត់ខ្លួនបាននោះ ជាប្រជាជនរស់នៅឃុំក្រង់តេះ ស្រុកពេជ្រាដា ពួកគាត់មិនមានជាប់ពាក់ព័ន្ឋនឹងការបរបាញ់សត្វព្រៃឡើយ តែពួកគាត់ចូលទៅតំបន់នោះដើម្បីអារគល់ឈើប្រណីតដែលនៅសល់ពីការកាប់កន្លងមក ដើម្បីយកគល់ទៅច្នៃជាកូនក្រឡឹង យកទៅលក់ដែលនេះជាមុខរបររបស់ពួកគាត់ជាអ្នកស្រុកព្រៃ ។
ប្រភពដដែលបានឲ្យដឹងទៀតថា ចំពោះសាច់ប្រើសដែលគេប្រទះឃើញសេសសល់នៅកន្លែងក្រុមអ្នកអារឈើស្នាក់នៅនោះ គឺមន្ត្រីប៉ូលិសម្នាក់ប្រចាំនៅប៉ុស្តិ៍៤ (ប៉ុស្តិ៍ការពារព្រំដែន) ជាអ្នកយកទៅឲ្យពួកគាត់ហូប ហើយជំរំដែលស្នាក់នៅកណ្តាលព្រៃនោះ គឺបានប្រទះឃើញគេសង់រួច តែគ្មានមនុស្សនៅ ទើបនាំគ្នាចូលទៅស្នាក់នៅបណ្ណោះអាសន្ន ដើម្បីអារគល់ឈើ តែត្រូវក្រុមល្បាតព្រៃប្រទះឃើញក៏ចាប់ឃាត់ខ្លួនតែម្តង ជាមួយបំណែកសត្វព្រៃខ្លះ ។
ក្នុងប្រតិបត្តិការចាប់ឃាត់ខ្លួនមនុស្ស៥នាក់ ដែលចូលទៅអារគល់ឈើក្នុងតំបន់ហាមឃាត់នេះ គេសង្កេតឃើញមានវត្ថុតាងមួយចំនួន ក៏ត្រូវបានរឹបអូសពីកន្លែងកើតហេតុដូចជា ម៉ូតូកែច្នៃ ម៉ាស៊ីនត្រង់សឺន័រអារឈើ ប៊ីដុងសាំង ក្បាលសត្វប្រើសមួយ បំណែកជើងរួមនឹងសាច់សត្វព្រៃជាច្រើនដុំ ។
ចំពោះសេចក្តីរាយការណ៍ដាច់ដោយឡែកមួយទៀតបានឲ្យដឹងថា កាលពីថ្ងៃទី២២ ឧសភា មានរូបភាពជាច្រើនសន្លឹកត្រូវបានបែកធ្លាយបង្ហាញពីសកម្មភាពមួយចំនួនក្នុងប៉ុស្តិ៍ការពារព្រំដែន(ប៉ុស្តិ៍៤) ចំណុះឲ្យវរៈសេនាតូចនគរបាលការពារព្រំដែនគោកលេខ៣០៣ ។
ក្នុងរូបភាពនោះ គេសង្កេតឃើញមានជនជាតិវៀតណាមដេកក្នុងបរិវេណប៉ុស្តិ៍របស់ខ្មែរម៉ាសេរី រួមនឹងកាំភ្លើងសង្ស័យខុសច្បាប់២ដើម ។ ម៉ូតូពាក់ស្លាកលេខវៀតណាម១គ្រឿង ម៉ូតូកែច្នៃដឹកឈើច្រើនគ្រឿង ហើយនឹងសត្វឈ្លូសងាប់ក្នុងកន្ត្រកចំនួន៥ក្បាល ។ ក្នុងករណីនេះមានព័ត៌មានបែកធ្លាយថា លោកនាយរងប៉ុស្តិ៍ក្បាលដំរី(ប៉ុស្តិ៍៤)បានឲ្យជនជាតិវៀតណាមចូលមកបរបាញ់បានសត្វឈ្លូស៥ក្បាល ។ ជនជាតិវៀតណាមមានចំនួន៥នាក់ មានម្នាក់ត្រូវគេស្គាល់ឈ្មោះថាអាកឿង ។
ទោះជាយ៉ាងណា ព័ត៌មានដែលថា មានមន្ត្រីនគរបាលការពារព្រំដែនបើកដៃឲ្យជនជាតិវៀតណាមចូលដីខ្មែរ ប្រព្រឹត្តសកម្មភាពខុសច្បាប់ខាងលើនេះ កោះសន្តិភាពមិនអាចសុំការបំភ្លឺពីលោកនាយរងប៉ុស្តិ៍បបានទេ នាល្ងាចថ្ងៃទី២៧ ឧសភា ហើយការពិតបែបណានោះ ក៏មិនទាន់មានការបំភ្លឺច្បាស់លាស់នៅឡើយ
ដែរ ។
ល្គឹកណា មន្ត្រីជំនាញមិនទាន់ប្រាប់ឱ្យដឹងការពិតបែបណានោះ ហើយព័ត៌មានដែលទទួលបាននេះវាគ្រាន់តែជាព័ត៌មានក្រៅផ្លូវការក្តៅៗនៅឡើយ ដែលមហាជនបានកត់សម្គាល់ថាម ិនគួរណាប៉ូលិសព្រំដែនទីនោះ បើកទ្រូងឱ្យមេព្រៃយួនចូលមកបោះជំរំក្នុងទឹកដីខ្មែរបែបនេះទេ…បើមានមែនគឺថោកទាបណាស់ ៕
ចែករំលែកព័តមាននេះ