ខេត្តមណ្ឌលគិរី -ខេត្តព្រះសីហនុ ៖ កាលពីថ្ងៃទី២៧ វិច្ឆិកា មន្ត្រី៣នាក់ត្រូវបានអង្គភាពប្រឆាំងអំពើពុករលួយចាប់ខ្លួននៅកន្លែងផ្សេងគ្នា តែបានទាក់ទិនទៅនឹងបទចោទប្រកាន់ពីការប្រព្រឹត្តអំពើពុករលួយកិបកេងថវិកាជាតិដែល២នាក់ជាមន្ត្រីអគ្គិសនីនៅខេត្តមណ្ឌលគិរី និងម្នាក់ជាមន្ត្រីមានឋានៈជាអនុប្រធានសាខាពន្ធដារខេត្តព្រះសីហនុ ។
ទាក់ទិនទៅដល់ការចាប់ខ្លួនមន្ត្រីអគ្គិសនីខេត្តមណ្ឌលគិរី តាមសេចក្ដីរាយការណ៍ឱ្យដឹងថា បុគ្គលិកផ្នែកអាជីវកម្មនិងជំនួយការបេឡាអគ្គិសនីខេត្តមណ្ឌលគិរីពីរនាក់ត្រូវបានសាលាដំបូងខេត្តចេញដីកាឃាត់ខ្លួនបញ្ជូនទៅធ្វើការសាកសួរពីបទកិបកេងបន្លំលុយអង្គភាពប្រមាណ១០ម៉ឺនដុល្លារ ។ ករណីចាប់ឃាត់ខ្លួនមន្ត្រីនៅអង្គភាពអគ្គិសនីខេត្តមណ្ឌលគិរីនេះបានធ្វើឡើងកាលពីថ្ងៃទី២៧ វិច្ឆិកា ក្នុងក្រុងសែនមនោរម្យ ។ បន្ទាប់ពីការចាប់ឃាត់ខ្លួនបានមួយថ្ងៃ នៅល្ងាចថ្ងៃទី២៨ វិច្ឆិកា ជនជាប់ចោទទាំងពីរនាក់ត្រូវបានបញ្ជូនទៅឃុំខ្លួនបណ្ដោះអាសន្ននៅពន្ធនាគារខេត្ត ។
តាមប្រភពព័ត៌មានឱ្យដឹងថា ការឃាត់ខ្លួនមន្ត្រីពីរនាក់ខាងលើនេះ គឺធ្វើឡើងដោយសាលាដំបូងខេត្តមណ្ឌលគិរី ក្រោយពីមានការសើុបអង្កេតរបស់អង្គភាពប្រឆាំងអំពើពុករលួយ ។ មន្ត្រីដែលត្រូវចាប់ខ្លួននេះម្នាក់ឈ្មោះសួត សារឹម ភេទប្រុស ជាបុគ្គលិកផ្នែកអាជីវកម្ម និងម្នាក់ទៀតឈ្មោះនី សុពណ៌ ភេទស្រី មានមុខងារជាជំនួយការបេឡាអគ្គិសនី ។ ព្រះរាជអាជ្ញាអមសាលាដំបូងខេត្តមណ្ឌលគិរីបានបញ្ជាក់ថា បុគ្គលិកអគ្គិសនីទាំងពីរនាក់ខាងលើគឺពិតជាត្រូវបានចាប់ខ្លួនពីបទកិបកេងបន្លំប្រាក់ពីអង្គភាពអគ្គិសនីមណ្ឌលគិរី ដើម្បីប្រយោជន៍ផ្ទាល់ខ្លួនពិតមែន ។
បើតាមប្រភពព័ត៌មានមួយក្រៅផ្លូវការនិយាយថា ករណីនេះអាចនឹងមានការជាប់ពាក់ព័ន្ធជាមួយនឹងមន្ត្រីជាច្រើនរូបទៀតដែលបម្រើការនៅអង្គភាពអគ្គិសនីមណ្ឌលគិរី ដែលមិនខុសពីសម្លកំពឹសនោះទេ ។ លោក ឃុត សុភាង ព្រះរាជអាជ្ញាអមសាលាដំបូងខេត្តមណ្ឌលគិរី មានប្រសាសន៍នៅព្រឹកថ្ងៃទី២៩ វិច្ឆិកា ថា មន្ត្រីអគ្គិសនីខេត្តទាំង២នាក់ត្រូវបានសាលាដំបូងសម្រេចធ្វើការឃុំខ្លួនរួចហើយ បន្ទាប់ពីមន្ត្រីអង្គភាពប្រឆាំងអំពើពុករលួយចាប់ខ្លួនកាលពីថ្ងៃទី២៧ វិច្ឆិកា រួចបញ្ជូនមកកាន់សាលាដំបូងដើម្បីធ្វើការចោទប្រកាន់ ។ លោកព្រះរាជអាជ្ញាបានអះអាងថា សាលាដំបូងសម្រេចធ្វើការចោទប្រកាន់ជនជាប់ចោទទាំង២នាក់នេះ យោងតាមមាត្រា៥៩៨នៃក្រមព្រហ្មទណ្ឌ ក្នុងបទកេងយកប្រយោជន៍ដោយខុសច្បាប់ និងមាត្រា៦២៧ពីបទក្លែងបន្លំ ។
