រាជធានីភ្នំពេញ ៖ អ្នកវិទ្យាសាស្ត្រនៃក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (Intergovernmental Panel on Climate Change: IPCC) សហការជាមួយអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព…
រាជធានីភ្នំពេញ ៖ អ្នកវិទ្យាសាស្ត្រនៃក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (Intergovernmental Panel on Climate Change: IPCC) សហការជាមួយអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព បានធ្វើការផ្សព្វផ្សាយរបកគំហើញថ្មីៗរបស់ខ្លួន តាមរយៈរបាយការណ៍ពិសេសស្តីពីកំណើនសីតុណ្ហភាព១,៥អង្សាសេ ដើម្បីផ្តល់ជាគោលការណ៍ណែនាំគន្លឹះប្រកបដោយប្រសិទ្ធភាពសម្រាប់អ្នកជំនាញការ អ្នកវិភាគ និងមន្ត្រីរាជរដ្ឋាភិបាល ដើម្បីរៀបចំផែនការយុទ្ធសាស្ត្រ និងគោលនយោបាយពាក់ព័ន្ធការប្រែប្រួលអាកាសធាតុសម្រាប់ប្រទេសកម្ពុជា ។
ក្នុងឱកាសអញ្ជើញជាអធិបតីក្នុងពិធីផ្សព្វផ្សាយនេះ លោកជំទាវ ម៉ុម ថានី រដ្ឋលេខាធិការក្រសួងបរិស្ថាន បានគូសបញ្ជាក់ថា «កិច្ចសហប្រតិបត្តិការអន្តរជាតិដ៏រឹងមាំ នឹងជួយពង្រឹង សមត្ថភាពរបស់យើងក្នុងការបង្កើតភ័ស្តុតាងវិទ្យាសាស្ត្រអំពីផលប៉ះពាល់នៃការប្រែប្រួលអាកាសធាតុ ។ ក្នុងនាមជាអ្នកធ្វើសេចក្តីសម្រេចចិត្តនៅក្នុងរដ្ឋាភិបាល លោកជំទាវបានបន្ថែមថា យើងត្រូវការភ័ស្តុតាងនេះដើម្បីធ្វើការជ្រើសរើសឱ្យបានត្រឹមត្រូវ» ។
ជាមួយគ្នានេះ លោកជំទាវរដ្ឋលេខាធិការបានសង្កត់ធ្ងន់ថា យើងត្រូវការអ្នកវិទ្យាសាស្ត្រដែលអាចធ្វើការព្យារករពីផលប៉ះពាល់នៃការប្រែប្រួលអាកាសធាតុនៅកម្ពុជា ។ យើងត្រូវការអ្នកដែលអាចបង្កើតម៉ូដែលទឹកជំនន់ គ្រោះរាំងស្ងួត និងរលកកម្តៅក្នុងបរិបទនៃការប្រែប្រួលអាកាសធាតុ ។
យើងត្រូវការវិស្វករ និងអ្នកបច្ចេកទេសដែលអាចលើកស្នើដំណោះស្រាយចំពោះការប្រឈមថ្មីៗទាំងនេះ ។ យើងចង់ឱ្យប្រជាជនយើងនៅសម័យក្រោយសង្គ្រាម ក្រសោបយកវិទ្យាសាស្ត្រជាកត្តាគន្លឹះ ដើម្បីនាំយកប្រជាជនកម្ពុជាទៅកាន់មាគ៌៌ានៃប្រទេសអភិវឌ្ឍន៍នៅឆ្នាំ២០៥០ ។
សូមបញ្ជាក់ថា នៅក្នុងរបាយការណ៍ពិសេសបានអះអាងថា តាមរយៈកិច្ចការរបស់ក្រុមការងារ IPCC កំណើនសីតុណ្ហភាពបន្ថែម០,៥អង្សាសេនៅក្នុងសកលលោក អាចនាំមកនូវផលវិបាកធ្ងន់ធ្ងរ ។ ដូចនេះ យើងត្រូវកម្រិតកំណើនសីតុណ្ហភាពមិនឱ្យកើនឡើងលើស១,៥អង្សាសេ ។
ដើម្បីកម្រិតកំណើនសីតុណ្ហភាពនេះ យើងត្រូវការផ្លាស់ប្តូរដែលមិនធ្លាប់មានពីមុនមកដូចជា ការកាត់បន្ថយការបញ្ចេញឧស្ម័នពីគ្រប់វិស័យឱ្យស៊ី ជម្រៅ ការប្រើប្រាស់បច្ចេកវិទ្យាជំនួសផ្សេងៗ ដូចជា ថាមពលកកើតឡើងវិញ ការផ្លាស់ប្តូរឥរិយាបថ និងការបង្កើនវិនិយោគទៅលើជម្រើសបញ្ចេញកាបូនទាប ។
កម្មវិធីផ្សព្វផ្សាយសកម្មភាព និងរបកគំហើញនៃក្រុមការងារអន្តររដ្ឋាភិបាល ស្តីពីការប្រែប្រួលអាកាសធាតុ បានប្រព្រឹត្តទៅរយៈពេល២ថ្ងៃ ចាប់ពីថ្ងៃចន្ទ-អង្គារថ្ងៃទី២៧-២៨ ខែឧសភា ឆ្នាំ២០១៩ នៅខេត្ត សៀមរាប ក្រោមអធិបតីភាព លោកជំទាវ ម៉ុម ថានី រដ្ឋលេខាធិការក្រសួងបរិស្ថាន និងមានការចូលរួមពីគណៈប្រតិភូមកពីប្រទេសឡាវ តំណាងក្រសួងស្ថាប័នពាក់ព័ន្ធ អង្គការសង្គមស៊ីវិល ប្រព័ន្ធផ្សព្វផ្សាយព័ត៌មានជាតិនិងអន្តរជាតិ គ្រឹះស្ថានសិក្សា និងយុវជនជាច្រើននាក់ ៕
ចែករំលែកព័តមាននេះ