គេនៅចាំបានថា នៅអំឡុងពេលមានបាតុកម្មតវ៉ារបស់ប្រជាពលរដ្ឋកាលពីដើមឆ្នាំ២០១៣នេះ លោក ជិន សុឃុន ដែលជាអតីតប្រធានអគ្គិសនីខេត្តមានប្រសាសន៍ថា អគ្គិសនីមិនអាចចុះតម្លៃបានទេ ព្រោះមានការខាតបង់១ខែអស់ជិត៤០លានរៀល ។ បើយោងតាមប្រភពនានាដែលមិនទាន់ជាផ្លូវការនៅឡើយនោះ គឺមានការរកឃើញថាថវិកាដែលបាត់បង់ដោយការកិបកេងនេះមានប្រមាណ៤០០លានរៀលស្មើនឹងជាង១០ម៉ឺុនដុល្លារ ។
ចំណែកនៅខេត្តព្រះសីហនុវិញ តាមប្រភពព័ត៌មានឱ្យដឹងថា លោក ភី រិទ្ធ អនុប្រធានសាខាពន្ធដារខេត្តត្រូវបានអង្គភាពប្រឆាំងអំពើពុករលួយឃាត់ខ្លួននៅវេលាម៉ោង៧យប់ថ្ងៃទី២៧ វិច្ឆិកា ដែលតាមប្រភពថាបានឃាត់ខ្លួននៅរាជធានីភ្នំពេញ ។ លោកទេសរដ្ឋមន្ត្រីឱម យិុនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍ឱ្យដឹងថា នៅព្រឹកថ្ងៃទី២៩ វិច្ឆិកា អង្គភាពប្រឆាំងអំពើពុករលួយបានបញ្ជូនលោកភី រិទ្ធ ទៅកាន់សាលាដំបូងខេត្តព្រះសីហនុ ដើម្បីឱ្យព្រះរាជអាជ្ញាធ្វើការសាកសួរនិងធ្វើការចោទប្រកាន់ទាក់ទិននឹងការយកថ្លៃសេវាពន្ធដារលើសពីការកំណត់របស់រដ្ឋ ។ លោកអនុប្រធានសាខាពន្ធដារខេត្តព្រះសីហនុដែលត្រូវបានចាប់ខ្លួននេះកំពុងត្រូវបានសាកសួរដោយព្រះរាជអាជ្ញានិងចៅក្រមជុំវិញការចោទប្រកាន់ពីការយកថ្លៃសេវាពន្ធដារលើសការកំណត់របស់រដ្ឋ។
សូមរំឭកថា កាលពីថ្ងៃទី២៦ វិច្ឆិកា កន្លងមកនេះក្រុមប្រឹក្សាជាតិប្រឆាំងអំពើពុករលួយបានបើកកិច្ចប្រជុំលើកទី៣៥ ដោយបានស្ដាប់របាយការណ៍ការងារក្នុងខែវិច្ឆិកា ឆ្នាំ២០១៣ របស់ប្រធានអង្គភាពប្រឆាំងអំពើពុករលួយស្ដីពី ករណីមិនប្រកាសទ្រព្យសម្បត្តិ និងបំណុលពីសំណាក់មន្ត្រីជាន់ខ្ពស់ដែលត្រូវបានបញ្ចប់ពីមុខតំណែង ។ ចំណែកមន្ត្រីខ្មោច និងមន្ត្រីមានតែឈ្មោះ(មិនមកធ្វើការ) ក៏ជាមូលបទនៃការកេងយកផលប្រយោជន៍ខុសច្បាប់ដែលប្រធានស្ថាប័ន ប្រធានអង្គភាព ត្រូវទទួលខុសត្រូវចំពោះមុខច្បាប់
កិច្ចប្រជុំបានលើកយកករណីប្រធានការិយាល័យសង្គមកិច្ចស្រុកស្រីសន្ធរ ខេត្តកំពង់ចាម ករណីនៅខេត្តព្រះសីហនុ ខេត្តកំពង់ធំ ខេត្តសៀមរាប ខេត្តបាត់ដំបង និងខេត្តមណ្ឌលគិរី ដែលអង្គភាពប្រឆាំងអំពើពុករលួយកំពុងដំណើរការ ។ ចំណែករបាយការណ៍របស់មូលនិធិពិភពលោក(Golbal Fund) ដែលបានលើកពីបាតុភាពនៅផ្នែកជំងឺគ្រុនចាញ់ ផ្នែកជំងឺអេដស៍ និងអង្គការមេឌីកាំ(Medicam) ក៏ត្រូវបានអង្គភាពប្រឆាំងអំពើពុករលួយធ្វើការសើុបអង្កេតដែរ ។
អង្គប្រជុំបានចាប់អារម្មណ៍ខ្ពស់អំពីតួនាទីរបស់វិស័យឯកជនក្នុងការចូលរួមការប្រឆាំងអំពើពុករលួយ ហើយស្វាគមន៍ការចុះអនុស្សរណៈនៃការយោគយល់គ្នារវាងអង្គភាពប្រឆាំងអំពើពុករលួយនិងក្រុមហ៊ុនកូកាកូឡា ធ្វើរួមគ្នាប្រឆាំងអំពើពុករលួយ ។ អង្គប្រជុំជឿជាក់ថា ប្រការនេះនឹងបើកទូលាយដល់ការចូលរួមពីវិស័យឯកជនក្នុងការប្រឆាំងអំពើពុករលួយ ៕
ចែករំលែកព័តមាននេះ